TITUS
Atharva-Veda-Samhita (Saunaka)
Part No. 159
Previous part

Hymn: 17 
Verse: 1 
Halfverse: a    té 'vadán pratʰamā́ brahmakilbiṣé 'kūpāraḥ saliló mātariśvā /
Halfverse: c    vīḍúharās tápa ugráṃ mayobʰū́r ā́po devī́ḥ pratʰamajā́ r̥tásya //1//

Verse: 2 
Halfverse: a    sómo rā́jā pratʰamó brahmajāyā́ṃ púnaḥ prā́yacʰad áhr̥ṇīyamānaḥ /
Halfverse: c    anvartitā́ váruṇo mitrá āsīd agnír hótā hastagŕ̥hyā́ nināya //2//

Verse: 3 
Halfverse: a    hástenaivá grāhyà ādʰír asyā brahmajāyéti céd ávocat /
Halfverse: c    ná dūtā́ya prahéyā tastʰa eṣā́ tátʰā rāṣṭráṃ gupitáṃ kṣatríyasya //3//

Verse: 4 
Halfverse: a    yā́m āhús tā́rakaiṣā́ vikeśī́ti ducʰúnāṃ grā́mam avapádyamānām /
Halfverse: c    sā́ brahmajāyā́ ví dunoti rāṣṭráṃ yátra prā́pādi śaśá ulkuṣī́mān //4//

Verse: 5 
Halfverse: a    brahmacārī́ carati véviṣad víṣaḥ sá devā́nāṃ bʰavaty ékam áṅgam /
Halfverse: c    téna jāyā́m ánv avindad bŕ̥haspátiḥ sómena nītā́ṃ juhvà1ṃ ná devāḥ //5//

Verse: 6 
Halfverse: a    devā́ vā́ etásyām avadanta pū́rve saptar̥ṣáyas tápasā yé niṣedúḥ /
Halfverse: c    bʰīmā́ jāyā́ brāhmaṇásyā́panītā durdʰā́ṃ dadʰāti paramé vyòman //6//

Verse: 7 
Halfverse: a    yé gárbʰā avapádyante jágad yác cāpalupyáte /
Halfverse: c    vīrā́ yé tr̥hyánte mitʰó brahmajāyā́ hinasti tā́n //7//

Verse: 8 
Halfverse: a    utá yát pátayo dáśa striyā́ḥ pū́rve ábrāhmaṇāḥ /
Halfverse: c    brahmā́ ced dʰástam ágrahīt sá evá pátir ekadʰā́ //8//

Verse: 9 
Halfverse: a    brāhmaṇá evá pátir ná rājanyò3 ná vaíśyaḥ /
Halfverse: c    tát sū́ryaḥ prabruvánn eti pañcábʰyo mānavébʰyaḥ //9//

Verse: 10 
Halfverse: a    púnar vaí devā́ adaduḥ púnar manuṣyā̀ adaduḥ /
Halfverse: c    rā́jānaḥ satyáṃ gr̥hṇānā́ brahmajāyā́ṃ púnar daduḥ //10//

Verse: 11 
Halfverse: a    punardā́ya brahmajāyā́ṃ kr̥tvā́ devaír nikilbiṣám /
Halfverse: c    ū́rjaṃ pr̥tʰivyā́ bʰaktvórugāyám úpāsate //11//

Verse: 12 
Halfverse: a    nā́sya jāyā́ śatavāhī́ kalyāṇī́ tálpam ā́ śaye /
Halfverse: c    yásmin rāṣṭré nirudʰyáte brahmajāyā́cittyā //12//

Verse: 13 
Halfverse: a    ná vikarṇáḥ pr̥tʰúśirās tásmin véśmani jāyate /
Halfverse: c    yásmin rāṣṭré nirudʰyáte brahmajāyā́cittyā //13//

Verse: 14 
Halfverse: a    nā́sya kṣattā́ niṣkágrīvaḥ sūnā́nām ety agratáḥ /
Halfverse: c    yásmin rāṣṭré nirudʰyáte brahmajāyā́cittyā //14//

Verse: 15 
Halfverse: a    nā́sya śvetáḥ kr̥ṣṇakárṇo dʰurí yuktó mahīyate /
Halfverse: c    yásmin rāṣṭré nirudʰyáte brahmajāyā́cittyā //15//

Verse: 16 
Halfverse: a    nā́sya kṣétre puṣkaríṇī nāṇḍī́kaṃ jāyate bísam /
Halfverse: c    yásmin rāṣṭré nirudʰyáte brahmajāyā́cittyā //16//

Verse: 17 
Halfverse: a    nā́smai pŕ̥śniṃ ví duhanti yé 'syā dóham upā́sate /
Halfverse: c    yásmin rāṣṭré nirudʰyáte brahmajāyā́cittyā //17//

Verse: 18 
Halfverse: a    nā́sya dʰenúḥ kalyāṇī́ nā́naḍvā́nt sahate dʰúram /
Halfverse: c    víjānir yátra brahmaṇó rā́triṃ vásati pāpáyā //18//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.