TITUS
Atharva-Veda-Samhita (Saunaka)
Part No. 137
Previous part

Hymn: 35 
Verse: 1 
Halfverse: a    yám odanáṃ pratʰamajā́ r̥tásya prajā́patis tápasā brahmáṇé 'pacat /
Halfverse: c    yó lokā́nāṃ vídʰr̥tir nā́bʰiréṣāt ténaudanénā́ti tarāṇi mr̥tyúm //1//

Verse: 2 
Halfverse: a    yénā́taran bʰūtakŕ̥tó 'ti mr̥tyúṃ yám anvávindan tápasā śrámeṇa /
Halfverse: c    yáṃ papā́ca brahmáṇe bráhma pū́rvaṃ ténaudanénā́ti tarāṇi mr̥tyúm //2//

Verse: 3 
Halfverse: a    yó dādʰā́ra pr̥tʰivī́ṃ viśvábʰojasaṃ yó antárikṣam ā́pr̥ṇād rásena /
Halfverse: c    yó ástabʰnād dívam ūrdʰvó mahimnā́ tenaudanénā́ti tarāṇi mr̥tyúm //3//

Verse: 4 
Halfverse: a    yásmān mā́sā nírmitās triṃśádarāḥ saṃvatsaró yásmān nírmito dvā́daśāraḥ /
Halfverse: c    ahorātrā́ yáṃ pariyánto nā́pús ténaudanénā́ti tarāṇi mr̥tyúm //4//

Verse: 5 
Halfverse: a    yáḥ prāṇadáḥ prāṇadávān babʰū́va yásmai lokā́ gʰr̥távantaḥ kṣáranti /
Halfverse: c    jyótiṣmatīḥ pradíśo yásya sárvās ténaudanénā́ti tarāṇi mr̥tyúm //5//

Verse: 6 
Halfverse: a    yásmāt pakvā́d amŕ̥taṃ saṃbabʰū́va yó gāyatryā́ ádʰipatir babʰū́va /
Halfverse: c    yásmin védā níhitā viśvárūpās ténaudanénā́ti tarāṇi mr̥tyúm //6//

Verse: 7 
Halfverse: a    áva bādʰe dviṣántaṃ devapīyúṃ sapátnā yé mé 'pa te bʰavantu /
Halfverse: c    brahmaudanáṃ viśvajítaṃ pacāmi śr̥ṇvántu me śraddádʰānasya devā́ḥ //7//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.