TITUS
Vetus Testamentum graece iuxta LXX interpretes
Part No. 887
Previous part

Chapter: 36 
Verse: 1    ᾽Ελέησον ἡμᾶς, δέσποτα ὁ θεὸς πάντων, καὶ ἐπίβλεψον
   καὶ ἐπίβαλε τὸν ϕόβον σου ἐπὶ πάντα τὰ ἔθνη·
Verse: 2    ἔπαρον τὴν χεῖρά σου ἐπὶ ἔθνη ἀλλότρια,
   καὶ ἰδέτωσαν τὴν δυναστείαν σου.
Verse: 3    ὥσπερ ἐνώπιον αὐτῶν ἡγιάσθης ἐν ἡμῖν,
   οὕτως ἐνώπιον ἡμῶν μεγαλυνθείης ἐν αὐτοῖς·
Verse: 4    καὶ ἐπιγνώτωσάν σε, καθάπερ καὶ ἡμεῖς ἐπέγνωμεν
   ὅτι οὐκ ἔστιν θεὸς πλὴν σοῦ, κύριε.
Verse: 5    ἐγκαίνισον σημεῖα καὶ ἀλλοίωσον θαυμάσια,
   δόξασον χεῖρα καὶ βραχίονα δεξιόν·
Verse: 6    ἔγειρον θυμὸν καὶ ἔκχεον ὀργήν,
   ἔξαρον ἀντίδικον καὶ ἔκτριψον ἐχθρόν.
Verse: 7    σπεῦσον καιρὸν καὶ μνήσθητι ὁρκισμοῦ,
   καὶ ἐκδιηγησάσθωσαν τὰ μεγαλεῖά σου.
Verse: 8    ἐν ὀργῇ πυρὸς καταβρωθήτω ὁ σῳζόμενος,
   καὶ οἱ κακοῦντες τὸν λαόν σου εὕροισαν ἀπώλειαν.
Verse: 9    σύντριψον κεϕαλὰς ἀρχόντων ἐχθρῶν
   λεγόντων Οὐκ ἔστιν πλὴν ἡμῶν.
Verse: 10    συνάγαγε πάσας ϕυλὰς Ιακωβ
   καὶ κατακληρονόμησον αὐτοὺς καθὼς ἀπ' ἀρχῆς.
Verse: 11    ἐλέησον λαόν, κύριε, κεκλημένον ἐπ' ὀνόματί σου
   καὶ Ισραηλ, ὃν πρωτογόνῳ ὡμοίωσας.
Verse: 12    οἰκτίρησον πόλιν ἁγιάσματός σου,
   Ιερουσαλημ τόπον καταπαύματός σου·
Verse: 13    πλῆσον Σιων ἀρεταλογίας σου
   καὶ ἀπὸ τῆς δόξης σου τὸν λαόν σου.
Verse: 14    δὸς μαρτύριον τοῖς ἐν ἀρχῇ κτίσμασίν σου
   καὶ ἔγειρον προϕητείας τὰς ἐπ' ὀνόματί σου·
Verse: 15    δὸς μισθὸν τοῖς ὑπομένουσίν σε,
   καὶ οἱ προϕῆταί σου ἐμπιστευθήτωσαν.
Verse: 16    εἰσάκουσον, κύριε, δεήσεως τῶν ἱκετῶν σου
   κατὰ τὴν εὐλογίαν Ααρων περὶ τοῦ λαοῦ σου,
Verse: 17    καὶ γνώσονται πάντες οἱ ἐπὶ τῆς γῆς
   ὅτι κύριος εἶ ὁ θεὸς τῶν αἰώνων.
Verse: 18    Πᾶν βρῶμα ϕάγεται κοιλία,
   ἔστιν δὲ βρῶμα βρώματος κάλλιον.
Verse: 19    ϕάρυγξ γεύεται βρώματα θήρας,
   οὕτως καρδία συνετὴ λόγους ψευδεῖς.
Verse: 20    καρδία στρεβλὴ δώσει λύπην,
   καὶ ἄνθρωπος πολύπειρος ἀνταποδώσει αὐτῷ.
Verse: 21    πάντα ἄρρενα ἐπιδέξεται γυνή,
   ἔστιν δὲ θυγάτηρ θυγατρὸς κρείσσων.
Verse: 22    κάλλος γυναικὸς ἱλαρύνει πρόσωπον
   καὶ ὑπὲρ πᾶσαν ἐπιθυμίαν ἀνθρώπου ὑπεράγει·
Verse: 23    εἰ ἔστιν ἐπὶ γλώσσης αὐτῆς ἔλεος καὶ πραύτης,
   οὐκ ἔστιν ὁ ἀνὴρ αὐτῆς καθ' υἱοὺς ἀνθρώπων.
Verse: 24    ὁ κτώμενος γυναῖκα ἐνάρχεται κτήσεως,
   βοηθὸν κατ' αὐτὸν καὶ στῦλον ἀναπαύσεως.
Verse: 25    οὗ οὐκ ἔστιν ϕραγμός, διαρπαγήσεται κτῆμα·
   καὶ οὗ οὐκ ἔστιν γυνή, στενάξει πλανώμενος.
Verse: 26    τίς γὰρ πιστεύσει εὐζώνῳ λῃστῇ
   ἀϕαλλομένῳ ἐκ πόλεως εἰς πόλιν;
Verse: 27    οὕτως ἀνθρώπῳ μὴ ἔχοντι νοσσιὰν
   καὶ καταλύοντι οὗ ἐὰν ὀψίσῃ.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.