TITUS
Atharva-Veda-Samhita (Saunaka)
Part No. 136
Previous part

Hymn: 34 
Verse: 1 
Halfverse: a    bráhmāsya śīrṣám br̥hád asya pr̥ṣṭʰáṃ vāmadevyám udáram odanásya /
Halfverse: c    cʰándāṃsi pakṣaú múkʰam asya satyáṃ viṣṭārī́ jātás tápaso'dʰi yajñáḥ //1//

Verse: 2 
Halfverse: a    anastʰā́ḥ pūtā́ḥ pávanena śuddʰā́ḥ śúcayaḥ śúcim ápi yanti lokám /
Halfverse: c    naíṣāṃ śiśnáṃ prá dahati jātávedāḥ svargé loké bahú straíṇam eṣām //2//

Verse: 3 
Halfverse: a    viṣṭāríṇam odanáṃ yé pácanti naínān ávartiḥ sacate kadā́ caná /
Halfverse: c    ā́ste yamá úpa yāti devā́nt sám gandʰarvaír madate somyébʰiḥ //3//

Verse: 4 
Halfverse: a    viṣṭāríṇam odanám yé pácanti naínān yamáḥ pári muṣṇāti rétaḥ /
Halfverse: c    ratʰī́ ha bʰūtvā́ ratʰayā́na īyate pakṣī́ ha bʰūtvā́ti dívaḥ sám eti //4//

Verse: 5 
Halfverse: a    eṣá yajñā́nāṃ vítato váhiṣṭʰo viṣṭāríṇaṃ paktvā́ dívam ā́ viveśa /
Halfverse: c    āṇḍī́kaṃ kúmudaṃ sáṃ tanoti bísaṃ śālū́kaṃ śápʰako mulālī́ /
Halfverse: e    etā́s tvā dʰā́rā úpa yantu sárvāḥ svargé loké mádʰumat pínvamānā úpa tvā tiṣṭʰantu puṣkaríṇīḥ sámantāḥ //5//

Verse: 6 
Halfverse: a    gʰr̥táhradā mádʰukūlāḥ súrodakāḥ kṣīréṇa pūrṇā́ udakéna dadʰnā́ /
Halfverse: c    etā́s tvā dʰā́rā úpa yantu sárvāḥ svargé loké mádʰumat pínvamānā úpa tvā tiṣṭʰantu puṣkaríṇīḥ sámantāḥ //6//

Verse: 7 
Halfverse: a    catúraḥ kumbʰā́ṃś caturdʰā́ dadāmi kṣīréṇa pūrnā́m̐ udakéna dadʰnā́ /
Halfverse: c    etā́s tvā dʰā́rā úpa yantu sárvāḥ svargé loké mádʰumat pínvamānā úpa tvā tiṣṭʰantu puṣkaríṇīḥ sámantāḥ //7//

Verse: 8 
Halfverse: a    imám odanáṃ ní dadʰe brāhmaṇéṣu viṣṭāríṇaṃ lokajítaṃ svargám /
Halfverse: c    sá me mā́ kṣeṣṭa svadʰáyā pínvamāno viśvárūpā dʰenúḥ kāmadúgʰā me astu //8//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.