TITUS
Vetus Testamentum graece iuxta LXX interpretes
Part No. 879
Previous part

Chapter: 28 
Verse: 1    ὁ ἐκδικῶν παρὰ κυρίου εὑρήσει ἐκδίκησιν,
   καὶ τὰς ἁμαρτίας αὐτοῦ διατηρῶν διατηρήσει.
Verse: 2    ἄϕες ἀδίκημα τῷ πλησίον σου,
   καὶ τότε δεηθέντος σου αἱ ἁμαρτίαι σου λυθήσονται.
Verse: 3    ἄνθρωπος ἀνθρώπῳ συντηρεῖ ὀργήν,
   καὶ παρὰ κυρίου ζητεῖ ἴασιν;
Verse: 4    ἐπ' ἄνθρωπον ὅμοιον αὐτῷ οὐκ ἔχει ἔλεος,
   καὶ περὶ τῶν ἁμαρτιῶν αὐτοῦ δεῖται;
Verse: 5    αὐτὸς σὰρξ ὢν διατηρεῖ μῆνιν,
   τίς ἐξιλάσεται τὰς ἁμαρτίας αὐτοῦ;
Verse: 6    μνήσθητι τὰ ἔσχατα καὶ παῦσαι ἐχθραίνων,
   καταϕθορὰν καὶ θάνατον, καὶ ἔμμενε ἐντολαῖς.
Verse: 7    μνήσθητι ἐντολῶν καὶ μὴ μηνίσῃς τῷ πλησίον,
   καὶ διαθήκην ὑψίστου καὶ πάριδε ἄγνοιαν.
Verse: 8    ᾽Απόσχου ἀπὸ μάχης, καὶ ἐλαττώσεις ἁμαρτίας·
   ἄνθρωπος γὰρ θυμώδης ἐκκαύσει μάχην,
Verse: 9    καὶ ἀνὴρ ἁμαρτωλὸς ταράξει ϕίλους
   καὶ ἀνὰ μέσον εἰρηνευόντων ἐμβαλεῖ διαβολήν.
Verse: 10    κατὰ τὴν ὕλην τοῦ πυρὸς οὕτως ἐκκαυθήσεται,
   καὶ κατὰ τὴν στερέωσιν τῆς μάχης ἐκκαυθήσεται·
   κατὰ τὴν ἰσχὺν τοῦ ἀνθρώπου ὁ θυμὸς αὐτοῦ ἔσται,
   καὶ κατὰ τὸν πλοῦτον ἀνυψώσει ὀργὴν αὐτοῦ.
Verse: 11    ἔρις κατασπευδομένη ἐκκαίει πῦρ,
   καὶ μάχη κατασπεύδουσα ἐκχέει αἷμα.
Verse: 12    ἐὰν ϕυσήσῃς εἰς σπινθῆρα, ἐκκαήσεται,
   καὶ ἐὰν πτύσῃς ἐπ' αὐτόν, σβεσθήσεται·
   καὶ ἀμϕότερα ἐκ τοῦ στόματός σου ἐκπορεύεται.
Verse: 13    Ψίθυρον καὶ δίγλωσσον καταράσασθε·
   πολλοὺς γὰρ εἰρηνεύοντας ἀπώλεσεν.
Verse: 14    γλῶσσα τρίτη πολλοὺς ἐσάλευσεν
   καὶ διέστησεν αὐτοὺς ἀπὸ ἔθνους εἰς ἔθνος
   καὶ πόλεις ὀχυρὰς καθεῖλεν
   καὶ οἰκίας μεγιστάνων κατέστρεψεν.
Verse: 15    γλῶσσα τρίτη γυναῖκας ἀνδρείας ἐξέβαλεν
   καὶ ἐστέρεσεν αὐτὰς τῶν πόνων αὐτῶν.
Verse: 16    ὁ προσέχων αὐτῇ οὐ μὴ εὕρῃ ἀνάπαυσιν
   οὐδὲ κατασκηνώσει μεθ' ἡσυχίας.
Verse: 17    πληγὴ μάστιγος ποιεῖ μώλωπα,
   πληγὴ δὲ γλώσσης συγκλάσει ὀστᾶ.
Verse: 18    πολλοὶ ἔπεσαν ἐν στόματι μαχαίρας,
   καὶ οὐχ ὡς οἱ πεπτωκότες διὰ γλῶσσαν.
Verse: 19    μακάριος ὁ σκεπασθεὶς ἀπ' αὐτῆς,
   ὃς οὐ διῆλθεν ἐν τῷ θυμῷ αὐτῆς,
   ὃς οὐχ εἵλκυσεν τὸν ζυγὸν αὐτῆς
   καὶ ἐν τοῖς δεσμοῖς αὐτῆς οὐκ ἐδέθη·
Verse: 20    ὁ γὰρ ζυγὸς αὐτῆς ζυγὸς σιδηροῦς,
   καὶ οἱ δεσμοὶ αὐτῆς δεσμοὶ χάλκειοι·
Verse: 21    θάνατος πονηρὸς ὁ θάνατος αὐτῆς,
   καὶ λυσιτελὴς μᾶλλον ὁ ᾅδης αὐτῆς.
Verse: 22    οὐ μὴ κρατήσῃ εὐσεβῶν,
   καὶ ἐν τῇ ϕλογὶ αὐτῆς οὐ καήσονται.
Verse: 23    οἱ καταλείποντες κύριον ἐμπεσοῦνται εἰς αὐτήν,
   καὶ ἐν αὐτοῖς ἐκκαήσεται καὶ οὐ μὴ σβεσθῇ·
   ἐπαποσταλήσεται αὐτοῖς ὡς λέων
   καὶ ὡς πάρδαλις λυμανεῖται αὐτούς.
Verse: 24    ἰδὲ περίϕραξον τὸ κτῆμά σου ἀκάνθαις,
   τὸ ἀργύριόν σου καὶ τὸ χρυσίον κατάδησον·
Verse: 25    καὶ τοῖς λόγοις σου ποίησον ζυγὸν καὶ σταθμὸν
   καὶ τῷ στόματί σου ποίησον θύραν καὶ μοχλόν.
Verse: 26    πρόσεχε μήπως ὀλίσθῃς ἐν αὐτῇ,
   μὴ πέσῃς κατέναντι ἐνεδρεύοντος.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.