TITUS
Atharva-Veda-Samhita (Saunaka)
Part No. 170
Previous part

Hymn: 28 
Verse: 1 
Halfverse: a    náva prāṇā́n navábʰiḥ sáṃ mimīte dīrgʰāyutvā́ya śatáśāradāya /
Halfverse: c    hárite trī́ṇi rajaté trī́ṇy áyasi trī́ṇi tápasā́viṣṭʰitāni //1//

Verse: 2 
Halfverse: a    agníḥ sū́ryaś candrámā bʰū́mir ā́po dyaúr antárikṣaṃ pradíśo díśaś ca /
Halfverse: c    ārtavā́ r̥túbʰiḥ saṃvidānā́ anéna mā trivŕ̥tā pārayantu //2//

Verse: 3 
Halfverse: a    tráyaḥ póṣas trivŕ̥ti śrayantām anáktu pūṣā́ páyasā gʰr̥téna /
Halfverse: c    ánnasya bʰūmā́ púruṣasya bʰūmā́ bʰūmā́ paśūnā́ṃ ta ihá śrayantām //3//

Verse: 4 
Halfverse: a    imám ādityā vásunā sám ukṣatemám agne vardʰaya vavr̥dʰānáḥ /
Halfverse: c    imám indra sáṃ sr̥ja vīryèṇāsmín trivŕ̥c cʰrayatāṃ poṣayiṣṇú //4//

Verse: 5 
Halfverse: a    bʰū́miṣ ṭvā pātu háritena viśvabʰŕ̥d agníḥ pipartv áyasā sajóṣāḥ /
Halfverse: c    vīrúdbʰiṣ ṭe árjunaṃ saṃvidānáṃ dákṣaṃ dadʰātu sumanasyámānam //5//

Verse: 6 
Halfverse: a    tredʰā́ jātám jánmanedáṃ híraṇyam agnér ékaṃ priyátamaṃ babʰūva sómasyaíkaṃ hiṃsitásya párāpatat /
Halfverse: c    apā́m ékaṃ vedʰásāṃ réta āhus tát te híraṇyaṃ trivŕ̥d astv ā́yuṣe //6//

Verse: 7 
Halfverse: a    tryāyuṣáṃ jamádagneḥ kaśyápasya tryāyuṣám /
Halfverse: c    tredʰā́mŕ̥tasya cákṣaṇaṃ trī́ṇy ā́yūṃṣi te 'karam //7//

Verse: 8 
Halfverse: a    tráyaḥ suparṇā́s trivŕ̥tā yád ā́yann ekākṣarám abʰisaṃbʰū́ya śakrā́ḥ /
Halfverse: c    práty auhan mr̥tyúm amŕ̥tena sākám antardádʰānā duritā́ni víśvā //8//

Verse: 9 
Halfverse: a    divás tvā pātu háritaṃ mádʰyāt tvā pātv árjunam /
Halfverse: c    bʰū́myā ayasmáyaṃ pātu prā́gād devapurā́ ayám //9//

Verse: 10 
Halfverse: a    imā́s tisró devapurā́s tā́s tvā rakṣantu sarvátaḥ /
Halfverse: c    tā́s tváṃ bíbʰrad varcasvy úttaro dviṣatā́ṃ bʰava //10//

Verse: 11 
Halfverse: a    púraṃ devā́nām amŕ̥taṃ híraṇyam yá ābedʰé pratʰamó devó ágre /
Halfverse: c    tásmai námo dáśa prā́cīḥ kr̥ṇomy ánu manyatāṃ trivŕ̥d ābádʰe me //11//

Verse: 12 
Halfverse: a    ā́ tvā cr̥tatv aryamā́ pūṣā́ bŕ̥haspátiḥ /
Halfverse: c    áharjātasya yán nā́ma téna tvā́ti cr̥tāmasi //12//

Verse: 13 
Halfverse: a    r̥túbʰiṣ ṭvārtavaír ā́yuṣe várcase tvā /
Halfverse: c    saṃvatsarásya téjasā téna sáṁhanu kr̥ṇmasi //13//

Verse: 14 
Halfverse: a    gʰr̥tā́d úlluptam mádʰunā sámaktaṃ bʰūmidr̥ṃhám ácyutam pārayiṣṇú /
Halfverse: c    bʰindát sapátnān ádʰarāṃś ca kr̥ṇvád ā́ mā roha mahaté saúbʰagāya //14//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.