TITUS
Atharva-Veda-Samhita (Saunaka)
Part No. 454
Previous part

Book: 10 
10
Hymn: 1 


Verse: 1 
Halfverse: a    yā́ṃ kalpáyanti vahataú vadʰū́m iva viśvárūpāṃ hástakr̥tāṃ cikitsávaḥ /
Halfverse: c    sā́rā́d etv ápa nudāma enām //1//

Verse: 2 
Halfverse: a    śīrṣaṇvátī nasvátī karṇíṇī kr̥tyākŕ̥tā sáṃbʰr̥tā viśvárūpā /
Halfverse: c    sā́rā́d etv ápa nudāma enām //2//

Verse: 3 
Halfverse: a    śūdrákr̥tā rā́jakr̥tā strī́kr̥tā brahmábʰiḥ kr̥tā́ /
Halfverse: c    jāyā́ pátyā nuttéva kartā́raṃ bándʰv r̥cʰatu //3//

Verse: 4 
Halfverse: a    anáyāhám óṣadʰyā sárvāḥ kr̥tyā́ adūduṣam /
Halfverse: c    yā́ṃ kṣétre cakrúr yā́ṃ góṣu yā́ṃ vā te púruṣeṣu //4//

Verse: 5 
Halfverse: a    agʰám astv agʰakŕ̥te śapátʰaḥ śapatʰīyaté /
Halfverse: c    pratyák pratipráhiṇmo yátʰā kr̥tyākŕ̥taṃ hánat //5//

Verse: 6 
Halfverse: a    pratīcī́na āṅgirasó 'dʰyakṣo naḥ puróhitaḥ /
Halfverse: c    pratī́cīḥ kr̥tyā́ ākŕ̥tyāmū́n kr̥tyākŕ̥to jahi //6//

Verse: 7 
Halfverse: a    yás tvovā́ca párehī́ti pratikū́lam udāyyàm /
Halfverse: c    táṃ kr̥tye 'bʰinívartasva mā́smā́n icʰo anāgásaḥ //7//

Verse: 8 
Halfverse: a    yás te párūṃṣi saṃdadʰaú rátʰasyeva rbʰúr dʰiyā́ /
Halfverse: c    táṃ gacʰa tátra té 'yanam ájñātas te 'yáṃ jánaḥ //8//

Verse: 9 
Halfverse: a    yé tvā kr̥tvā́lebʰiré vidvalā́ abʰicāríṇaḥ /
Halfverse: c    śaṃbʰv ì3dáṃ kr̥tyādū́ṣaṇaṃ prativartmá punaḥsaráṃ téna tvā snapayāmasi //9//

Verse: 10 
Halfverse: a    yád durbʰágāṃ prásnapitāṃ mr̥távatsām upeyimá /
Halfverse: c    ápaitu sárvaṃ mát pāpáṃ dráviṇaṃ mópa tiṣṭʰatu //10// {1}

Verse: 11 
Halfverse: a    yát te pitŕ̥bʰyo dádato yajñé vā nā́ma jagr̥húḥ /
Halfverse: c    saṃdeśyā̀3t sárvasmāt pāpā́d imā́ muñcantu tvaúṣadʰīḥ //11//

Verse: 12 
Halfverse: a    devainasā́t pítryān nāmagrāhā́t saṃdeśyā̀d abʰiníṣkr̥tāt /
Halfverse: c    muñcántu tvā vīrúdʰo vīryeṇa bráhmaṇā r̥gbʰíḥ páyasā ŕ̥ṣīṇām //12//

Verse: 13 
Halfverse: a    yátʰā vā́taś cyāváyati bʰū́myā reṇúm antárikṣāc cābʰrám /
Halfverse: c    evā́ mát sárvaṃ durbʰūtáṃ bráhmanuttam ápāyati //13//

Verse: 14 
Halfverse: a    ápa krāma nā́nadatī vínaddʰā gardabʰī́va /
Halfverse: c    kartŕ̥̄n nakṣasvetó nuttā́ bráhmaṇā vīryā̀vatā //14//

Verse: 15 
Halfverse: a    ayáṃ pántʰāḥ kr̥tyéti tvā nayāmo 'bʰipráhitāṃ práti tvā prá hiṇmaḥ /
Halfverse: c    ténābʰí yāhi bʰañjaty ánasvatīva vāhínī viśvárūpā kurūtínī //15//

Verse: 16 
Halfverse: a    párāk te jyótir ápatʰaṃ te arvā́g anyátrāsmád áyanā kr̥ṇuṣva /
Halfverse: c    páreṇehi navatíṃ nāvyā̀3 áti durgā́ḥ srotyā́ mā́ kṣaṇiṣṭʰāḥ párehi //16//

