TITUS
Atharva-Veda-Samhita (Saunaka)
Part No. 456
Previous part

Hymn: 3 
Verse: 1 
Halfverse: a    ayáṃ me varaṇó maṇíḥ sapatnakṣáyaṇo vŕ̥ṣā /
Halfverse: c    tenā́ rabʰasva tváṃ śátrūn prá mr̥ṇīhi durasyatáḥ //1//

Verse: 2 
Halfverse: a    praíṇān cʰr̥ṇīhi prá mr̥ṇā́ rabʰasva maṇís te astu puraetā́ purástāt /
Halfverse: c    ávārayanta varaṇéna devā́ abʰyācārám ásurāṇāṃ śváḥśvaḥ //2//

Verse: 3 
Halfverse: a    ayáṃ maṇír varaṇó viśvábʰeṣajaḥ sahasrākṣó hárito hiraṇyáyaḥ /
Halfverse: c    sá te śátrūn ádʰarān pādayāti pū́rvas tā́n dabʰnuhi yé tvā dviṣánti //3//

Verse: 4 
Halfverse: a    ayáṃ te kr̥tyā́ṃ vítatām paúruṣeyād ayáṃ bʰayā́t /
Halfverse: c    ayáṃ tvā sárvasmāt pāpā́d varaṇó vārayiṣyate //4//

Verse: 5 
Halfverse: a    varaṇó vārayātā ayáṃ devó vánaspátiḥ /
Halfverse: c    yákṣmo yó asmínn ā́viṣṭas tám u devā́ avīvaran //5//

Verse: 6 
Halfverse: a    svápnaṃ suptvā́ yádi páśyāsi pāpáṃ mr̥gáḥ sr̥tíṃ yáti dʰā́vād ájuṣṭām /
Halfverse: c    parikṣavā́c cʰakúneḥ pāpavādā́d ayáṃ maṇír varaṇó vārayiṣyate //6//

Verse: 7 
Halfverse: a    árātyās tvā nírr̥tyā abʰicārā́d átʰo bʰayā́t /
Halfverse: c    mr̥tyór ójīyaso vadʰā́d varaṇó vārayiṣyate //7//

Verse: 8 
Halfverse: a    yán me mātā́ yán me pitā́ bʰrā́taro yác ca me svā́ yád énaś cakr̥mā́ vayám /
Halfverse: c    táto no vārayiṣyate 'yáṃ devó vánaspátiḥ //8//

Verse: 9 
Halfverse: a    varaṇéna právyatʰitā bʰrā́tr̥vyā me sábandʰavaḥ /
Halfverse: c    asū́rtaṃ rájo ápy agus té yantv adʰamáṃ támaḥ //9//

Verse: 10 
Halfverse: a    áriṣṭo 'hám áriṣṭagur ā́yuṣmānt sárvapūruṣaḥ /
Halfverse: c    tám māyáṃ varaṇó maṇíḥ pári pātu diśódiśaḥ //10// {7}

Verse: 11 
Halfverse: a    ayáṃ me varaṇá úrasi rā́jā devó vánaspátiḥ /
Halfverse: c    sá me śátrūn ví bādʰatām índro dásyūn ivā́surān //11//

Verse: 12 
Halfverse: a    imáṃ bibʰarmi varaṇám ā́yuṣmān cʰatáśāradaḥ /
Halfverse: c    sá me rāṣṭráṃ ca kṣatráṃ ca paśū́n ójaś ca me dadʰat //12//

Verse: 13 
Halfverse: a    yátʰā vā́to vánaspátīn vr̥kṣā́n bʰanákty ójasā /
Halfverse: c    evā́ sapátnān me bʰaṅgdʰi pū́rvān jātā́m̐ utā́parān varaṇás tvābʰí rakṣatu //13//

Verse: 14 
Halfverse: a    yátʰā vā́taś cāgníś ca vr̥kṣā́n psātó vánaspátīn /
Halfverse: c    evā́ sapátnān me psāhi pū́rvān jātā́m̐ utā́parān varaṇás tvābʰí rakṣatu //14//

