TITUS
Atharva-Veda-Samhita (Saunaka)
Part No. 161
Previous part

Hymn: 19 
Verse: 1 
Halfverse: a    atimātrám avardʰanta nód iva dívam aspr̥śan /
Halfverse: c    bʰŕ̥guṃ hiṃsitvā́ sŕ̥ñjayā vaitahavyā́ḥ párābʰavan //1//

Verse: 2 
Halfverse: a    yé br̥hátsāmānam āṅgirasám ā́rpayan brāhmaṇáṃ jánāḥ /
Halfverse: c    pétvas téṣām ubʰayā́dam ávis tokā́ny āvayat //2//

Verse: 3 
Halfverse: a    yé brāhmaṇáṃ pratyáṣṭʰīvan yé vāsmiñ cʰulkám īṣiré /
Halfverse: c    asnás te mádʰye kulyā́yāḥ kéśān kʰā́danta āsate //3//

Verse: 4 
Halfverse: a    brahmagavī́ pacyámānā yā́vat sā́bʰí vijáṅgahe /
Halfverse: c    téjo rāṣṭrásya nír hanti ná vīró jāyate vŕ̥ṣā //4//

Verse: 5 
Halfverse: a    krūrám asyā āśásanaṃ tr̥ṣṭáṃ piśitám asyate /
Halfverse: c    kṣīráṃ yád asyāḥ pīyáte tád vaí pitŕ̥ṣu kílbiṣam //5//

Verse: 6 
Halfverse: a    ugró rā́jā mányamāno brāhmaṇáṃ yó jígʰatsati /
Halfverse: c    párā tát sicyate rāṣṭráṃ brāhmaṇó yátra jīyáte //6//

Verse: 7 
Halfverse: a    aṣṭā́padī caturakṣī́ cátuḥśrotrā cáturhanuḥ /
Halfverse: c    dvyā̀syā dvíjihvā bʰūtvā́ sā́ rāṣṭrám áva dʰūnute brahmajyásya //7//

Verse: 8 
Halfverse: a    tád vaí rāṣṭrám ā́ sravati nā́vaṃ bʰinnā́m ivodakám /
Halfverse: c    brahmā́ṇaṃ yátra híṃsanti tád rāṣṭráṃ hanti ducʰúnā //8//

Verse: 9 
Halfverse: a    táṃ vr̥kṣā́ ápa sedʰanti cʰāyā́ṃ no mópa gā íti /
Halfverse: c    yó brāhmaṇásya sád dʰánam abʰí nārada mányate //9//

Verse: 10 
Halfverse: a    viṣám etád devákr̥taṃ rā́jā váruṇo 'bravīt /
Halfverse: c    ná brāhmaṇásya gā́ṃ jagdʰvā́ rāstré jāgāra káś caná //10//

Verse: 11 
Halfverse: a    návaivá tā́ navatáyo yā́ bʰū́mir vyàdʰūnuta /
Halfverse: c    prajā́ṃ hiṃsitvā́ brā́hmaṇīm asaṃbʰavyáṃ párābʰavan //11//

Verse: 12 
Halfverse: a    yā́m mr̥tā́yānubadʰnánti kūdyàṃ padayópanīm /
Halfverse: c    tád vaí brahmajya te devā́ upastáraṇam abruvan //12//

Verse: 13 
Halfverse: a    áśrūṇi kŕ̥pamānasya yā́ni jītásya vāvr̥túḥ /
Halfverse: c    táṃ vaí brahmajya te devā́ apā́ṃ bʰāgám adʰārayan //13//

Verse: 14 
Halfverse: a    yéna mr̥táṃ snapáyanti śmáśrūṇi yénondáte /
Halfverse: c    táṃ vaí brahmajya te devā́ apā́ṃ bʰāgám adʰārayan //14//

Verse: 15 
Halfverse: a    ná varṣáṃ maitrāvaruṇáṃ brahmajyám abʰí varṣati /
Halfverse: c    nā́smai sámitiḥ kalpate ná mitráṃ nayate váśam //15//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.