TITUS
Atharva-Veda-Samhita (Saunaka)
Part No. 455
Previous part

Hymn: 2 
Verse: 1 
Halfverse: a    kéna pā́rṣṇī ā́bʰr̥te pū́ruṣasya kéna māṃsáṃ sáṃbʰr̥taṃ kéna gulpʰaú /
Halfverse: c    kénāṅgúlīḥ péśanīḥ kéna kʰā́ni kénoccʰlaṅkʰaú madʰyatáḥ káḥ pratiṣṭʰā́m //1//

Verse: 2 
Halfverse: a    kásmān nú gulpʰā́v ádʰarāv akr̥ṇvann aṣṭʰīvántāv úttarau púruṣasya /
Halfverse: c    jáṅgʰe nirŕ̥tya ny àdadʰuḥ kvà svij jā́nunoḥ saṃdʰī́ ká u tác ciketa //2//

Verse: 3 
Halfverse: a    cátuṣṭayaṃ yujate sáṃhitāntaṃ jā́nubʰyām ūrdʰváṃ śitʰiráṃ kábandʰam /
Halfverse: c    śróṇī yád ūrū́ ká u táj jajāna yā́bʰyāṃ kúsindʰaṃ súdr̥ḍʰaṃ babʰū́va //3//

Verse: 4 
Halfverse: a    káti devā́ḥ katamé tá āsan yá úro grīvā́ś cikyúḥ púruṣasya /
Halfverse: c    káti stánau vy àdadʰuḥ káḥ kapʰodaú káti skandʰā́n káti pr̥ṣṭī́r acinvan //4//

Verse: 5 
Halfverse: a    kó asya bāhū́ sám abʰarad vīryā̀ṃ karavād íti /
Halfverse: c    áṃsau kó asya tád deváḥ kúsindʰe ádʰy ā́ dadʰau //5//

Verse: 6 
Halfverse: a    káḥ saptá kʰā́ni ví tatarda śīrṣáṇi kárṇāv imaú nā́sike cákṣaṇī múkʰam /
Halfverse: c    yéṣāṃ purutrā́ vijayásya mahnáni cátuṣpādo dvipádo yanti yā́mam //6//

Verse: 7 
Halfverse: a    hánvor hí jihvā́m ádadʰāt purūcī́m ádʰā mahī́m ádʰi śiśrāya vā́cam /
Halfverse: c    sá ā́ varīvarti bʰúvaneṣv antár apó vásānaḥ ká u tác ciketa //7//

Verse: 8 
Halfverse: a    mastíṣkam asya yatamó lalā́taṃ kakā́ṭikāṃ pratʰamó yáḥ kapā́lam /
Halfverse: c    citvā́ cítyaṃ hánvoḥ pū́ruṣasya dívaṃ ruroha katamáḥ sá deváḥ //8//

Verse: 9 
Halfverse: a    priyāpriyā́ṇi bahulā́ svápnaṃ saṃbādʰatandyàḥ /
Halfverse: c    ānandā́n ugró nándāṃś ca kásmād vahati pū́ruṣaḥ //9//

Verse: 10 
Halfverse: a    ā́rtir ávartir nírr̥tiḥ kúto nú púruṣé 'matiḥ /
Halfverse: c    rā́ddʰiḥ sámr̥ddʰir ávyr̥ddʰir matír úditayaḥ kútaḥ //10// {4}

Verse: 11 
Halfverse: a    kó asminn ā́po vy àdadʰāt viṣūvŕ̥taḥ purūvŕ̥taḥ sindʰusŕ̥tyāya jātā́ḥ /
Halfverse: c    tīvrā́ aruṇā́ lóhinīs tāmradʰūmrā́ ūrdʰvā́ ávācīḥ púruṣe tiráścīḥ //11//

Verse: 12 
Halfverse: a    kó asmin rūpám adadʰāt kó mahmā́naṃ ca nā́ma ca /
Halfverse: c    gātúṃ kó asmin káḥ ketúṃ káś carítrāni púruṣe //12//

Verse: 13 
Halfverse: a    kó asmin prāṇáṃ avayat kó apānáṃ vyānám u /
Halfverse: c    samānám asmin kó devó 'dʰi śiśrāya púruṣe //13//

Verse: 14 
Halfverse: a    kó asmin yajñám adadʰād éko devó 'dʰi púruṣe /
Halfverse: c    kó asmint satyáṃ kó 'nr̥taṃ kúto mr̥tyúḥ kúto 'mŕ̥tam //14//

Verse: 15 
Halfverse: a    kó asmai vā́saḥ páry adadʰāt kó asyā́yur akalpayat /
Halfverse: c    bálaṃ kó asmai prā́yacʰat kó asyākalpayaj javám //15//

