TITUS
Atharva-Veda-Samhita (Saunaka)
Part No. 162
Previous part

Hymn: 20 
Verse: 1 
Halfverse: a    uccaírgʰoṣo dundubʰíḥ satvanāyán vānaspatyáḥ sáṃbʰr̥ta usr̥íyābʰiḥ /
Halfverse: c    vā́caṃ kṣuṇuvānó damáyant sapátnānt siṃhá iva jeṣyánn abʰí taṃstanīhi //1//

Verse: 2 
Halfverse: a    siṃhá ivāstānīd druváyo víbaddʰo 'bʰikrándann r̥ṣabʰó vāsitā́m iva /
Halfverse: c    vŕ̥ṣā tváṃ vádʰrayas te sapátnā aindrás te śúṣmo abʰimātiṣāháḥ //2//

Verse: 3 
Halfverse: a    vŕ̥ṣeva yūtʰé sáhasā vidānó gavyánn abʰí ruva saṃdʰanājit /
Halfverse: c    śucā́ vidʰya hŕ̥dayaṃ páreṣāṃ hitvā́ grā́mān prácyutā yantu śátravaḥ //3//

Verse: 4 
Halfverse: a    saṃjáyan pŕ̥tanā ūrdʰvámāyur gŕ̥hyā gr̥hṇānó bahudʰā́ ví cakṣva /
Halfverse: c    daívīṃ vā́caṃ dundubʰa ā́ gurasva vedʰā́ḥ śátrūṇām úpa bʰarasva védaḥ //4//

Verse: 5 
Halfverse: a    dundubʰér vā́caṃ práyatāṃ vádantīm āśr̥ṇvatī́ nātʰitā́ gʰóṣabuddʰā /
Halfverse: c    nā́rī putráṃ dʰāvatu hastagŕ̥hyāmitrī́ bʰītā́ samaré vadʰā́nām //5//

Verse: 6 
Halfverse: a    pū́rvo dundubʰe prá vadāsi vā́caṃ bʰū́myāḥ pr̥ṣṭʰé vada rócamānaḥ /
Halfverse: c    amitrasenā́m abʰijáñjabʰāno dyumád vada dundubʰe sūnŕ̥tāvat //6//

Verse: 7 
Halfverse: a    antarémé nábʰasī gʰóṣo astu pŕ̥tʰak te dʰvanáyo yantu śī́bʰam /
Halfverse: c    abʰí kranda stanáyotpípānaḥ ślokakŕ̥n mitratū́ryāya svardʰī́ //7//

Verse: 8 
Halfverse: a    dʰībʰíḥ kr̥táḥ prá vadāti vā́cam úd dʰarṣaya sátvanām ā́yudʰāni /
Halfverse: c    índramedī sátvano ní hvayasva mitraír amítrām̐ áva jaṅgʰanīhi //8//

Verse: 9 
Halfverse: a    saṃkrándanaḥ pravadó dʰr̥ṣṇúṣeṇaḥ pravedakŕ̥d bahudʰā́ grāmagʰoṣī́ /
Halfverse: c    śríyo vanvanó vayúnāni vidvā́n kīrtím bahúbʰyo ví hara dvirājé //9//

Verse: 10 
Halfverse: a    śréyaḥketo vasujít sáhīyānt saṃgrāmajít sáṃśito bráhmaṇāsi /
Halfverse: c    aṃśū́n iva grā́vādʰiṣávaṇe ádrir gavyán dundubʰé'dʰi nr̥tya védaḥ //10//

Verse: 11 
Halfverse: a    śátrūṣāṇ nīṣā́d abʰimātiṣāhó gavéṣaṇaḥ sáhamāna udbʰít /
Halfverse: c    vāgvī́va mántraṃ prá bʰarasva vā́cam sā́ṃgrāmajityāyéṣam úd vadehá //11//

Verse: 12 
Halfverse: a    acyutacyút samádo gámiṣṭʰo mŕ̥dʰo jétā puraetā́yodʰyáḥ /
Halfverse: c    índreṇa guptó vidátʰā nicikyad dʰr̥ddyótano dviṣatā́ṃ yāhi śī́bʰam //12//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.