Verse: 15 
Halfverse: a    yátʰā vā́tena prákṣīṇā vr̥kṣā́ḥ śére nyàrpitāḥ /
Halfverse: c    evā́ sapátnāṃs tváṃ máma prá kṣiṇīhi ny àrpaya /
Halfverse: e    pū́rvān jātā́m̐ utā́parān varaṇás tvābʰí rakṣatu //15//

Verse: 16 
Halfverse: a    tā́ṃs tváṃ prá cʰinddʰi varaṇa purā́ diṣṭā́t purā́yuṣaḥ /
Halfverse: c    yá enaṃ paśúṣu dípsanti yé cāsya rāṣṭradipsávaḥ //16//

Verse: 17 
Halfverse: a    yátʰā sū́ryo atibʰā́ti yátʰāsmin téja ā́hitam /
Halfverse: c    evā́ me varaṇó maṇíḥ kīrtíṃ bʰū́tiṃ ní yacʰatu /
Halfverse: e    téjasā mā sám ukṣatu yáśasā sám anaktu mā //17//

Verse: 18 
Halfverse: a    yátʰā yáśaś candrámasy ādityé ca nr̥cákṣasi /
Halfverse: c    evā́ me varaṇó maṇíḥ kīrtíṃ bʰū́tiṃ ní yacʰatu /
Halfverse: e    téjasā mā sám ukṣatu yáśasā sám anaktu mā //18//

Verse: 19 
Halfverse: a    yátʰā yáśaḥ pr̥tʰivyā́ṃ yátʰāsmín jātávedasi /
Halfverse: c    evā́ me varaṇó maṇíḥ kīrtíṃ bʰū́tiṃ ní yacʰatu /
Halfverse: e    téjasā mā sám ukṣatu yáśasā sám anaktu mā //19//

Verse: 20 
Halfverse: a    yátʰā yáśaḥ kanyā̀yāṃ yátʰāsmínt sáṃbʰr̥te rátʰe /
Halfverse: c    evā́ me varaṇó maṇíḥ kīrtíṃ bʰū́tiṃ ní yacʰatu /
Halfverse: e    téjasā mā sám ukṣatu yáśasā sám anaktu mā //20// {8}

Verse: 21 
Halfverse: a    yátʰā yáśaḥ somapītʰé madʰuparké yátʰā yáśaḥ /
Halfverse: c    evā́ me varaṇó maṇíḥ kīrtíṃ bʰū́tiṃ ní yacʰatu /
Halfverse: e    téjasā mā sám ukṣatu yáśasā sám anaktu mā //21//

Verse: 22 
Halfverse: a    yátʰā yáśo 'gnihotré vaṣaṭkāré yátʰā yáśaḥ /
Halfverse: c    evā́ me varaṇó maṇíḥ kīrtíṃ bʰū́tiṃ ní yacʰatu /
Halfverse: e    téjasā mā sám ukṣatu yáśasā sám anaktu mā //22//

Verse: 23 
Halfverse: a    yátʰā yáśo yájamāne yátʰāsmín yajñá ā́hitam /
Halfverse: c    evā́ me varaṇó maṇíḥ kīrtíṃ bʰū́tiṃ ní yacʰatu /
Halfverse: e    téjasā mā sám ukṣatu yáśasā sám anaktu mā //23//

Verse: 24 
Halfverse: a    yátʰā yáśaḥ prajā́patau yátʰāsmín parameṣṭʰíni /
Halfverse: c    evā́ me varaṇó maṇíḥ kīrtíṃ bʰū́tiṃ ní yacʰatu /
Halfverse: e    téjasā mā sám ukṣatu yáśasā sám anaktu mā //24//

Verse: 25 
Halfverse: a    yátʰā devéṣv amŕ̥taṃ yátʰaiṣu satyám ā́hitam /
Halfverse: c    evā́ me varaṇó maṇíḥ kīrtíṃ bʰū́tiṃ ní yacʰatu /
Halfverse: e    téjasā mā sám ukṣatu yáśasā sám anaktu mā //25// {9}

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.