TITUS
Atharva-Veda-Samhita (Saunaka)
Part No. 171
Previous part

Hymn: 29 
Verse: 1 
Halfverse: a    purástād yuktó vaha jātavedó 'gne viddʰí kriyámāṇam yátʰedám /
Halfverse: c    tváṃ bʰiṣág bʰeṣajásyāsi kartā́ tváyā gā́m áśvaṃ púruṣaṃ sanema //1//

Verse: 2 
Halfverse: a    tátʰā tád agne kr̥ṇu jātavedo víśvebʰir devaíḥ sahá saṃvidānáḥ /
Halfverse: c    yó no didéva yatamó jagʰā́sa yátʰā só asyá paridʰíṣ pátāti //2//

Verse: 3 
Halfverse: a    yátʰā só asyá paridʰíṣ pátāti tátʰā tád agne kr̥ṇu jātavedaḥ /
Halfverse: c    víśvebʰir devaír sahá saṃvidānáḥ //3//

Verse: 4 
Halfverse: a    akṣyaù3 ní vidʰya hŕ̥dayaṃ ní vidʰya jihvā́ṃ ní tr̥nddʰi prá dató mr̥ṇīhi /
Halfverse: c    piśācó asyá yatamó jagʰā́sā́gne yaviṣṭʰa práti śr̥ṇīhi //4//

Verse: 5 
Halfverse: a    yád asya hr̥táṃ víhr̥taṃ yát párābʰr̥tam ātmáno jagdʰáṃ yatamát piśācaíḥ /
Halfverse: c    tád agne vidvā́n púnar ā́ bʰara tváṃ śárīre māṃsám ásum érayāmaḥ //5//

Verse: 6 
Halfverse: a    āmé súpakve śabále vípakve yó mā piśācó áśane dadámbʰa /
Halfverse: c    tád ātmánā prajáyā piśācā́ ví yātayantām agadó 'yám astu //6//

Verse: 7 
Halfverse: a    kṣiré mā mantʰé yatamó dadámbʰākr̥ṣṭapacyé áśane dʰānyè3 yáḥ /
Halfverse: c    tád ātmánā prajáyā piśācā́ ví yātayantām agadó 'yám astu //7//

Verse: 8 
Halfverse: a    apā́ṃ mā pā́ne yatamó dadámbʰa kravyā́d yātūnā́m śáyane śáyānam /
Halfverse: c    tád ātmánā prajáyā piśācā́ ví yātayantām agadó 'yám astu //8//

Verse: 9 
Halfverse: a    dívā mā náktaṃ yatamó dadámbʰa kravyā́d yātūnā́m śáyane śáyānam /
Halfverse: c    tád ātmánā prajáyā piśācā́ ví yātayantām agadó 'yám astu //9//

Verse: 10 
Halfverse: a    kravyā́dam agne rudʰiráṃ piśācáṃ manohánaṃ jahi jātavedaḥ /
Halfverse: c    tám índro vājī́ vájreṇa hantu cʰináttu sómaḥ śíro asya dʰr̥ṣṇúḥ //10//

Verse: 11 
Halfverse: a    sanā́d agne mr̥ṇasi yātudʰā́nān ná tvā rákṣāṃsi pŕ̥tanāsu jigyuḥ /
Halfverse: c    sahámūrān ánu daha kravyā́do mā́ te hetyā́ mukṣata daívyāyāḥ //11//

Verse: 12 
Halfverse: a    samā́hara jātavedo yád dʰr̥táṃ yát párābʰr̥tam /
Halfverse: c    gā́trāṇy asya vardʰantām aṃśúr ivā́ pyāyatām ayám //12//

Verse: 13 
Halfverse: a    sómasyeva jātavedo aṃśúr ā́ pyāyatām ayám /
Halfverse: c    ágne virapśínaṃ médʰyam ayakṣmáṃ kr̥ṇu jī́vatu //13//

Verse: 14 
Halfverse: a    etā́s te agne samídʰaḥ piśācajámbʰanīḥ /
Halfverse: c    tā́s tváṃ juṣasva práti cainā gr̥hāṇa jātavedaḥ //14//

Verse: 15 
Halfverse: a    tārṣṭāgʰī́r agne samídʰaḥ práti gr̥hṇāhy arcíṣā /
Halfverse: c    jáhātu kravyā́d rūpáṃ yó asya māṃsáṃ jíhīrṣati //15//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.