TITUS
Atharva-Veda-Samhita (Saunaka)
Part No. 160
Previous part

Hymn: 18 
Verse: 1 
Halfverse: a    naítā́ṃ te devā́ adadus túbʰyaṃ nr̥pate áttave /
Halfverse: c    mā́ brāhmaṇásya rājanya gā́ṃ jigʰatso anādyā́m //1//

Verse: 2 
Halfverse: a    akṣádrugdʰo rājanyàḥ pāpá ātmaparājitáḥ /
Halfverse: c    sá brāhmaṇásya gā́m adyād adyá jīvā́ni mā́ śváḥ //2//

Verse: 3 
Halfverse: a    ā́viṣṭitāgʰáviṣā pr̥dākū́r iva cármaṇā /
Halfverse: c    sā́ brāhmaṇásya rājanya tr̥ṣṭaíṣā́ gaúr anādyā́ //3//

Verse: 4 
Halfverse: a    nír vaí kṣatráṃ náyati hanti várco 'gnír ivā́rabdʰo ví dunoti sárvam /
Halfverse: c    yó brāhmaṇáṃ mányate ánnam evá sá viṣásya pibati taimātásya //4//

Verse: 5 
Halfverse: a    yá enaṃ hánti mr̥dúṃ mányamāno devapīyúr dʰánakāmo ná cittā́t /
Halfverse: c    sáṃ tásyéndro hŕ̥daye 'gním indʰe ubʰé enaṃ dviṣṭo nábʰasī cárantam //5//

Verse: 6 
Halfverse: a    ná brāhmaṇó hiṃsitavyò3 'gníḥ priyátanor iva /
Halfverse: c    sómo hy àsya dāyādá índro asyābʰiśastipā́ḥ //6//

Verse: 7 
Halfverse: a    śatā́pāṣṭʰāṃ ní girati tā́ṃ ná śaknoti niḥkʰídam /
Halfverse: c    ánnaṃ yó brahmáṇām malváḥ svādv à1dmī́ti mányate //7//

Verse: 8 
Halfverse: a    jihvā́ jyā́ bʰávati kúlmalaṃ vā́ṅ nāḍīkā́ dántās tápasābʰídigdʰāḥ /
Halfverse: c    tébʰir brahmā́ vidʰyati devapīyū́n hr̥dbalaír dʰánurbʰir devájūtaiḥ //8//

Verse: 9 
Halfverse: a    tīkṣṇéṣavo brāhmaṇā́ hetimánto yā́m ásyanti śaravyā̀3ṃ ná sā́ mŕ̥ṣā /
Halfverse: c    anuhā́ya tápasā manyúnā cotá durā́d áva bʰindanty enam //9//

Verse: 10 
Halfverse: a    yé sahásram árājann ā́san daśaśatā́ utá /
Halfverse: c    té brāhmaṇásya gā́ṃ jagdʰvā́ vaitahavyā́ḥ párābʰavan //10//

Verse: 11 
Halfverse: a    gaúr evá tā́n hanyámānā vaitahavyā́m̐ ávātirat /
Halfverse: c    yé késaraprābandʰāyāś caramā́jām ápeciran //11//

Verse: 12 
Halfverse: a    ékaśataṃ tā́ janátā yā́ bʰū́mir vyàdʰūnuta /
Halfverse: c    prajā́ṃ hiṃsitvā́ brā́hmaṇīm asaṃbʰavyáṃ párābʰavan //12//

Verse: 13 
Halfverse: a    devapīyúś carati mártyeṣu garagīrṇó bʰavaty ástʰibʰūyān /
Halfverse: c    yó brāhmaṇáṃ devábandʰuṃ hinásti ná sá pitr̥yā́ṇam ápy eti lokám //13//

Verse: 14 
Halfverse: a    agnír vaí naḥ padavāyáḥ sómo dāyādá ucyate /
Halfverse: c    hantā́bʰíśasténdras tátʰā tád vedʰáso viduḥ //14//

Verse: 15 
Halfverse: a    íṣur iva digdʰā́ nr̥pate pr̥dākū́r iva gopate /
Halfverse: c    sā́ brāhmaṇásyéṣur gʰorā́ táyā vidʰyati pī́yataḥ //15//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.