TITUS
Atharva-Veda-Samhita (Saunaka)
Part No. 133
Previous part

Hymn: 31 
Verse: 1 
Halfverse: a    tváyā manyo sarátʰam ārujánto hárṣamāṇā hr̥ṣitā́so marutvan /
Halfverse: c    tigméṣava ā́yudʰā saṃśíśānā úpa prá yantu náro agnírūpāḥ //1//

Verse: 2 
Halfverse: a    agnír iva manyo tviṣitáḥ sahasva senānī́r naḥ sahure hūtá edʰi /
Halfverse: c    hatvā́ya śátrūn ví bʰajasva véda ójo mímāno ví mŕ̥dʰo nudasva //2//

Verse: 3 
Halfverse: a    sáhasva manyo abʰímātim asmaí ruján mr̥ṇán pramr̥ṇán préhi śátrūn /
Halfverse: c    ugráṃ te pā́jo nanv ā́ rurudʰre vaśī́ váśaṃ nayāsā ekaja tvám //3//

Verse: 4 
Halfverse: a    éko bahūnā́m asi manya īḍitā́ víśaṃviśam yuddʰā́ya sáṃ śiśādʰi /
Halfverse: c    ákr̥ttaruk tváyā yujā́ vayáṃ dyumántaṃ gʰóṣam vijayā́ya kr̥ṇmasi //4//

Verse: 5 
Halfverse: a    vijeṣakŕ̥d índra ivānavabravò 'smā́kaṃ manyo adʰipā́ bʰavehá /
Halfverse: c    priyáṃ te nā́ma sahure gr̥ṇīmasi vidmā́ tám útsaṃ yáta ābabʰū́tʰa //5//

Verse: 6 
Halfverse: a    ā́bʰūtyā sahajā́ vajra sāyaka sáho bibʰarṣi sahabʰūte úttaram /
Halfverse: c    krátvā no manyo sahá medy èdʰi mahādʰanásya puruhūta saṃsŕ̥ji //6//

Verse: 7 
Halfverse: a    sáṃsr̥ṣṭaṃ dʰánam ubʰáyaṃ samā́kr̥tam asmábʰyaṃ dʰattāṃ váruṇaś ca manyúḥ /
Halfverse: c    bʰíyo dádʰānā hŕ̥dayeṣu śátravaḥ párājitāso ápa ní layantām //7//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.