TITUS
Atharva-Veda-Samhita (Saunaka)
Part No. 167
Previous part

Hymn: 25 
Verse: 1 
Halfverse: a    párvatād divó yóner áṅgādaṅgāt samā́bʰr̥tam /
Halfverse: c    śépo gárbʰasya retodʰā́ḥ sárau parṇám ivā́ dadʰat //1//

Verse: 2 
Halfverse: a    yátʰeyáṃ pr̥tʰivī́ mahī́ bʰūtā́nāṃ gárbʰam ādadʰé /
Halfverse: c    evā́ dadʰāmi te gárbʰaṃ tásmai tvā́m ávase huve //2//

Verse: 3 
Halfverse: a    gárbʰaṃ dʰehi sinīvāli gárbʰaṃ dʰehi sarasvati /
Halfverse: c    gárbʰaṃ te aśvínobʰā́ dʰattāṃ púṣkarasrajā //3//

Verse: 4 
Halfverse: a    gárbʰaṃ te mitrā́váruṇau gárbʰam devó bŕ̥haspátiḥ /
Halfverse: c    gárbʰaṃ ta índraś cāgníś ca gárbʰaṃ dʰātā́ dadʰātu te //4//

Verse: 5 
Halfverse: a    víṣṇur yóniṃ kalpayatu tváṣṭā rūpā́ṇi piṃśatu /
Halfverse: c    ā́ siñcatu prajā́patir dʰātā́ gárbʰaṃ dadʰātu te //5//

Verse: 6 
Halfverse: a    yád véda rā́jā váruṇo yád vā devī́ sárasvatī /
Halfverse: c    yád índro vr̥trahā́ véda tád garbʰakáraṇaṃ piba //6//

Verse: 7 
Halfverse: a    gárbʰo asy óṣadʰīnāṃ gárbʰo vánaspátīnām /
Halfverse: c    gárbʰo víśvasya bʰūtásya só agne gárbʰam éhá dʰāḥ //7//

Verse: 8 
Halfverse: a    ádʰi skanda vīráyasva gárbʰam ā́ dʰehi yónyām /
Halfverse: c    vŕ̥ṣāsi vr̥ṣṇyāvan prajā́yai tvā́ nayāmasi //8//

Verse: 9 
Halfverse: a    ví jihīṣva bārhatsāme gárbʰas te yónim ā́ śayām /
Halfverse: c    áduṣ ṭe devā́ḥ putráṃ somapā́ ubʰayāvínam //9//

Verse: 10 
Halfverse: a    dʰā́taḥ śréṣṭʰena rūpéṇāsyā́ nā́ryā gavīnyóḥ /
Halfverse: c    púmāṃsaṃ putrám ā́ dʰehi daśamé māsí sū́tave //10//

Verse: 11 
Halfverse: a    tváṣṭaḥ śréṣṭʰena rūpéṇāsyā́ nā́ryā gavīnyóḥ /
Halfverse: c    púmāṃsaṃ putrám ā́ dʰehi daśamé māsí sū́tave //11//

Verse: 12 
Halfverse: a    sávitaḥ śréṣṭʰena rūpéṇāsyā́ nā́ryā gavīnyóḥ /
Halfverse: c    púmāṃsaṃ putrám ā́ dʰehi daśamé māsí sū́tave //12//

Verse: 13 
Halfverse: a    prájāpate śréṣṭʰena rūpéṇāsyā́ nā́ryā gavīnyóḥ /
Halfverse: c    púmāṃsaṃ putrám ā́ dʰehi daśamé māsí sū́tave //13//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.