TITUS
Atharva-Veda-Samhita (Saunaka)
Part No. 168
Previous part

Hymn: 26 
Verse: 1 
Halfverse: a    yájūṃṣi yajñé samídʰaḥ svā́hāgníḥ pravidvā́n ihá vo yunaktu //1//

Verse: 2 
Halfverse: a    yunáktu deváḥ savitā́ prajānánn asmín yajñé mahiṣáḥ svā́hā //2//

Verse: 3 
Halfverse: a    índra uktʰāmadā́ny asmín yajñé pravidvā́n yunaktu suyújaḥ svā́hā //3//

Verse: 4 
Halfverse: a    praiṣā́ yajñé nivídaḥ svā́hā śiṣṭā́ḥ pátnībʰir vahatehá yuktā́ḥ //4//

Verse: 5 
Halfverse: a    cʰándāṃsi yajñé marutaḥ svā́hā mātéva putráṃ pipr̥tehá yuktā́ḥ //5//

Verse: 6 
Halfverse: a    éyám agan barhíṣā prókṣaṇībʰir yajñáṃ tanvānā́ditiḥ svā́hā //6//

Verse: 7 
Halfverse: a    víṣṇur yunaktu bahudʰā́ tápāṃsy asmín yajñé suyújaḥ svā́hā //7//

Verse: 8 
Halfverse: a    tváṣṭā yunaktu bahudʰā́ nú rūpā́ asmín yajñé yunaktu suyújaḥ svā́hā //8//

Verse: 9 
Halfverse: a    bʰágo yunaktvāśíṣo nv àsmā́ asmín yajñé pravidvā́n yunaktu suyújaḥ svā́hā //9//

Verse: 10 
Halfverse: a    sómo yunaktu bahudʰā́ páyāṃsy asmín yajñé suyújaḥ svā́hā //10//

Verse: 11 
Halfverse: a    índro yunaktu bahudʰā́ páyāṃsy asmín yajñé suyújaḥ svā́hā //11//

Verse: 12 
Halfverse: a    áśvinā bráhmaṇā́ yātam arvā́ñcau vaṣaṭkāréṇa yajñáṃ vardʰáyantau /
Halfverse: c    bŕ̥haspate bráhmaṇā́ yāhy arvā́ṅ yajñó ayáṃ svàr idáṃ yájamānāya svā́hā //12//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.