TITUS
Atharva-Veda-Samhita (Saunaka)
Part No. 172
Previous part

Hymn: 30 
Verse: 1 
Halfverse: a    āvátas ta āvátaḥ parāvátas ta āvátaḥ /
Halfverse: c    ihaívá bʰava mā́ nú gā mā́ pū́rvān ánu gāḥ pitŕ̥̄n ásuṃ badʰnāmi te dr̥ḍʰám //1//

Verse: 2 
Halfverse: a    yát tvābʰicerúḥ púruṣaḥ svó yád áraṇo jánaḥ /
Halfverse: c    unmocanapramocané ubʰé vācā́ vadāmi te //2//

Verse: 3 
Halfverse: a    yád dudróhitʰa śepiṣé striyaí puṃsé ácittyā /
Halfverse: c    unmocanapramocané ubʰé vācā́ vadāmi te //3//

Verse: 4 
Halfverse: a    yát énaso mātŕ̥kr̥tāc cʰéṣe pitŕ̥kr̥tāc ca yát /
Halfverse: c    unmocanapramocané ubʰé vācā́ vadāmi te //4//

Verse: 5 
Halfverse: a    yát te mātā́ yát te pitā́ jamír bʰrā́tā ca sárjataḥ /
Halfverse: c    pratyák sevasva bʰeṣajáṃ jarádaṣṭiṃ kr̥ṇomi tvā //5//

Verse: 6 
Halfverse: a    ihaídʰi puruṣa sárveṇa mánasā sahá /
Halfverse: c    dūtaú yamásya mā́nu gā ádʰi jīvapurā́ ihi //6//

Verse: 7 
Halfverse: a    ánuhūtaḥ púnar éhi vidvā́n udáyanaṃ patʰáḥ /
Halfverse: c    āróhaṇam ākrámaṇaṃ jī́vatojīvató 'yanam //7//

Verse: 8 
Halfverse: a    mā́ bibʰer ná mariṣyasi jarádaṣṭiṃ kr̥ṇomi tvā /
Halfverse: c    nír avocam aháṃ yákṣmam áṅgebʰyo aṅgajvaráṃ táva //8//

Verse: 9 
Halfverse: a    aṅgabʰedó aṅgajvaró yáś ca te hr̥dayāmayáḥ /
Halfverse: c    yákṣmaḥ śyená iva prā́paptad vacā́ sāḍʰáḥ parastarā́m //9//

Verse: 10 
Halfverse: a    ŕ̥ṣī bodʰapratībodʰā́v asvapnó yáś ca jā́gr̥viḥ /
Halfverse: c    taú te prāṇásya goptā́rau dívā náktaṃ ca jāgr̥tām //10//

Verse: 11 
Halfverse: a    ayám agnír upasádya ihá sū́rya úd etu te /
Halfverse: c    udéhi mr̥tyór gambʰīrā́t kr̥ṣṇā́c cit támasas pári //11//

Verse: 12 
Halfverse: a    námo yamā́ya námo astu mr̥tyáve námaḥ pitŕ̥bʰya utá yé náyanti /
Halfverse: c    utpā́raṇasya yó véda tám agníṃ puró dadʰe 'smā́ ariṣṭátātaye //12//

Verse: 13 
Halfverse: a    aítu prāṇá aítu mána aítu cákṣur átʰo bálam /
Halfverse: c    śárīram asya sám vidāṃ tát padbʰyā́ṃ práti tiṣṭʰatu //13//

Verse: 14 
Halfverse: a    prāṇénāgne cákṣuṣā sáṃ sr̥jemáṃ sám īraya tanvā̀3 sáṃ bálena /
Halfverse: c    véttʰāmŕ̥tasya mā́ nú gān mā́ nú bʰū́migr̥ho bʰuvat //14//

Verse: 15 
Halfverse: a    mā́ te prāṇá úpa dasan mó apānó 'pi dʰāyi te /
Halfverse: c    sū́ryas tvā́dʰipatir mr̥tyór udā́yacʰatu raśmíbʰiḥ //15//

Verse: 16 
Halfverse: a    ivám antár vadati jihvā́ baddʰā́ paniṣpadā́ /
Halfverse: c    tváyā yákṣmam nír avocaṃ śatáṃ rópīś ca takmánaḥ //16//

Verse: 17 
Halfverse: a    ayáṃ lokáḥ priyátamo devā́nām áparājitaḥ /
Halfverse: c    yásmai tvám ihá mr̥tyáve diṣṭáḥ puruṣa jajñiṣé /
Halfverse: e    sá ca tvā́nu hvayāmasi mā́ purā́ jaráso mr̥tʰāḥ //17//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.