TITUS
Atharva-Veda-Samhita (Saunaka)
Part No. 448
Previous part

Hymn: 5 
Verse: 1 
Halfverse: a    ā́ nayaitám ā́ rabʰasva sukŕ̥tāṃ lokám ápi gacʰatu prajānán /
Halfverse: c    tīrtvā́ támāṃsi bahudʰā́ mahā́nty ajó nā́kam ā́ kramatāṃ tr̥tī́yam //1//

Verse: 2 
Halfverse: a    índrāya bʰāgáṃ pári tvā nayāmy asmín yajñé yájamānāya sūrím /
Halfverse: c    yé no dviṣánty ánu tā́n rabʰasvā́nāgaso yájamānasya vīrā́ḥ //2//

Verse: 3 
Halfverse: a    prá padó 'va nenigdʰi dúścaritaṃ yác cacā́ra śuddʰaíḥ śapʰaír ā́ kramatāṃ prajānán /
Halfverse: c    tīrtvā́ támāṃsi bahudʰā́ vipáśyann ajó nā́kam ā́ kramatāṃ tr̥tī́yam //3//

Verse: 4 
Halfverse: a    ánucʰya śyāména tvácam etā́ṃ viśastar yatʰāparv à1sínā mā́bʰí maṃstʰāḥ /
Halfverse: c    mā́bʰí druhaḥ paruśáḥ kalpayainaṃ tr̥tī́ye nā́ke ádʰi ví śrayainam //4//

Verse: 5 
Halfverse: a    r̥cā́ kumbʰī́m ádʰy agnaú śrayāmy ā́ siñcodakám áva dʰehy enam /
Halfverse: c    paryā́dʰattāgnínā śamitāraḥ sr̥tó gacʰatu sukŕ̥tāṃ yátra lokáḥ //5//

Verse: 6 
Halfverse: a    út kāmā́taḥ pári ced átaptas taptā́c carór ádʰi nā́kaṃ tr̥tī́yam /
Halfverse: c    agnér agnír ádʰi sáṃ babʰūvitʰa jyótiṣmantam abʰí lokáṃ jayaitám //6//

Verse: 7 
Halfverse: a    ajó agnír ajám u jyótir āhur ajáṃ jī́vatā brahmáṇe déyam āhuḥ /
Halfverse: c    ajás támāṃsy ápa hanti dūrám asmíṃl loké śraddádʰānena dattáḥ //7//

Verse: 8 
Halfverse: a    páñcaudanaḥ pañcadʰā́ ví kramatām ākraṃsyámānas trī́ṇi jyótīṃṣi /
Halfverse: c    ījānā́nāṃ sukŕ̥tāṃ préhi mádʰyaṃ tr̥tī́ye nā́ke ádʰi ví śrayasva //8//

Verse: 9 
Halfverse: a    ájā́ roha sukŕ̥tāṃ yátra lokáḥ śarabʰó ná cattó 'ti durgā́ny eṣaḥ /
Halfverse: c    páñcaudano brahmáṇe dīyámānaḥ sá dātā́raṃ tŕ̥ptyā tarpayāti //9//

Verse: 10 
Halfverse: a    ajás trināké tridivé tripr̥ṣṭʰé nā́kasya pr̥ṣṭʰé dadivā́ṃsaṃ dadʰāti /
Halfverse: c    páñcaudano brahmáṇe dīyámāno viśvárūpā dʰenúḥ kāmadúgʰāsy ékā //10// {11}

Verse: 11 
Halfverse: a    etád vo jyótiḥ pitaras tr̥tī́yaṃ páñcaudanaṃ brahmáṇe 'jáṃ dadāti /
Halfverse: c    ajás támāṃsy ápa hanti dūrám asmíṃl loké śraddádʰānena dattáḥ //11//

Verse: 12 
Halfverse: a    ījānā́nāṃ sukŕ̥tāṃ lokám ī́psan páñcaudanaṃ brahmáṇe 'jáṃ dadāti /
Halfverse: c    sá vyā̀ptim abʰí lokáṃ jayaitáṃ śivò3 'smábʰyaṃ prátigr̥hīto astu //12//

Verse: 13 
Halfverse: a    ajó hy à1gnér ájaniṣṭa śókād vípro víprasya sáhaso vipaścít /
Halfverse: c    iṣṭáṃ pūrtám abʰípūrtaṃ váṣaṭkr̥taṃ tád devā́ r̥tuśáḥ kalpayantu //13//