Verse: 17 
Halfverse: a    vā́ta iva vr̥kṣā́n ní mr̥ṇīhi pādáya mā́ gā́m áśvaṃ púruṣam úc cʰiṣa eṣām /
Halfverse: c    kartŕ̥̄n nivŕ̥tyetáḥ kr̥tye 'prajāstvā́ya bodʰaya //17//

Verse: 18 
Halfverse: a    yā́ṃ te barhíṣi yā́ṃ śmaśāné kṣétre kr̥tyā́ṃ valagáṃ vā nicakʰnúḥ /
Halfverse: c    agnaú vā tvā gā́rhapatye 'bʰicerúḥ pā́kaṃ sántaṃ dʰī́ratarā anāgásam //18//

Verse: 19 
Halfverse: a    upā́hr̥tam ánubuddʰaṃ níkʰātaṃ vaíraṃ tsāry ánv avidāma kártram /
Halfverse: c    tád etu yáta ā́bʰr̥taṃ tátrā́śva iva ví vartatāṃ hántu kr̥tyākŕ̥taḥ prajā́m //19//

Verse: 20 
Halfverse: a    svāyasā́ asáyaḥ santi no gr̥hé vidmā́ te kr̥tye yatidʰā́ párūṃṣi /
Halfverse: c    út tiṣṭʰaivá párehītó 'jñāte kím ihécʰasi //20// {2}

Verse: 21 
Halfverse: a    grīvā́s te kr̥tye pā́dau cā́pi kartsyāmi nír drava /
Halfverse: c    indrāgnī́ asmā́n rakṣatāṃ yaú prajā́nāṃ prajā́vatī //21//

Verse: 22 
Halfverse: a    sómo rā́jādʰipā́ mr̥ḍitā́ ca bʰūtásya naḥ pátayo mr̥ḍayantu //22//

Verse: 23 
Halfverse: a    bʰavāśarvā́v asyatāṃ pāpakŕ̥te kr̥tyākŕ̥te /
Halfverse: c    duṣkŕ̥te vidyútaṃ devahetím //23//

Verse: 24 
Halfverse: a    yády eyátʰa dvipádī cátuṣpadī kr̥tyākŕ̥tā sáṃbʰr̥tā viśvárūpā /
Halfverse: c    sétó 'ṣṭā́padī bʰūtvā́ púnaḥ párehi ducʰune //24//

Verse: 25 
Halfverse: a    abʰyàktā́ktā svàraṃkr̥tā sárvaṃ bʰárantī duritáṃ párehi /
Halfverse: c    jānīhi kr̥tye kartā́raṃ duhitéva pitáraṃ svám //25//

Verse: 26 
Halfverse: a    párehi kr̥tye mā́ tiṣṭʰo viddʰásyeva padáṃ naya /
Halfverse: c    mr̥gáḥ sá mr̥gayús tváṃ ná tvā níkartum arhati //26//

Verse: 27 
Halfverse: a    utá hanti pūrvāsínaṃ pratyādā́yā́para íṣvā /
Halfverse: c    utá pū́rvasya nigʰnató ní hanty áparaḥ práti //27//

Verse: 28 
Halfverse: a    etád dʰí śr̥ṇú me vácó 'tʰehi yáta eyátʰa /
Halfverse: c    yás tvā cakā́ra táṃ práti //28//

Verse: 29 
Halfverse: a    anāgohatyā́ vaí bʰīmā́ kr̥tye mā́ no gā́m áśvaṃ púruṣaṃ vadʰīḥ /
Halfverse: c    yátrayatrā́si níhitā tátas tvót tʰāpayāmasi parṇā́l lágʰīyasī bʰava //29//

Verse: 30 
Halfverse: a    yádi stʰá támasā́vr̥tā jā́lenabʰíhitā iva /
Halfverse: c    sárvāḥ saṃlúpyetáḥ kr̥tyā́ḥ púnaḥ kartré prá hiṇmasi //30//

Verse: 31 
Halfverse: a    kr̥tyākŕ̥to valagíno 'bʰiniṣkāríṇaḥ prajā́m /
Halfverse: c    mr̥ṇīhí kr̥tye móc cʰiṣo 'mū́n kr̥tyākŕ̥to jahi //31//

Verse: 32 
Halfverse: a    yátʰā sū́ryo mucyáte támasas pári rā́triṃ jáhāty uṣásaśca ketū́n /
Halfverse: c    evā́háṃ sárvaṃ durbʰūtáṃ kártraṃ kr̥tyākŕ̥tā kr̥táṃ hastī́va rájo duritáṃ jahāmi //32// {3}

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.