TITUS
Atharva-Veda-Samhita (Saunaka)
Part No. 138
Previous part

Hymn: 36 
Verse: 1 
Halfverse: a    tā́nt satyaújāḥ prá dahatv agnír vaiśvānaró vŕ̥ṣā /
Halfverse: c    yó no durasyā́d dípsāc cā́tʰo yó no arātiyā́t //1//

Verse: 2 
Halfverse: a    yó no dipsā́d ádipsato dípsato yáś ca dípsati /
Halfverse: c    vaiśvānarásya dáṃṣṭrayor agnér ápi dadʰāmi tám //2//

Verse: 3 
Halfverse: a    yá āgaré mr̥gáyante pratikrośé 'māvāsyè /
Halfverse: c    kravyā́do anyā́n dípsataḥ sárvāṃs tā́nt sáhasā sahe //3//

Verse: 4 
Halfverse: a    sáhe piśācā́nt sáhasaíṣāṃ dráviṇaṃ dade /
Halfverse: c    sárvān durasyató hanmi sáṃ ma ā́kūtir r̥dyatām //4//

Verse: 5 
Halfverse: a    yé devā́s téna hā́sante sū́ryeṇa mimate javám /
Halfverse: c    nadī́ṣu párvateṣu yé sáṃ taíḥ paśúbʰir vide //5//

Verse: 6 
Halfverse: a    tápano asmi piśācā́nām vyāgʰró gómatām iva /
Halfverse: c    śvā́naḥ siṃhám iva dr̥ṣṭvā́ té ná vindante nyáñcanam //6//

Verse: 7 
Halfverse: a    ná piśācaíḥ sáṃ śaknomi ná stenaíḥ ná vanargúbʰiḥ /
Halfverse: c    piśācā́s tásmān naśyanti yám aháṃ grā́mam āviśé //7//

Verse: 8 
Halfverse: a    yáṃ grā́mam āviśáta idám ugráṃ sáho máma /
Halfverse: c    piśācā́s tásmān naśyanti ná pāpám úpa jānate //8//

Verse: 9 
Halfverse: a    yé mā krodʰáyanti lapitā́ hastínaṃ maśákā iva /
Halfverse: c    tā́n aháṃ manye dúrhitān jáne álpaśayūn iva //9//

Verse: 10 
Halfverse: a    abʰí táṃ nírr̥tir dʰattām áśvam iva aśvābʰidʰā́nyā /
Halfverse: c    malvó yó máhyaṃ krúdʰyati sá u pā́śān ná mucyate //10//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.