TITUS
Atharva-Veda-Samhita (Saunaka)
Part No. 154
Previous part

Hymn: 12 
Verse: 1 
Halfverse: a    sámiddʰo adyá mánuṣo duroṇé devó devā́n yajasi jātavedaḥ /
Halfverse: c    ā́ ca váha mitramahaś cikitvā́n tváṃ dūtáḥ kavír asi prácetāḥ //1//

Verse: 2 
Halfverse: a    tánūnapāt patʰá r̥tásya yā́nān mádʰvā samañjánt svadayā sujihva /
Halfverse: c    mánmāni dʰībʰír utá yajñám r̥ndʰán devatrā́ ca kr̥ṇuhy adʰvarám naḥ //2//

Verse: 3 
Halfverse: a    ājúhvāna ī́ḍyo bándyaś cā́ yāhy agne vásubʰiḥ sajóṣāḥ /
Halfverse: c    tváṃ devā́nām asi yahva hótā sá enān yakṣīṣitó yájīyān //3//

Verse: 4 
Halfverse: a    prācī́naṃ barhíḥ pradíśā pr̥tʰivyā́ vástor asyā́ vr̥jyate ágre áhnām /
Halfverse: c    vy ù pratʰate vitaráṃ várīyo devébʰyo áditaye syonám //4//

Verse: 5 
Halfverse: a    vyácasvatīr urviyā́ ví śrayantāṃ pátibʰyo ná jánayaḥ śúmbʰamānāḥ /
Halfverse: c    dévīr dvāro br̥hatī́r viśvaminvā devébʰyo bʰavata suprāyaṇā́ḥ //5//

Verse: 6 
Halfverse: a    ā́ suṣváyantī yajaté upā́ke uṣā́sānáktā sadatāṃ ní yónau /
Halfverse: c    divyé yóṣaṇe br̥hatī́ surukmé ádʰi śríyaṃ śukrapíśaṃ dádʰāne //6//

Verse: 7 
Halfverse: a    daívyā hótārā pratʰamā́ suvā́cā mímānā yajñáṃ mánuṣo yájadʰyai /
Halfverse: c    pracodáyantā vidátʰeṣu kārū́ prācī́naṃ jyótiḥ pradíśā diśántā //7//

Verse: 8 
Halfverse: a    ā́ no yajñáṃ bʰā́ratī tū́yam etv íḍā manuṣvád ihá cetáyantī /
Halfverse: c    tisró devī́r barhír édáṃ syonáṃ sárasvatīḥ svápasaḥ sadantām //8//

Verse: 9 
Halfverse: a    yá imé dyā́vāpr̥tʰivī́ jánitrī rūpaír ápiṃśad bʰúvanāni víśvā /
Halfverse: c    tám adyá hotar iṣitó yájīyān deváṃ tváṣṭāram ihá yakṣi vidvā́n //9//

Verse: 10 
Halfverse: a    upā́vasr̥ja tmányā samañján devā́nāṃ pā́tʰa r̥tutʰā́ havī́ṃṣi /
Halfverse: c    vánaspátiḥ śamitā́ devó agníḥ svádantu havyáṃ mádʰunā gʰr̥téna //10//

Verse: 11 
Halfverse: a    sadyó jātó vy àmimīta yajñám agnír devā́nām abʰavat purogā́ḥ /
Halfverse: c    asyá hótuḥ praśíṣy r̥tásya vācí svā́hākr̥taṃ havír adantu devā́ḥ //11//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.