TITUS
Vetus Testamentum graece iuxta LXX interpretes
Part No. 780
Previous part

Chapter: 11 
Verse: 1  ᾽Απόστειλον τὸν ἄρτον σου ἐπὶ πρόσωπον τοῦ ὕδατος,
ὅτι ἐν πλήϑει τῶν ἡμερῶν εὑρήσεις αὐτόν·
Verse: 2  δὸς μερίδα τοῖς ἑπτὰ καί γε τοῖς ὀκτώ,
ὅτι οὐ γινώσκεις τί ἔσται πονηρὸν ἐπὶ τὴν γῆν.
Verse: 3  ἐὰν πληρωϑῶσιν τὰ νέϕη ὑετοῦ,
ἐπὶ τὴν γῆν ἐκχέουσιν·
καὶ ἐὰν πέσῃ ξύλον ἐν τῷ νότῳ καὶ ἐὰν ἐν τῷ βορρᾷ,
τόπῳ, οὗ πεσεῖται τὸ ξύλον, ἐκεῖ ἔσται.
Verse: 4  τηρῶν ἄνεμον οὐ σπερεῖ,
καὶ βλέπων ἐν ταῖς νεϕέλαις οὐ ϑερίσει,
Verse: 5  ἐν οἷς οὐκ ἔστιν γινώσκων τίς ἡ ὁδὸς τοῦ πνεύματος.
ὡς ὀστᾶ ἐν γαστρὶ τῆς κυοϕορούσης,
οὕτως οὐ γνώσῃ τὰ ποιήματα τοῦ ϑεοῦ,
ὅσα ποιήσει σὺν τὰ πάντα.
Verse: 6  ἐν πρωίᾳ σπεῖρον τὸ σπέρμα σου,
καὶ εἰς ἑσπέραν μὴ ἀϕέτω ἡ χείρ σου,
ὅτι οὐ γινώσκεις ποῖον στοιχήσει, ἢ τοῦτο ἢ τοῦτο,
καὶ ἐὰν τὰ δύο ἐπὶ τὸ αὐτὸ ἀγαϑά.
Verse: 7  καὶ γλυκὺ τὸ ϕῶς καὶ ἀγαϑὸν τοῖς ὀϕϑαλμοῖς
τοῦ βλέπειν σὺν τὸν ἥλιον·
Verse: 8  ὅτι καὶ ἐὰν ἔτη πολλὰ ζήσεται ὁ ἄνϑρωπος,
ἐν πᾶσιν αὐτοῖς εὐϕρανϑήσεται
καὶ μνησϑήσεται τὰς ἡμέρας τοῦ σκότους,
ὅτι πολλαὶ ἔσονται·
πᾶν τὸ ἐρχόμενον ματαιότης.
Verse: 9  Εὐϕραίνου, νεανίσκε, ἐν νεότητί σου,
καὶ ἀγαϑυνάτω σε ἡ καρδία σου ἐν ἡμέραις νεότητός σου,
καὶ περιπάτει ἐν ὁδοῖς καρδίας σου
καὶ ἐν ὁράσει ὀϕϑαλμῶν σου
καὶ γνῶϑι ὅτι ἐπὶ πᾶσι τούτοις ἄξει σε ὁ ϑεὸς ἐν κρίσει.
Verse: 10  καὶ ἀπόστησον ϑυμὸν ἀπὸ καρδίας σου
καὶ παράγαγε πονηρίαν ἀπὸ σαρκός σου,
ὅτι ἡ νεότης καὶ ἡ ἄνοια ματαιότης.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.