TITUS
Vetus Testamentum graece iuxta LXX interpretes
Part No. 711
Previous part

Chapter: 142 
Verse: 1  Ψαλμὸς τῷ Δαυιδ, ὅτε αὐτὸν ὁ υἱὸς καταδιώκει.
Κύριε, εἰσάκουσον τῆς προσευχῆς μου,
ἐνώτισαι τὴν δέησίν μου ἐν τῇ ἀληϑείᾳ σου,
ἐπάκουσόν μου ἐν τῇ δικαιοσύνῃ σου·
Verse: 2  καὶ μὴ εἰσέλϑῃς εἰς κρίσιν μετὰ τοῦ δούλου σου,
ὅτι οὐ δικαιωϑήσεται ἐνώπιόν σου πᾶς ζῶν.
Verse: 3  ὅτι κατεδίωξεν ὁ ἐχϑρὸς τὴν ψυχήν μου,
ἐταπείνωσεν εἰς γῆν τὴν ζωήν μου,
ἐκάϑισέν με ἐν σκοτεινοῖς ὡς νεκροὺς αἰῶνος·
Verse: 4  καὶ ἠκηδίασεν ἐπ' ἐμὲ τὸ πνεῦμά μου,
ἐν ἐμοὶ ἐταράχϑη ἡ καρδία μου.
Verse: 5  ἐμνήσϑην ἡμερῶν ἀρχαίων
καὶ ἐμελέτησα ἐν πᾶσι τοῖς ἔργοις σου,
ἐν ποιήμασιν τῶν χειρῶν σου ἐμελέτων.
Verse: 6  διεπέτασα τὰς χεῖράς μου πρὸς σέ,
ἡ ψυχή μου ὡς γῆ ἄνυδρός σοι.
διάψαλμα.
Verse: 7  ταχὺ εἰσάκουσόν μου, κύριε,
ἐξέλιπεν τὸ πνεῦμά μου·
μὴ ἀποστρέψῃς τὸ πρόσωπόν σου ἀπ' ἐμοῦ,
καὶ ὁμοιωϑήσομαι τοῖς καταβαίνουσιν εἰς λάκκον.
Verse: 8  ἀκουστὸν ποίησόν μοι τὸ πρωὶ τὸ ἔλεός σου,
ὅτι ἐπὶ σοὶ ἤλπισα·
γνώρισόν μοι, κύριε, ὁδὸν ἐν ᾗ πορεύσομαι,
ὅτι πρὸς σὲ ἦρα τὴν ψυχήν μου·
Verse: 9  ἐξελοῦ με ἐκ τῶν ἐχϑρῶν μου, κύριε,
ὅτι πρὸς σὲ κατέϕυγον.
Verse: 10  δίδαξόν με τοῦ ποιεῖν τὸ ϑέλημά σου, ὅτι σὺ εἶ ὁ ϑεός μου·
τὸ πνεῦμά σου τὸ ἀγαϑὸν ὁδηγήσει με ἐν γῇ εὐϑείᾳ.
Verse: 11  ἕνεκα τοῦ ὀνόματός σου, κύριε, ζήσεις με,
ἐν τῇ δικαιοσύνῃ σου ἐξάξεις ἐκ ϑλίψεως τὴν ψυχήν μου·
Verse: 12  καὶ ἐν τῷ ἐλέει σου ἐξολεϑρεύσεις τοὺς ἐχϑρούς μου
καὶ ἀπολεῖς πάντας τοὺς ϑλίβοντας τὴν ψυχήν μου·
ὅτι δοῦλός σού εἰμι ἐγώ. //

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.