TITUS
Atharva-Veda-Samhita (Saunaka)
Part No. 153
Previous part

Hymn: 11 
Verse: 1 
Halfverse: a    katʰáṃ mahé ásurāyābravīr ihá katʰáṃ pitré háraye tveṣánr̥mṇaḥ /
Halfverse: c    pŕ̥śniṃ varuṇa dákṣiṇāṃ dadāvā́n púnarmagʰa tváṃ mánasācikitsīḥ //1//

Verse: 2 
Halfverse: a    ná kā́mena púnarmagʰo bʰavāmi sáṃ cakṣe káṃ pŕ̥śnim etā́m úpāje /
Halfverse: c    kéna nú tvám atʰarvan kā́vyena kéna jāténāsi jātávedāḥ //2//

Verse: 3 
Halfverse: a    satyám aháṃ gabʰīráḥ kā́vyena satyáṃ jāténāsmi jātávedāḥ /
Halfverse: c    ná me dāsó nā́ryo mahitvā́ vratáṃ mīmāya yád aháṃ dʰariṣyé //3//

Verse: 4 
Halfverse: a    ná tvád anyáḥ kavítaro ná medʰáyā dʰī́rataro varuṇa svadʰāvan /
Halfverse: c    tváṃ tā́ víśvā bʰúvanāni vettʰa sá cin nú tváj jáno māyī́ bibʰāya //4//

Verse: 5 
Halfverse: a    tváṃ hy àṅgá varuṇa svadʰāvan víśvā véttʰa jánima supraṇīte /
Halfverse: c    kíṃ rájasa enā́ paró anyád asty enā́ kíṃ páreṇā́varam amura //5//

Verse: 6 
Halfverse: a    ékaṃ rájasa enā́ paró anyád ásty enā́ pará ékena durṇáśaṃ cid arvā́k /
Halfverse: c    tát te vidvā́n varuṇa prá bravīmy adʰóvacasaḥ paṇáyo bʰavantu nīcaír dāsā́ úpa sarpantu bʰū́mim //6//

Verse: 7 
Halfverse: a    tváṃ hy àṅgá varuṇa brávīṣi púnarmagʰeṣv avadyā́ni bʰū́ri /
Halfverse: c    mó ṣú paṇī́m̐r abʰy etā́vato bʰūn mā́ tvā vocann arādʰásaṃ jánāsaḥ //7//

Verse: 8 
Halfverse: a    mā́ mā vocann arādʰásaṃ jánāsaḥ púnas te pŕ̥śniṃ jaritar dadāmi /
Halfverse: c    stotráṃ me víśvam ā́ yāhi śácībʰir antár víśvāsu mā́nuṣīṣu dikṣú //8//

Verse: 9 
Halfverse: a    ā́ te stotrā́ṇy údyatāni yantv antár víśvāsu mā́nuṣīṣu dikṣú /
Halfverse: c    dehí nú me yán me ádatto ási yújyo me saptápadaḥ sákʰāsi //9//

Verse: 10 
Halfverse: a    samā́ nau bándʰur varuṇa samā́ jā́ védāháṃ tád yán nāv eṣā́ samā́ jā́ /
Halfverse: c    dádāmi tád yát te ádatto ásmi yújyas te saptápadaḥ sákʰāsmi //10//

Verse: 11 
Halfverse: a    devó devā́ya gr̥ṇaté vayodʰā́ vípro víprāya stuvaté sumedʰā́ḥ /
Halfverse: c    ájījano hí varuṇa svadʰāvann átʰarvāṇaṃ pitáraṃ devábandʰum /
Halfverse: e    tásmā u rā́dʰaḥ kr̥ṇuhi supraśastáṃ sákʰā no asi paramáṃ ca bándʰuḥ //11//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.