Verse: 14 
Halfverse: a    amotáṃ vā́so dadyād dʰíraṇyam ápi dákṣiṇām /
Halfverse: c    tátʰā lokā́nt sám āpnoti yé divyā́ yé ca pā́rtʰivāḥ //14//

Verse: 15 
Halfverse: a    etā́s tvājópa yantu dʰā́rāḥ somyā́ devī́r gʰr̥tápr̥ṣṭʰā madʰuścútaḥ /
Halfverse: c    stabʰān pr̥tʰivī́m utá dyā́ṃ nā́kasya pr̥ṣṭʰé 'dʰi saptáraśmau //15//

Verse: 16 
Halfverse: a    ajó 'sy ája svargó 'si tváyā lokám áṅgirasaḥ prā́jānan /
Halfverse: c    táṃ lokáṃ púṇyaṃ prá jñeṣam //16//

Verse: 17 
Halfverse: a    yénā sahásraṃ váhasi yénāgne sarvavedasám /
Halfverse: c    ténemáṃ yajñáṃ no vaha svàr devéṣu gántave //17//

Verse: 18 
Halfverse: a    ajáḥ pakváḥ svargé loké dadʰāti páñcaudano nírr̥tiṃ bā́dʰamānaḥ /
Halfverse: c    téna lokā́nt sū́ryavato jayema //18//

Verse: 19 
Halfverse: a    yáṃ brāhmaṇé nidadʰé yáṃ ca vikṣú yā́ viprúṣa odanā́nām ajásya /
Halfverse: c    sárvaṃ tád agne sukr̥tásya loké jānītā́n naḥ saṃgámane patʰīnā́m //19//

Verse: 20 
Halfverse: a    ajó vā́ idám agne vy àkramata tásyóra iyám abʰavad dyaúḥ pr̥ṣṭihám /
Halfverse: c    antárikṣaṃ mádʰyam díśaḥ pārśvé samudraú kukṣī́ //20// {12}

Verse: 21 
Halfverse: a    satyáṃ ca rtáṃ ca cákṣuṣī víśvaṃ satyáṃ śraddʰā́ prāṇó virā́ṭ śíraḥ /
Halfverse: c    eṣá vā́ áparimito yajñó yád ajáḥ páñcaudanaḥ //21//

Verse: 22 
Halfverse: a    áparimitam evá yajñám āpnóty áparimitaṃ lokám áva runddʰe /
Halfverse: c    yò3 'jáṃ páñcaudanaṃ dákṣiṇājyotiṣaṃ dádāti //22//

Verse: 23 
Halfverse: a    nā́syā́stʰīni bʰindyān ná majjñó nír dʰayet /
Halfverse: c    sárvam enaṃ samādā́yedámidaṃ prá veśayet //23//

Verse: 24 
Halfverse: a    idámidam evā́sya rūpáṃ bʰavati ténainaṃ sáṃ gamayati /
Halfverse: c    íṣaṃ máha ū́rjam asmai duhe yò3 'jáṃ páñcaudanam dákṣiṇājyotiṣaṃ dádāti //24//

Verse: 25 
Halfverse: a    páñca rukmā́ páñca návāni vástrā páñcāsmai dʰenávaḥ kāmadúgʰā bʰavanti /
Halfverse: c    yò3 'jáṃ páñcaudanaṃ dákṣiṇājyotiṣaṃ dádāti //25//

Verse: 26 
Halfverse: a    páñca rukmā́ jyótir asmai bʰavanti várma vā́sāṃsi tanvè bʰavanti /
Halfverse: c    svargáṃ lokám aśnute yò3 'jáṃ páñcaudanaṃ dákṣiṇājyotiṣam dádāti //26//

Verse: 27 
Halfverse: a    yā́ pū́rvaṃ pátiṃ vittvā́ 'tʰānyáṃ vindáté 'param /
Halfverse: c    páñcaudanaṃ ca tā́v ajáṃ dádāto ná ví yoṣataḥ //27//

Verse: 28 
Halfverse: a    samānáloko bʰavati punarbʰúvā́paraḥ pátiḥ /
Halfverse: c    yò3 'jáṃ páñcaudanam dákṣiṇājyotiṣaṃ dádāti //28//

Verse: 29 
Halfverse: a    anupūrvávatsāṃ dʰenúm anaḍvā́ham upabárhaṇam /
Halfverse: c    vā́so híraṇyaṃ dattvā́ té yanti dívam uttamā́m //29//

