TITUS
Atharva-Veda-Samhita (Saunaka)
Part No. 147
Previous part

Hymn: 5 
Verse: 1 
Halfverse: a    rā́trī mātā́ nábʰaḥ pitā́ryamā́ te pitāmaháḥ /
Halfverse: c    silācī́ nā́ma vā́ asi sā́ devā́nām asi svásā //1//

Verse: 2 
Halfverse: a    yás tvā píbati jī́vati trā́yase púruṣaṃ tvám /
Halfverse: c    bʰartrī́ hí śáśvatām ási jánānāṃ ca nyáñcanī //2//

Verse: 3 
Halfverse: a    vr̥kṣáṃvr̥kṣam ā́ rohasi vr̥ṣaṇyántīva kanyálā /
Halfverse: c    jáyantī pratyātíṣṭʰantī spáraṇī nā́ma vā́ asi //3//

Verse: 4 
Halfverse: a    yád daṇḍéna yád íṣvā yád vā́rur hárasā kr̥tám /
Halfverse: c    tásya tvám asi níṣkr̥tiḥ sémáṃ níṣ kr̥dʰi pū́ruṣam //4//

Verse: 5 
Halfverse: a    bʰadrā́t plakṣā́n nís tiṣṭʰasy aśvattʰā́t kʰadirā́d dʰavā́t /
Halfverse: c    bʰadrā́n nyagródʰāt parṇā́t sā́ na éhy arundʰati //5//

Verse: 6 
Halfverse: a    híraṇyavarṇe súbʰage sū́ryavarṇe vápuṣṭame /
Halfverse: c    rutáṃ gacʰāsi niṣkr̥te níṣkr̥tir nā́ma vā́ asi //6//

Verse: 7 
Halfverse: a    híraṇyavarṇe súbʰage śúṣme lómaśavakṣane /
Halfverse: c    apā́m asi svásā lākṣe vā́to hātmā́ babʰūva te //7//

Verse: 8 
Halfverse: a    silācī́ nā́ma kānīnó 'jababʰru pitā́ táva /
Halfverse: c    áśvo yamásya yáḥ śyāvás tásya hāsnā́sy ukṣitā́ //8//

Verse: 9 
Halfverse: a    áśvasyāsnáḥ sáṃpatitā sā́ vr̥kṣā́m̐ abʰí siṣyade /
Halfverse: c    sarā́ patatriṇī bʰūtvā́ sā́ na éhy arundʰati //9//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.