TITUS
Atharva-Veda-Samhita (Saunaka)
Part No. 164
Previous part

Hymn: 22 
Verse: 1 
Halfverse: a    agnís takmā́nam ápa bādʰatām itáḥ sómo grā́vā váruṇaḥ pūtádakṣāḥ /
Halfverse: c    védir barhíḥ samídʰaḥ śóśucānā ápa dvéṣāṃsy amuyā́ bʰavantu //1//

Verse: 2 
Halfverse: a    ayáṃ yó víśvān háritān kr̥ṇóṣy uccʰocáyann agnír ivābʰidunván /
Halfverse: c    ádʰā hí takmann arasó hí bʰūyā́ ádʰā nyàṅṅ adʰarā́n vā párehi //2//

Verse: 3 
Halfverse: a    yáḥ paruṣáḥ pāruṣeyó 'vadʰvaṃsá ivāruṇáḥ /
Halfverse: c    takmā́naṃ viśvadʰāvīryādʰarā́ñcaṃ párā suvā //3//

Verse: 4 
Halfverse: a    adʰarā́ñcam prá hiṇomí námaḥ kr̥tvā́ takmáne /
Halfverse: c    śakambʰarásya muṣṭihā́ púnar etu mahāvr̥ṣā́n //4//

Verse: 5 
Halfverse: a    óko asya mū́javanta óko asya mahāvr̥ṣā́ḥ /
Halfverse: c    yā́vaj jātás takmaṃs tā́vān asi bálhikeṣu nyocaráḥ //5//

Verse: 6 
Halfverse: a    tákman vyā̀la ví gada vyàṅga bʰū́ri yāvaya /
Halfverse: c    dāsī́ṃ niṣṭákvarīm icʰa tā́m vájreṇa sám arpaya //6//

Verse: 7 
Halfverse: a    tákman mū́javato gacʰa bálhikān vā parastarā́m /
Halfverse: c    śūdrā́m icʰa prapʰarvyà1ṃ tā́ṃ takman vī́va dʰūnuhi //7//

Verse: 8 
Halfverse: a    mahāvr̥ṣā́n mū́javato bándʰv addʰi parétya /
Halfverse: c    praítā́ni takmáne brūmo anyakṣetrā́ṇi vā́ imā́ //8//

Verse: 9 
Halfverse: a    anyakṣetré ná ramase vaśī́ sán mr̥ḍayāsi naḥ /
Halfverse: c    ábʰūd u prā́rtʰas takmā́ sá gamiṣyati bálhikān //9//

Verse: 10 
Halfverse: a    yát tváṃ śītó 'tʰo rūráḥ sahá kāsā́vepayaḥ /
Halfverse: c    bʰīmā́s te takman hetáyas tā́bʰiḥ sma pári vr̥ṅgdʰi naḥ //10//

Verse: 11 
Halfverse: a    mā́ smaitā́nt sákʰīn kurutʰā balā́saṃ kāsám udyugám /
Halfverse: c    mā́ smā́to'rvā́ṅ aíḥ púnas tát tvā takmann úpa bruve //11//

Verse: 12 
Halfverse: a    tákman bʰrā́trā balā́sena svásrā kā́sikayā sahá /
Halfverse: c    pāpmā́ bʰrā́tr̥vyeṇa sahá gácʰāmúm áraṇaṃ jánam //12//

Verse: 13 
Halfverse: a    tŕ̥tīyakaṃ vitr̥tīyáṃ sadandím utá śāradám /
Halfverse: c    takmā́naṃ śītáṃ rūráṃ graíṣmaṃ nāśaya vā́rṣikam //13//

Verse: 14 
Halfverse: a    gandʰā́ribʰyo mū́javadbʰyó 'ṅgebʰyo magádʰebʰyaḥ /
Halfverse: c    praiṣyán jánam iva śevadʰíṃ takmā́naṃ pári dadmasi //14//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.