TITUS
Atharva-Veda-Samhita (Saunaka)
Part No. 452
Previous part

Hymn: 9 
Verse: 1 
Halfverse: a    asyá vāmásya palitásya hótus tásya bʰrā́tā madʰyamó asty áśnaḥ /
Halfverse: c    tr̥tī́yo bʰrā́tā gʰr̥tápr̥ṣṭʰo asyā́trāpaśyaṃ viśpátiṃ saptáputram //1//

Verse: 2 
Halfverse: a    saptá yuñjanti rátʰam ékacakram éko áśvo vahati saptánāmā /
Halfverse: c    trinā́bʰi cakrám ajáram anarváṃ yátremā́ víśvā bʰúvanā́dʰi tastʰúḥ //2//

Verse: 3 
Halfverse: a    imáṃ rátʰam ádʰi yé saptá tastʰúḥ saptácakraṃ saptá vahanty áśvāḥ /
Halfverse: c    saptá svásāro abʰí sáṃ navanta yátra gávām níhitā saptá nā́ma //3//

Verse: 4 
Halfverse: a    kó dadarśa pratʰamáṃ jā́yamānam astʰanvántaṃ yád anastʰā́ bíbʰarti /
Halfverse: c    bʰū́myā ásur ásr̥g ātmā́ kvà svit kó vidvā́ṃsam úpa gāt práṣṭum etát //4//

Verse: 5 
Halfverse: a    ihá bravītu yá īm aṅgá védāsyá vāmásya níhitaṃ padáṃ véḥ /
Halfverse: c    śīrṣṇáḥ kṣīráṃ duhrate gā́vo asya vavríṃ vásānā udakáṃ padā́ 'puḥ //5//

Verse: 6 
Halfverse: a    pā́kaḥ pr̥cʰāmi mánasā́ 'vijānan devā́nām enā́ níhitā padā́ni /
Halfverse: c    vatsé baṣkáyé 'dʰi saptá tántūn ví tatnire kaváya ótavā́ u //6//

Verse: 7 
Halfverse: a    ácikitvāṃs cikitúṣaś cid átra kavī́n pr̥cʰāmi vidváno ná vidvā́n /
Halfverse: c    ví yás tastámbʰa ṣáṭ imā́ rájāṃsy ajásya rūpé kíṃ ápi svid ékam //7//

Verse: 8 
Halfverse: a    mātā́ pitáram r̥tá ā́ babʰāja 'dʰīty ágre mánasā sáṃ hí jagmé /
Halfverse: c    sā́ bībʰatsúr gárbʰarasā níviddʰā námasvanta íd upavākám īyuḥ //8//

Verse: 9 
Halfverse: a    yuktā́ mātā́sid dʰurí dákṣiṇāyā átiṣṭʰad gárbʰo vr̥janī́ṣv antáḥ /
Halfverse: c    ámīmed vatsó ánu gā́m apaśyad viśvarūpyàṃ triṣú yóganeṣu //9//

Verse: 10 
Halfverse: a    tisró matŕ̥̄s trī́n pitŕ̥̄n bíbʰrad éka urdʰvás tastʰau ném áva glāpayanta /
Halfverse: c    mantráyante divó amúṣya pr̥ṣṭʰé viśvavído vā́cam áviśvavinnām //10// {24}

Verse: 11 
Halfverse: a    páñcāre cakré parivártamāne yásminn ātastʰúr bʰúvanāni víśvā /
Halfverse: c    tásya nā́kṣas tapyate bʰū́ribʰāraḥ sanā́d evá ná cʰidyate sánābʰiḥ //11//

Verse: 12 
Halfverse: a    páñcapādaṃ pitáraṃ dvā́daśākr̥tiṃ divá āhuḥ páre árdʰe purīṣíṇam /
Halfverse: c    átʰemé anyá úpare vicakṣaṇé saptácakre ṣáḍara āhur árpitam //12//

Verse: 13 
Halfverse: a    dvā́daśāraṃ nahí táj járāya várvarti cakráṃ pári dyā́m r̥tásya /
Halfverse: c    ā́ putrā́ agne mitʰunā́so átra saptá śatā́ni viṃśatíś ca tastʰuḥ //13//

Verse: 14 
Halfverse: a    sánemi cakrám ajáraṃ ví vavr̥ta uttānā́yāṃ dáśa yuktā́ vahanti /
Halfverse: c    sū́ryasya cákṣū rájasaity ā́vr̥taṃ yásminn ātastʰúr bʰúvanāni víśvā //14//

Verse: 15 
Halfverse: a    stríyaḥ satī́s tā́m u me puṃsáḥ āhuḥ páśyad akṣaṇvā́nn ví cetad andʰáḥ /
Halfverse: c    kavír yáḥ putráḥ sá īm ā́ ciketa yás tā́ vijānā́t sá pitúṣ pitā́sat //15//

Verse: 16 
Halfverse: a    sākaṃjā́nāṃ saptátʰam āhur ekajáṃ ṣáḍ íd yamā́ ŕ̥ṣayo devajā́ íti /
Halfverse: c    téṣām iṣṭā́ni víhitāni dʰāmaśá stʰātré rejante víkr̥tāni rūpaśáḥ //16//

Verse: 17 
Halfverse: a    aváḥ páreṇa pará enā́ ávareṇa padā́ vatsáṃ bíbʰratī gaúr úd astʰāt /
Halfverse: c    sā́ kadrī́cī káṃ svid árdʰaṃ párāgāt kvà svit sūte nahí yūtʰé asmín //17//

Verse: 18 
Halfverse: a    aváḥ páreṇa pitáraṃ yó asya védāváḥ páreṇa pará enā́vareṇa /
Halfverse: c    kavīyámānaḥ ká ihá prá vocad deváṃ mánaḥ kúto ádʰi prájātam //18//

Verse: 19 
Halfverse: a    yé arvā́ñcas tā́m u párāca āhur yé párāñcas tā́m̐ u arvā́ca āhuḥ /
Halfverse: c    índraś ca yā́ cakrátʰuḥ soma tā́ni dʰurā́ ná yuktā́ rájaso vahanti //19//

Verse: 20 
Halfverse: a    dvā́ suparṇā́ sayújā sákʰāyā samānáṃ vr̥kṣáṃ pári ṣasvajāte /
Halfverse: c    táyor anyáḥ píppalaṃ svādv átty ánaśnann anyó abʰí cākaśīti //20//

Verse: 21 
Halfverse: a    yásmin vr̥kṣé madʰvádaḥ suparṇā́ niviśánte súvate cā́dʰi víśve /
Halfverse: c    tásya yád āhúḥ píppalaṃ svādv ágre tán nón naśad yáḥ pitáraṃ ná véda //21//

Verse: 22 
Halfverse: a    yátrā suparṇā́ amŕ̥tasya bʰakṣám ánimeṣaṃ vidátʰābʰisváranti /
Halfverse: c    enā́ víśvasya bʰúvanasya gopā́ḥ sá mā dʰī́raḥ pā́kam átrā́ viveśa //22// {25}

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.