Verse: 30 
Halfverse: a    ātmā́naṃ pitáraṃ putráṃ paútraṃ pitāmahám /
Halfverse: c    jāyā́ṃ jánitrīṃ mātáraṃ yé priyā́s tā́n úpa hvaye //30// {13}

Verse: 31 
Halfverse: a    yó vaí naídāgʰaṃ nā́ma rtúṃ véda /
Halfverse: c    eṣá vaí naídāgʰo nā́ma rtúr yád ajáḥ páñcaudanaḥ /
Halfverse: e    nír evā́priyasya bʰrā́tr̥vyasya śríyaṃ dahati bʰávaty ātmánā /
Halfverse: g    yò3 'jáṃ páñcaudanaṃ dákṣiṇājyotiṣaṃ dádāti //31//

Verse: 32 
Halfverse: a    yó vaí kurvántaṃ nā́ma rtúṃ véda /
Halfverse: c    kurvatī́ṃkurvatīm evā́priyasya bʰrā́tr̥vyasya śríyaṃ ā́ datte /
Halfverse: e    eṣá vaí kurván nā́ma rtúr yád ajáḥ páñcaudanaḥ /
Halfverse: g    nír evā́priyasya bʰrā́tr̥vyasya śríyaṃ dahati bʰávaty ātmánā yò3 'jáṃ páñcaudanaṃ dákṣinājyotiṣaṃ dádāti //32//

Verse: 33 
Halfverse: a    yó vaí saṃyántaṃ nā́ma rtúṃ véda /
Halfverse: c    saṃyatī́ṃsaṃyatīm evā́priyasya bʰrā́tr̥vyasya śríyaṃ ā́ datte /
Halfverse: e    eṣá vaí saṃyán nā́ma rtúr yád ajáḥ páñcaudanaḥ /
Halfverse: g    nír evā́priyasya bʰrā́tr̥vyasya śríyaṃ dahati bʰávaty ātmánā yò3 'jáṃ páñcaudanaṃ dákṣiṇājyotiṣaṃ dádāti //33//

Verse: 34 
Halfverse: a    yó vaí pinvántaṃ nā́ma rtúm véda /
Halfverse: c    pinvatī́ṃpinvatīm evā́priyasya bʰrā́tr̥vyasya śríyaṃ ā́ datte /
Halfverse: e    eṣá vaí pinván nā́ma rtúr yád ajáḥ páñcaudanaḥ /
Halfverse: g    nír evā́priyasya bʰrā́tr̥vyasya śríyaṃ dahati bʰávaty ātmánā yò3 'jáṃ páñcaudanaṃ dákṣinājyotiṣaṃ dádāti //34//

Verse: 35 
Halfverse: a    yó vā́ udyántaṃ nā́ma rtúṃ véda /
Halfverse: c    udyatī́ṃudyatīm evā́priyasya bʰrā́tr̥vyasya śríyaṃ ā́ datte /
Halfverse: e    eṣá vā́ udyánn nā́ma rtúr yád ajáḥ páñcaudanaḥ /
Halfverse: g    nír evā́priyasya bʰrā́tr̥vyasya śríyaṃ dahati bʰávaty ātmánā yò3 'jáṃ páñcaudanaṃ dákṣiṇājyotiṣam dádāti //35//

Verse: 36 
Halfverse: a    yó vā́ abʰibʰúvaṃ nā́ma rtúṃ véda /
Halfverse: c    abʰibʰávantīmabʰibʰavantīm evā́priyasya bʰrā́tr̥vyasya śríyaṃ ā́ datte /
Halfverse: e    eṣá vā́ abʰibʰū́r nā́ma rtúr yád ajáḥ páñcaudanaḥ /
Halfverse: g    nír evā́priyasya bʰrā́tr̥vyasya śríyaṃ dahati bʰávaty ātmánā /
Halfverse: i    yò3 'jáṃ páñcaudanaṃ dákṣinājyotiṣaṃ dádāti //36//

Verse: 37 
Halfverse: a    ajáṃ ca pácata páñca caudanā́n /
Halfverse: c    sárvā díśaḥ sáṃmanasaḥ sadʰrī́cīḥ sā́ntardeśāḥ práti gr̥hnántu ta etám //37//

Verse: 38 
Halfverse: a    tā́s te rakṣantu táva túbʰyam etáṃ tābʰya ā́jyaṃ havír idáṃ juhomi //38// {14}

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.