TITUS
Atharva-Veda-Samhita (Saunaka)
Part No. 306
Previous part

Hymn: 133 
Verse: 1 
Halfverse: a    yá imā́ṃ devó mékʰalām ābabándʰa yáḥ saṃnanā́ha yá u no yuyója /
Halfverse: c    yásya devásya praśíṣā cárāmaḥ sá pārám icʰāt sá u no ví muñcāt //1//

Verse: 2 
Halfverse: a    ā́hutāsy abʰíhuta ŕ̥ṣīṇām asy ā́yudʰam /
Halfverse: c    pū́rvā vratásya prāśnatī́ vīragʰnī́ bʰava mekʰale //2//

Verse: 3 
Halfverse: a    mr̥tyór aháṃ brahmacārī́ yád ásmi niryā́can bʰūtā́t púruṣaṃ yamā́ya /
Halfverse: c    tám aháṃ bráhmaṇā tápasā śrámeṇānáyainaṃ mékʰalayā sināmi //3//

Verse: 4 
Halfverse: a    śraddʰā́yā duhitā́ tápasó 'dʰi jātā́ svásā ŕ̥ṣīṇāṃ bʰūtakŕ̥tāṃ babʰū́va /
Halfverse: c    sā́ no mekʰale matím ā́ dʰehi medʰā́m átʰo no dʰehi tápa indriyáṃ ca //4//

Verse: 5 
Halfverse: a    yā́ṃ tvā pū́rve bʰūtakŕ̥ta ŕ̥ṣayaḥ paribedʰiré /
Halfverse: c    sā́ tváṃ pári ṣvajasva mā́ṃ dīrgʰāyutvā́ya mekʰale //5//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.