TITUS
Atharva-Veda-Samhita (Saunaka)
Part No. 148
Previous part

Hymn: 6 
Verse: 1 
Halfverse: a    bráhma jajñānáṃ pratʰamáṃ purástād ví sīmatáḥ surúco vená āvaḥ /
Halfverse: c    sá budʰnyā̀ upamā́ asya viṣṭʰā́ḥ satáś ca yónim ásataś ca ví vaḥ //1//

Verse: 2 
Halfverse: a    ánāptā yé vaḥ pratʰamā́ yā́ni kármāṇi cakriré /
Halfverse: c    vīrā́n no átra mā́ dabʰan tád va etát puró dadʰe //2//

Verse: 3 
Halfverse: a    sahásradʰāra evá te sám asvaran divó nā́ke mádʰujihvā asaścátaḥ /
Halfverse: c    tásya spáśo ná ni miṣanti bʰū́rṇayaḥ padépade pāśínaḥ santi sétave //3//

Verse: 4 
Halfverse: a    páry ū ṣú prá dʰanvā vā́jasātaye pári vr̥trā́ṇi sakṣáṇiḥ /
Halfverse: c    dviṣás tád ádʰy arṇavéneyase sanisrasó nā́māsi trayodaśó mā́sa índrasya gr̥háḥ //4//

Verse: 5 
Halfverse: a    nv è3ténārātsīr asau svā́hā /
Halfverse: c    tigmā́yudʰau tigmáhetī suśévau sómārudrāv ihá sú mr̥ḍataṃ naḥ //5//

Verse: 6 
Halfverse: a    ávaiténārātsīr asau svā́hā /
Halfverse: c    tigmā́yudʰau tigmáhetī suśévau sómārudrāv ihá sú mr̥ḍataṃ naḥ //6//

Verse: 7 
Halfverse: a    ápaiténārātsīr asau svā́hā /
Halfverse: c    tigmā́yudʰau tigmáhetī suśévau sómārudrāv ihá sú mr̥ḍataṃ naḥ //7//

Verse: 8 
Halfverse: a    mumuktám asmā́n duritā́d avadyā́j juṣétʰām yajñám amŕ̥tam asmā́su dʰattam //8//

Verse: 9 
Halfverse: a    cákṣuṣo hete mánaso hete bráhmaṇo hete tápasaś ca hete /
Halfverse: c    menyā́ menír asy amenáyas té santu yé 'smā́m̐ abʰyagʰāyánti //9//

Verse: 10 
Halfverse: a    yò3 'smā́ṃś cákṣuṣā mánasā cíttyā́kūtyā ca yó agʰāyúr abʰidā́sāt /
Halfverse: c    tváṃ tā́n agne menyā́menī́n kr̥ṇu svā́hā //10//

Verse: 11 
Halfverse: a    índrasya gr̥hó 'si /
Halfverse: c    táṃ tvā prá padye táṃ tvā prá viśāmi sárvaguḥ sárvapūruṣaḥ sárvātmā sárvatanūḥ sahá yán mé 'sti téna //11//

Verse: 12 
Halfverse: a    índrasya śármāsi /
Halfverse: c    táṃ tvā prá padye táṃ tvā prá viśāmi sárvaguḥ sárvapūruṣaḥ sárvātmā sárvatanūḥ sahá yán mé 'sti téna //12//

Verse: 13 
Halfverse: a    índrasya vármāsi /
Halfverse: c    táṃ tvā prá padye táṃ tvā prá viśāmi sárvaguḥ sárvapūruṣaḥ sárvātmā sárvatanūḥ sahá yán mé 'sti téna //13//

Verse: 14 
Halfverse: a    índrasya várūtʰam asi /
Halfverse: c    táṃ tvā prá padye táṃ tvā prá viśāmi sárvaguḥ sárvapūruṣaḥ sárvātmā sárvatanūḥ sahá yán mé 'sti téna //14//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.