TITUS
Atharva-Veda-Samhita (Saunaka)
Part No. 134
Previous part

Hymn: 32 
Verse: 1 
Halfverse: a    yás te manyó 'vidʰad vajra sāyaka sáha ójaḥ puṣyati víśvam ānuṣák /
Halfverse: c    sāhyā́ma dā́sam ā́ryaṃ tváyā yujā́ vayáṃ sáhaskr̥tena sáhasā sáhasvatā //1//

Verse: 2 
Halfverse: a    manyúr índro manyúr evā́sa devó manyúr hótā váruṇo jātávedāḥ /
Halfverse: c    manyúṃ víśa īḍate mā́nuṣīr yā́ḥ pahí no manyo tápasā sajóṣāḥ //2//

Verse: 3 
Halfverse: a    abʰī́hi manyo tavásas távīyān tápasā yujā́ ví jahi śátrūn /
Halfverse: c    amitrahā́ vr̥trahā́ dasyuhā́ ca víśvā vásūny ā́ bʰarā tváṃ naḥ //3//

Verse: 4 
Halfverse: a    tváṃ hí manyo abʰíbʰūtyojāḥ svayaṃbʰū́r bʰā́mo abʰimātiṣāháḥ /
Halfverse: c    viśvácarṣaṇiḥ sáhuriḥ sáhīyān asmā́sv ójaḥ pŕ̥tanāsu dʰehi //4//

Verse: 5 
Halfverse: a    abʰāgáḥ sánn ápa páreto asmi táva krátvā taviṣásya pracetaḥ /
Halfverse: c    táṃ tvā manyo akratúr jihīḍāháṃ svā́ tanū́r baladā́vā na éhi //5//

Verse: 6 
Halfverse: a    ayáṃ te asmy úpa na éhy arvā́ṅ pratīcīnáḥ sahure viśvadāvan /
Halfverse: c    mányo vajrinn abʰí na ā́ vavr̥tsva hánāva dásyūṃr utá bodʰy āpéḥ //6//

Verse: 7 
Halfverse: a    abʰí préhi dakṣiṇató bʰavā nó 'dʰā vr̥trā́ṇi jaṅgʰanāva bʰū́ri /
Halfverse: c    juhómi te dʰarúṇaṃ mádʰvo ágram ubʰā́v upāṃśú pratʰamā́ pibāva //7//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.