TITUS
Atharva-Veda-Samhita (Saunaka)
Part No. 457
Previous part

Hymn: 4 
Verse: 1 
Halfverse: a    índrasya pratʰamó rátʰo devā́nām áparo rátʰo váruṇasya tr̥tī́ya ít /
Halfverse: c    áhīnām apamā́ rátʰa stʰānúm ārad átʰārṣat //1//

Verse: 2 
Halfverse: a    darbʰáḥ śocís tarū́ṇakam áśvasya vā́raḥ paruṣásya vā́raḥ /
Halfverse: c    rátʰasya bándʰuram //2//

Verse: 3 
Halfverse: a    áva śveta padā́ jahi pū́rveṇa cā́pareṇa ca /
Halfverse: c    udaplutám iva dā́rv áhīnām arasáṃ viṣáṃ vā́r ugrám //3//

Verse: 4 
Halfverse: a    araṃgʰuṣó nimájyonmája púnar abravīt /
Halfverse: c    udaplutám iva dā́rv áhīnām arasáṃ viṣáṃ vā́r ugrám //4//

Verse: 5 
Halfverse: a    paidvó hanti kasarṇī́laṃ paidváḥ śvitrám utā́sitám /
Halfverse: c    paidvó ratʰarvyā́ḥ śíraḥ sáṃ bibʰeda pr̥dākvā́ḥ //5//

Verse: 6 
Halfverse: a    paídva préhi pratʰamó 'nu tvā vayám émasi /
Halfverse: c    áhīn vy àsyatāt patʰó yéna smā vayám emási //6//

Verse: 7 
Halfverse: a    idáṃ paidvó ajāyatedám asya parā́yaṇam /
Halfverse: c    imā́ny árvataḥ padā́higʰnyó vājínīvataḥ //7//

Verse: 8 
Halfverse: a    sáṃyataṃ ná ví ṣparad vyā́ttaṃ ná sáṃ yamat /
Halfverse: c    asmín kṣétre dvā́v áhī strī́ ca púmāṃś ca tā́v ubʰā́v arasā́ //8//

Verse: 9 
Halfverse: a    arasā́sa ihā́hayo yé ánti yé ca dūraké /
Halfverse: c    gʰanéna hanmi vŕ̥ścikam áhiṃ daṇḍénā́gatam //9//

Verse: 10 
Halfverse: a    agʰāśvásyedáṃ bʰeṣajám ubʰáyo svajásya ca /
Halfverse: c    índro mé 'him agʰāyántam áhiṃ paidvó arandʰayat //10// {10}

Verse: 11 
Halfverse: a    paidvásya manmahe vayáṃ stʰirásya stʰirádʰāmnaḥ /
Halfverse: c    imé paścā́ pŕ̥dākavaḥ pradī́dʰyata āsate //11//

Verse: 12 
Halfverse: a    naṣṭā́savo naṣṭáviṣā hatā́ indreṇa vajríṇā /
Halfverse: c    jagʰā́néndro jagʰnimā́ vayám //12//

Verse: 13 
Halfverse: a    hatā́s tíraścirājayo nípiṣṭāsaḥ pŕ̥dākavaḥ /
Halfverse: c    dárviṃ kárikrataṃ śvitráṃ darbʰéṣv asitáṃ jahi //13//

Verse: 14 
Halfverse: a    kairātikā́ kumārikā́ sakā́ kʰánati bʰeṣajám /
Halfverse: c    hiraṇyáyībʰir ábʰribʰir girīnā́m úpa sā́nuṣu //14//

Verse: 15 
Halfverse: a    ā́yám agan yúvā bʰiṣák pr̥śnihā́parājitaḥ /
Halfverse: c    sá vaí svajásya jámbʰana ubʰáyor vŕ̥ścikasya ca //15//

Verse: 16 
Halfverse: a    índro mé 'him arandʰayan mitráś ca váruṇaś ca /
Halfverse: c    vātāparjanyóbʰā́ //16//

Verse: 17 
Halfverse: a    índro mé 'him arandʰayat pŕ̥dākuṃ ca pr̥dākvám /
Halfverse: c    svajáṃ tíraścirājiṃ kasarṇī́laṃ dáśonasim //17//

Verse: 18 
Halfverse: a    índro jagʰāna pratʰamáṃ janitā́ram ahe táva /
Halfverse: c    téṣām u tr̥hyámāṇānāṃ káḥ svit téṣām asad rásaḥ //18//

Verse: 19 
Halfverse: a    sáṃ hí śīrṣā́ṇy ágrabʰaṃ pauñjiṣṭʰá iva kárvaram /
Halfverse: c    síndʰor mádʰyaṃ parétya vy ànijam áher viṣám //19//

Verse: 20 
Halfverse: a    áhīnāṃ sárveṣāṃ viṣáṃ párā vahantu sindʰavaḥ /
Halfverse: c    hatā́s tíraścirājayo nípiṣṭāsaḥ pŕ̥dākavaḥ //20// {11}

Verse: 21 
Halfverse: a    óṣadʰīnām aháṃ vr̥ṇa urvárīr iva sādʰuyā́ /
Halfverse: c    náyāmy árvatīr ivā́he niraítu viṣám //21//

Verse: 22 
Halfverse: a    yád agnaú sū́rye viṣáṃ pr̥tʰivyā́m óṣadʰīṣu yát /
Halfverse: c    kāndāviṣáṃ kanáknakaṃ niraítv aítu te viṣám //22//

Verse: 23 
Halfverse: a    yé agnijā́ oṣadʰijā́ áhīnāṃ yé apsujā́ vidyúta ābabʰūvúḥ /
Halfverse: c    yéṣāṃ jātā́ni bahudʰā́ mahā́nti tébʰyaḥ sarpébʰyo námasā vidʰema //23//

Verse: 24 
Halfverse: a    taúdī nā́māsi kanyā̀ gʰr̥tā́cī nā́ma vā́ asi /
Halfverse: c    adʰaspadéna te padám ā́ dade viṣadū́ṣaṇam //24//

Verse: 25 
Halfverse: a    áṅgādaṅgāt prá cyāvaya hŕ̥dayam pári varjaya /
Halfverse: c    ádʰā viṣásya yát téjo 'vācī́naṃ tád etu te //25//

Verse: 26 
Halfverse: a    āré abʰūd viṣám araud viṣé viṣám aprāg ápi /
Halfverse: c    agnír viṣám áher nír adʰāt sómo nír aṇayīt /
Halfverse: e    daṃṣṭā́ram ánv agād viṣám áhir amr̥ta //26// {12}

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.