TITUS
Atharva-Veda-Samhita (Saunaka)
Part No. 453
Previous part

Hymn: 10 
Verse: 1 
Halfverse: a    yád gāyatré ádʰi gāyatrám ā́hitaṃ traíṣṭubʰaṃ vā traíṣṭubʰān nirátakṣata /
Halfverse: c    yád vā jágaj jágaty ā́hitaṃ padáṃ yá ít tád vidús té amr̥tatvám ānuśuḥ //1//

Verse: 2 
Halfverse: a    gāyatréṇa práti mimīte arkám arkéṇa sā́ma traíṣṭubʰena vākám /
Halfverse: c    vākéna vākáṃ dvipádā cátuṣpadākṣáreṇa mimate saptá vā́ṇīḥ //2//

Verse: 3 
Halfverse: a    jágatā síndʰuṃ divy àskabʰāyad ratʰaṃtaré sū́ryaṃ páry apaśyat /
Halfverse: c    gāyatrásya samídʰas tisrá āhus táto mahnā́ prá ririce mahitvā́ //3//

Verse: 4 
Halfverse: a    úpa hvaye sudúgʰāṃ dʰenúm etā́ṃ suhásto godʰúg utá dohad enām /
Halfverse: c    śréṣṭʰaṃ saváṃ savitā́ sāviṣan no 'bʰī́ddʰo gʰarmás tád u ṣú prá vocat //4//

Verse: 5 
Halfverse: a    hiṅkr̥ṇvatī́ vasupátnī vásūnāṃ vatsám icʰántī mánasābʰyā́gāt /
Halfverse: c    duhā́m aśvíbʰyāṃ páyo agʰnyéyáṃ sā́ vardʰatāṃ mahaté saúbʰagāya //5//

Verse: 6 
Halfverse: a    gaúr amīmed abʰí vatsáṃ miṣántaṃ mūrdʰā́naṃ híṅṅ akr̥ṇon mātavā́ u /
Halfverse: c    sŕ̥kvāṇaṃ gʰarmám abʰí vāvaśānā́ mímāti māyúṃ páyate páyobʰiḥ //6//

Verse: 7 
Halfverse: a    ayáṃ sá śiṅkte yéna gaúr abʰívr̥tā mímāti mayúṃ dʰvasánāv ádʰi śritā́ /
Halfverse: c    sā́ cittíbʰir ní hí cakā́ra mártyān vidyúd bʰávantī práti vavrím auhata //7//

Verse: 8 
Halfverse: a    anác cʰaye turágātu jīvám éjad dʰruváṃ mádʰya ā́ pastyā̀nām /
Halfverse: c    jīvó mr̥tásya carati svadʰā́bʰir ámartyo mártyenā sáyoniḥ //8//

Verse: 9 
Halfverse: a    vidʰúṃ dadrāṇáṃ salilásya pr̥ṣṭʰé yúvānaṃ sántaṃ palitó jagāra /
Halfverse: c    devásya paśya kā́vyaṃ mahitvā́dyá mamā́ra sá hyáḥ sám āna //9//

Verse: 10 
Halfverse: a    yá īṃ cakā́ra ná só asyá veda yá īṃ dadárśa hírug ín nú tásmāt /
Halfverse: c    sá mātúr yónā párivīto antár bahuprajā́ nírr̥tir ā́ viveśa //10// {26}

Verse: 11 
Halfverse: a    ápaśyaṃ gopā́m anipádyamānam ā́ ca párā ca patʰíbʰiś cárantam /
Halfverse: c    sá sadʰrī́cīḥ sá víṣūcīr vásāna ā́ varīvarti bʰúvaneṣv antáḥ //11//

Verse: 12 
Halfverse: a    dyaúr naḥ pitā́ janitā́ nā́bʰir átra bándʰur no mātā́ pr̥tʰivī́ mahī́yám /
Halfverse: c    uttānáyoś camvò3r yónir antár átrā pitā́ duhitúr gárbʰam ā́dʰāt //12//

Verse: 13 
Halfverse: a    pr̥cʰā́mi tvā páram ántaṃ pr̥tʰivyā́ḥ pr̥cʰā́mi vŕ̥ṣṇo áśvasya rétaḥ /
Halfverse: c    pr̥cʰā́mi víśvasya bʰúvanasya nā́bʰiṃ pr̥cʰā́mi vācáḥ paramáṃ vyòma //13//

Verse: 14 
Halfverse: a    iyáṃ védiḥ páro ántaḥ pr̥tʰivyā́ ayáṃ sómo vŕ̥ṣṇo áśvasya rétaḥ /
Halfverse: c    ayáṃ yajñó víśvasya bʰúvanasya nā́bʰir brahmā́yáṃ vācáḥ paramáṃ vyòma //14//