Verse: 16 
Halfverse: a    kénā́po ánv atanuta kénāhar akarod rucé /
Halfverse: c    uṣásaṃ kénā́nv ainddʰa kéna sāyaṃbʰaváṃ dade //16//

Verse: 17 
Halfverse: a    kó asmin réto ny àdadʰāt tántur ā́ tāyatām íti /
Halfverse: c    medʰā́ṃ kó asminn ádʰy auhat kó bāṇáṃ kó nŕ̥to dadʰau //17//

Verse: 18 
Halfverse: a    kénemā́ṃ bʰū́mim aurṇot kéna páry abʰavad dívam /
Halfverse: c    kénābʰí mahnā́ párvatān kéna kármāṇi púruṣaḥ //18//

Verse: 19 
Halfverse: a    kéna parjányam ánv eti kéna sómaṃ vicakṣaṇám /
Halfverse: c    kéna yajñám ca śraddʰā́ṃ ca kénāsmin níhitaṃ mánaḥ //19//

Verse: 20 
Halfverse: a    kéna śrótriyam āpnoti kénemáṃ parameṣṭʰínam /
Halfverse: c    kénemám agníṃ pū́ruṣaḥ kéna saṃvatsaráṃ mame //20// {5}

Verse: 21 
Halfverse: a    bráhma śrótriyam āpnoti bráhmemáṃ parameṣṭʰinam /
Halfverse: c    bráhmemám agníṃ pū́ruṣo bráhma saṃvatsaráṃ mame //21//

Verse: 22 
Halfverse: a    kéna devā́m̐ ánu kṣiyati kéna daívajanīr viśaḥ /
Halfverse: c    kénedám anyán nákṣatraṃ kéna sát kṣatrám ucyate //22//

Verse: 23 
Halfverse: a    bráhma devā́m̐ ánu kṣiyati bráhma daívajanīr víśaḥ /
Halfverse: c    bráhmedám anyán nákṣatraṃ bráhma sát kṣatrám ucyate //23//

Verse: 24 
Halfverse: a    kéneyáṃ bʰū́mir víhitā kéna dyaúr úttarā hitā́ /
Halfverse: c    kénedám ūrdʰváṃ tiryák cāntárikṣam vyáco hitám //24//

Verse: 25 
Halfverse: a    bráhmaṇā bʰū́mir víhitā bráhma dyaúr úttarā hitā́ /
Halfverse: c    bráhmedám ūrdʰváṃ tiryák cāntárikṣaṃ vyáco hitám //25//

Verse: 26 
Halfverse: a    mūrdʰā́nam asya saṃsī́vyā́tʰarvā hŕ̥dayaṃ ca yát /
Halfverse: c    mastíṣkād ūrdʰváḥ praírayat pávamānó 'dʰi śīrṣatáḥ //26//

Verse: 27 
Halfverse: a    tád vā́ átʰarvaṇaḥ śíro devakośáḥ sámubjitaḥ /
Halfverse: c    tát prāṇó abʰí rakṣati śíro ánnam átʰo mánaḥ //27//

Verse: 28 
Halfverse: a    ūrdʰvó nú sr̥ṣṭā́3s tiryáṅ nú sr̥ṣṭā́3s sárvā díśaḥ púruṣa ā́ babʰūvā́3m̐ /
Halfverse: c    púraṃ yó bráhmaṇo véda yásyāḥ púruṣa ucyáte //28//

Verse: 29 
Halfverse: a    yó vaí tā́ṃ bráhmaṇo védāmŕ̥tenā́vr̥tāṃ púram /
Halfverse: c    tásmai bráhma ca brāhmā́ś ca cákṣuḥ prāṇáṃ prajā́ṃ daduḥ //29//

Verse: 30 
Halfverse: a    ná vaí tám cákṣur jahāti ná prāṇó jarásaḥ purā́ /
Halfverse: c    púraṃ yó bráhmaṇo véda yásyāḥ púruṣa ucyáte //30//

Verse: 31 
Halfverse: a    aṣṭā́cakrā návadvārā devā́nāṃ pū́r ayodʰyā́ /
Halfverse: c    tásyāṃ hiraṇyáyaḥ kóśaḥ svargó jyótiṣā́vr̥taḥ //31//

Verse: 32 
Halfverse: a    tásmin hiraṇyáye kóśe tryàre trípratiṣṭʰite /
Halfverse: c    tásmin yád yakṣám ātmanvát tád vaí brahmavído viduḥ //32//

Verse: 33 
Halfverse: a    prabʰrā́jamānāṃ háriṇīṃ yáśasā saṃpárīvr̥tām /
Halfverse: c    púraṃ hiraṇyáyīṃ bráhmā́ viveśā́parājitām //33// {6}

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.