TITUS
Atharva-Veda-Samhita (Saunaka)
Part No. 132
Previous part

Hymn: 30 
Verse: 1 
Halfverse: a    aháṃ rudrébʰir vásubʰiś carāmy ahám ādityaír utá viśvádevaiḥ /
Halfverse: c    aháṃ mitrā́várunobʰā́ bibʰarmy ahám indrāgnī́ ahám aśvínobʰā́ //1//

Verse: 2 
Halfverse: a    aháṃ rā́ṣṭrī saṃgámanī vásūnāṃ cikitúṣī pratʰamā́ yajñíyānām /
Halfverse: c    tā́ṃ mā devā́ vy àdadʰuḥ purutrā́ bʰū́ristʰātrāṃ bʰū́ry āveśáyantaḥ //2//

Verse: 3 
Halfverse: a    ahám evá svayám idáṃ vadāmi júṣṭaṃ devā́nām utá mā́nuṣāṇām /
Halfverse: c    yáṃ kāmáye tántam ugráṃ kr̥ṇomi táṃ brahmā́ṇaṃ tám ŕ̥ṣiṃ táṃ sumedʰā́m //3//

Verse: 4 
Halfverse: a    máyā só 'nnam atti yó vipáśyati yáḥ prāṇáti yá īm śr̥ṇóty uktám /
Halfverse: c    amantávo mā́ṃ tá úpa kṣiyanti śrudʰí śruta śruddʰéyaṃ te vadāmi //4//

Verse: 5 
Halfverse: a    aháṃ rudrā́ya dʰánur ā́ tanomi brahmadvíṣe śárave hántavā́ u /
Halfverse: c    aháṃ jánāya samádaṃ kr̥ṇomi ahám dyā́vāpr̥tʰivī́ ā́ viveśa //5//

Verse: 6 
Halfverse: a    aháṃ sómam āhanásaṃ bibʰarmy aháṃ tváṣṭāram utá pūṣáṇaṃ bʰágam /
Halfverse: c    aháṃ dadʰāmi dráviṇā havíṣmate suprāvyā̀3 yájamānāya sunvaté //6//

Verse: 7 
Halfverse: a    aháṃ suve pitáram asya mūrdʰán máma yónir apsv à1ntáḥ samudré /
Halfverse: c    táto ví tiṣṭʰe bʰúvanāni víśvotā́mū́ṃ dyā́ṃ varṣmáṇópa spr̥śāmi //7//

Verse: 8 
Halfverse: a    ahám evá vā́taiva prá vāmy ārábʰamāṇā bʰúvanāni víśvā /
Halfverse: c    paró divā́ pará enā́ pr̥tʰivyaítā́vatī mahimnā́ sáṃ babʰūva //8//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.