Verse: 15 
Halfverse: a    ná ví jānāmi yád ivedám ásmi niṇyáḥ sáṃnaddʰo mánasā carāmi /
Halfverse: c    yadā́ mā́gan pratʰamajā́ r̥tásyā́d íd vācó aśnuve bʰāgám asyā́ḥ //15//

Verse: 16 
Halfverse: a    ápāṅ prā́ṅ eti svadʰáyā gr̥bʰītó 'martyo mártyenā sáyoniḥ /
Halfverse: c    tā́ śáśvantā viṣūcī́nā viyántā ny ànyáṃ cikyúr ná ní cikyur anyám //16//

Verse: 17 
Halfverse: a    saptā́rdʰagarbʰā́ bʰúvanasya réto víṣṇos tiṣṭʰanti pradíśā vídʰarmaṇi /
Halfverse: c    té dʰītíbʰir mánasā té vipaścítaḥ paribʰúvaḥ pári bʰavanti viśvátaḥ //17//

Verse: 18 
Halfverse: a    r̥có akṣáre paramé vyòman yásmin devā́ ádʰi víśve niṣedúḥ /
Halfverse: c    yás tán ná véda kím r̥cā́ kariṣyati yá ít tád vidús te amī́ sám āsate //18//

Verse: 19 
Halfverse: a    r̥cáḥ padáṃ mā́trayā kalpáyanto 'rdʰarcéna cakḷpur víśvam éjat /
Halfverse: c    tripā́d bráhma pururū́paṃ ví taṣṭʰe téna jīvanti pradíśaś cátasraḥ //19//

Verse: 20 
Halfverse: a    sūyavasā́d bʰágavatī hí bʰūyā́ ádʰā vayáṃ bʰágavantaḥ syāma /
Halfverse: c    addʰí tŕ̥ṇam agʰnye viśvadā́nīṃ píba śuddʰám udakám ācárantī //20// {27}

Verse: 21 
Halfverse: a    gaúr ín mimāya salilā́ni tákṣatī ékapadī dvipádī sā́ cátuṣpadī /
Halfverse: c    aṣṭā́padī návapadī babʰūvúṣī sahásrākṣarā bʰúvanasya paṅktís tásyāḥ samudrā́ ádʰi ví kṣaranti //21//

Verse: 22 
Halfverse: a    kr̥ṣṇáṃ niyā́naṃ hárayaḥ suparṇā́ apó vásānā dívam út patanti /
Halfverse: c    táṃ ā́vavr̥trant sádanād r̥tásyā́d íd gʰr̥téna pr̥tʰivī́ṃ vy ū̀duḥ //22//

Verse: 23 
Halfverse: a    apā́d eti pratʰamā́ padvátīnāṃ kás tád vāṃ mitrāvaruṇā́ ciketa /
Halfverse: c    gárbʰo bʰāráṃ bʰaraty ā́ cid asyā r̥táṃ píparti ánr̥taṃ ní pāti //23//

Verse: 24 
Halfverse: a    virā́ḍ vā́g virā́ṭ pr̥tʰivī́ virā́ḍ antárikṣaṃ virā́ṭ prajā́patiḥ /
Halfverse: c    virā́ṇ mr̥tyúḥ sādʰyā́nām adʰirājó babʰūva tásya bʰūtáṃ bʰávyaṃ váśe sá me bʰūtáṃ bʰávyaṃ váśe kr̥ṇotu //24//

Verse: 25 
Halfverse: a    śakamáyaṃ dʰūmám ārā́d apaśyaṃ viṣūvátā pará enā́vareṇa /
Halfverse: c    ukṣā́ṇaṃ pŕ̥śnim apacanta vīrā́s tā́ni dʰármāṇi pratʰamā́ny āsan //25//

Verse: 26 
Halfverse: a    tráyaḥ keśína r̥tutʰā́ ví cakṣate saṃvatsaré vapata éka eṣām /
Halfverse: c    víśvam anyó abʰicáṣṭe śácībʰir dʰrā́jir ékasya dadr̥śe ná rūpám //26//

Verse: 27 
Halfverse: a    catvā́ri vā́k párimitā padā́ni tā́ni vidur brāhmaṇā́ yé manīṣíṇaḥ /
Halfverse: c    gúhā trī́ṇi níhitā néṅgayanti turī́yaṃ vācó manuṣyā̀ vadanti //27//

Verse: 28 
Halfverse: a    índraṃ mitráṃ váruṇam agním āhur átʰo divyáḥ sá suparṇó garútmān /
Halfverse: c    ekáṃ sád víprā bahudʰā́ vadanty agníṃ yamáṃ mātariśvānam āhuḥ //28// {28}



Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.