TITUS
Vetus Testamentum graece iuxta LXX interpretes
Part No. 872
Previous part

Chapter: 21 
Verse: 1    Τέκνον, ἥμαρτες; μὴ προσϑῇς μηκέτι
   καὶ περὶ τῶν προτέρων σου δεήϑητι.
Verse: 2    ὡς ἀπὸ προσώπου ὄϕεως ϕεῦγε ἀπὸ ἁμαρτίας·
   ἐὰν γὰρ προσέλϑῃς, δήξεταί σε·
   ὀδόντες λέοντος οἱ ὀδόντες αὐτῆς
   ἀναιροῦντες ψυχὰς ἀνϑρώπων.
Verse: 3    ὡς ῥομϕαία δίστομος πᾶσα ἀνομία,
   τῇ πληγῇ αὐτῆς οὐκ ἔστιν ἴασις.
Verse: 4    καταπληγμὸς καὶ ὕβρις ἐρημώσουσιν πλοῦτον·
   οὕτως οἶκος ὑπερηϕάνου ἐρημωϑήσεται.
Verse: 5    δέησις πτωχοῦ ἐκ στόματος ἕως ὠτίων αὐτοῦ,
   καὶ τὸ κρίμα αὐτοῦ κατὰ σπουδὴν ἔρχεται.
Verse: 6    μισῶν ἐλεγμὸν ἐν ἴχνει ἁμαρτωλοῦ,
   καὶ ὁ ϕοβούμενος κύριον ἐπιστρέψει ἐν καρδίᾳ.
Verse: 7    γνωστὸς μακρόϑεν ὁ δυνατὸς ἐν γλώσσῃ,
   ὁ δὲ νοήμων οἶδεν ἐν τῷ ὀλισϑάνειν αὐτόν.
Verse: 8    ὁ οἰκοδομῶν τὴν οἰκίαν αὐτοῦ ἐν χρήμασιν ἀλλοτρίοις
   ὡς συνάγων αὐτοῦ τοὺς λίϑους εἰς χειμῶνα.
Verse: 9    στιππύον συνηγμένον συναγωγὴ ἀνόμων,
   καὶ ἡ συντέλεια αὐτῶν ϕλὸξ πυρός.
Verse: 10    ὁδὸς ἁμαρτωλῶν ὡμαλισμένη ἐκ λίϑων,
   καὶ ἐπ' ἐσχάτων αὐτῆς βόϑρος ᾅδου.
Verse: 11    ῾Ο ϕυλάσσων νόμον κατακρατεῖ τοῦ ἐννοήματος αὐτοῦ,
   καὶ συντέλεια τοῦ ϕόβου κυρίου σοϕία.
Verse: 12    οὐ παιδευϑήσεται ὃς οὐκ ἔστιν πανοῦργος,
   ἔστιν δὲ πανουργία πληϑύνουσα πικρίαν.
Verse: 13    γνῶσις σοϕοῦ ὡς κατακλυσμὸς πληϑυνϑήσεται
   καὶ ἡ βουλὴ αὐτοῦ ὡς πηγὴ ζωῆς.
Verse: 14    ἔγκατα μωροῦ ὡς ἀγγεῖον συντετριμμένον
   καὶ πᾶσαν γνῶσιν οὐ κρατήσει.
Verse: 15    λόγον σοϕὸν ἐὰν ἀκούσῃ ἐπιστήμων,
   αἰνέσει αὐτὸν καὶ ἐπ' αὐτὸν προσϑήσει·
   ἤκουσεν ὁ σπαταλῶν, καὶ ἀπήρεσεν αὐτῷ,
   καὶ ἀπέστρεψεν αὐτὸν ὀπίσω τοῦ νώτου αὐτοῦ.
Verse: 16    ἐξήγησις μωροῦ ὡς ἐν ὁδῷ ϕορτίον,
   ἐπὶ δὲ χείλους συνετοῦ εὑρεϑήσεται χάρις.
Verse: 17    στόμα ϕρονίμου ζητηϑήσεται ἐν ἐκκλησίᾳ,
   καὶ τοὺς λόγους αὐτοῦ διανοηϑήσονται ἐν καρδίᾳ.
Verse: 18    ῾Ως οἶκος ἠϕανισμένος οὕτως μωρῷ σοϕία,
   καὶ γνῶσις ἀσυνέτου ἀδιεξέταστοι λόγοι.
Verse: 19    πέδαι ἐν ποσὶν ἀνοήτου παιδεία
   καὶ ὡς χειροπέδαι ἐπὶ χειρὸς δεξιᾶς.
Verse: 20    μωρὸς ἐν γέλωτι ἀνυψοῖ ϕωνὴν αὐτοῦ,
   ἀνὴρ δὲ πανοῦργος μόλις ἡσυχῇ μειδιάσει.
Verse: 21    ὡς κόσμος χρυσοῦς ϕρονίμῳ παιδεία
   καὶ ὡς χλιδὼν ἐπὶ βραχίονι δεξιῷ.
Verse: 22    ποὺς μωροῦ ταχὺς εἰς οἰκίαν,
   ἄνϑρωπος δὲ πολύπειρος αἰσχυνϑήσεται ἀπὸ προσώπου.
Verse: 23    ἄϕρων ἀπὸ ϑύρας παρακύπτει εἰς οἰκίαν,
   ἀνὴρ δὲ πεπαιδευμένος ἔξω στήσεται.
Verse: 24    ἀπαιδευσία ἀνϑρώπου ἀκροᾶσϑαι παρὰ ϑύραν,
   ὁ δὲ ϕρόνιμος βαρυνϑήσεται ἀτιμίᾳ.
Verse: 25    χείλη ἀλλοτρίων ἐν τούτοις διηγήσονται,
   λόγοι δὲ ϕρονίμων ἐν ζυγῷ σταϑήσονται.
Verse: 26    ἐν στόματι μωρῶν ἡ καρδία αὐτῶν,
   καρδία δὲ σοϕῶν στόμα αὐτῶν.
Verse: 27    ἐν τῷ καταρᾶσϑαι ἀσεβῆ τὸν σατανᾶν
   αὐτὸς καταρᾶται τὴν ἑαυτοῦ ψυχήν.
Verse: 28    μολύνει τὴν ἑαυτοῦ ψυχὴν ὁ ψιϑυρίζων
   καὶ ἐν παροικήσει μισηϑήσεται.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.