TITUS
Atharva-Veda-Samhita (Saunaka)
Part No. 96
Previous part

Hymn: 25 
Verse: 1 
Halfverse: a    uttudás tvót tudatu mā́ dʰr̥tʰāḥ śáyane své /
Halfverse: c    íṣuḥ kā́masya yā́ bʰīmā́ táyā vidʰyāmi tvā hr̥dí //1//

Verse: 2 
Halfverse: a    ādʰī́parṇāṃ kā́maśalyām íṣuṃ saṃkalpákulmalām /
Halfverse: c    tā́ṃ súsaṃnatāṃ kr̥tvā́ kā́mo vidʰyatu tvā hr̥dí //2//

Verse: 3 
Halfverse: a    yā́ plīhā́naṃ śoṣáyati kā́masyéṣuḥ súsaṃnatā /
Halfverse: c    prācī́napakṣā vyòṣā táyā vidʰyāmi tvā hr̥dí //3//

Verse: 4 
Halfverse: a    śucā́ viddʰā́ vyòṣayā śúṣkāsyābʰí sarpa mā /
Halfverse: c    mr̥dúr nímanyuḥ kévalī priyavādíny ánuvratā //4//

Verse: 5 
Halfverse: a    ā́jāmi tvā́janyā pári mātúr átʰo pitúḥ /
Halfverse: c    yátʰā máma krátāv áso máma cittám upā́yasi //5//

Verse: 6 
Halfverse: a    vy àsyai mitrāvaruṇau hr̥dáś cittā́ny asyatam /
Halfverse: c    átʰainām akratúṃ kr̥tvā́ mámaivá kr̥ṇutaṃ váśe //6//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.