TITUS
Atharva-Veda-Samhita (Saunaka)
Part No. 169
Previous part

Hymn: 27 
Verse: 1 
Halfverse: a    ūrdʰvā́ asya samídʰo bʰavanty ūrdʰvā́ śukrā́ śocī́ṣy agnéḥ /
Halfverse: c    dyumáttamā suprátīkaḥ sásūnus tánūnápād ásuro bʰū́ripāṇiḥ //1//

Verse: 2 
Halfverse: a    devó devéṣu deváḥ patʰó anakti mádʰvā gʰr̥téna //2//

Verse: 3 
Halfverse: a    mádʰvā yajñám nakṣati praiṇānó nárāśáṃso agníḥ sukŕ̥d deváḥ savitā́ viśvávāraḥ //3//

Verse: 4 
Halfverse: a    ácʰāyám eti śávasā gʰr̥tā́ cid ī́dāno váhnir námasā //4//

Verse: 5 
Halfverse: a    agníḥ srúco adʰvaréṣu prayákṣu sá yakṣad asya mahimā́nam agnéḥ //5//

Verse: 6 
Halfverse: a    tarī́ mandrā́su prayákṣu vásavaś cā́tiṣṭʰan vasudʰā́taraś ca //6//

Verse: 7 
Halfverse: a    dvā́ro devī́r ánv asya víśve vratáṃ rakṣanti viśváhā //7//

Verse: 8 
Halfverse: a    uruvyácasāgnér dʰā́mnā pátyamāne /
Halfverse: c    ā́ suṣváyantī yajaté upā́ke uṣā́sānáktémáṃ yajñám avatām adʰvarám naḥ //8//

Verse: 9 
Halfverse: a    daívā hótāra ūrdʰvám adʰvaráṃ no 'gnér jihváyābʰí gr̥nata gr̥nátā naḥ svìṣṭaye /
Halfverse: c    tisró devī́r barhír édáṃ sadantām íḍā sárasvatī mahī́ bʰā́ratī gr̥ṇānā́ //9//

Verse: 10 
Halfverse: a    tán nas turī́pam ádbʰutaṃ purukṣú /
Halfverse: c    déva tvaṣṭā rāyás poṣaṃ ví ṣya nā́bʰim asya //10//

Verse: 11 
Halfverse: a    vánaspaté 'va sr̥jā rárāṇaḥ /
Halfverse: c    tmánā devébʰyo agnír havyáṃ śamitā́ svadayatu //11//

Verse: 12 
Halfverse: a    agne svā́hā kr̥ṇuhi jātavedaḥ /
Halfverse: c    índrāya yajñáṃ víśve devā́ havír idáṃ juṣantām //12//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.