TITUS
Atharva-Veda-Samhita (Saunaka)
Part No. 458
Previous part

Hymn: 5 
Verse: 1 
Halfverse: a    índrasyaúja stʰéndrasya sáha stʰéndrasya bálaṃ stʰéndrasya vīryà1ṃ stʰéndrasya nr̥mṇáṃ stʰa /
Halfverse: c    jiṣṇáve yógāya brahmayogaír vo yunajmi //1//

Verse: 2 
Halfverse: a    índrasyaúja stʰéndrasya sáha stʰéndrasya bálaṃ stʰéndrasya vīryà1ṃ stʰéndrasya nr̥mṇáṃ stʰa /
Halfverse: c    jiṣṇáve yógāya kṣatrayogaír vo yunajmi //2//

Verse: 3 
Halfverse: a    índrasyaúja stʰéndrasya sáha stʰéndrasya bálaṃ stʰéndrasya vīryà1ṃ stʰéndrasya nr̥mṇáṃ stʰa /
Halfverse: c    jiṣṇáve yógāyendrayogaír vo yunajmi //3//

Verse: 4 
Halfverse: a    índrasyaúja stʰéndrasya sáha stʰéndrasya bálaṃ stʰéndrasya vīryà1ṃ stʰéndrasya nr̥mṇáṃ stʰa /
Halfverse: c    jiṣṇáve yógāya somayogaír vo yunajmi //4//

Verse: 5 
Halfverse: a    índrasyaúja stʰéndrasya sáha stʰéndrasya bálaṃ stʰéndrasya vīryà1ṃ stʰéndrasya nr̥mṇáṃ stʰa /
Halfverse: c    jiṣṇáve yógāyāpsuyogaír vo yunajmi //5//

Verse: 6 
Halfverse: a    índrasyaúja stʰéndrasya sáha stʰéndrasya bálaṃ stʰéndrasya vīryà1ṃ stʰéndrasya nr̥mṇáṃ stʰa /
Halfverse: c    jiṣṇáve yógāya víśvāni mā bʰūtā́ny úpa tiṣṭʰantu yuktā́ ma āpa stʰa //6//

Verse: 7 
Halfverse: a    agnér bʰāgá stʰa apā́ṃ śukrám āpo devīr várco asmā́su dʰatta /
Halfverse: c    prajā́pater vo dʰā́mnāsmaí lokā́ya sādaye //7//

Verse: 8 
Halfverse: a    índrasya bʰāgá stʰa apā́ṃ śukrám āpo devīr várco asmā́su dʰatta /
Halfverse: c    prajā́pater vo dʰā́mnāsmaí lokā́ya sādaye //8//

Verse: 9 
Halfverse: a    sómasya bʰāgá stʰa apā́ṃ śukrám āpo devīr várco asmā́su dʰatta /
Halfverse: c    prajā́pater vo dʰā́mnāsmaí lokā́ya sādaye //9//

Verse: 10 
Halfverse: a    váruṇasya bʰāgá stʰa apā́ṃ śukrám āpo devīr várco asmā́su dʰatta /
Halfverse: c    prajā́pater vo dʰā́mnāsmaí lokā́ya sādaye //10// {13}

Verse: 11 
Halfverse: a    mitrā́váruṇayor bʰāgá stʰa apā́ṃ śukrám āpo devīr várco asmā́su dʰatta /
Halfverse: c    prajā́pater vo dʰā́mnāsmaí lokā́ya sādaye //11//

Verse: 12 
Halfverse: a    yamásya bʰāgá stʰa apā́m śukrám āpo devīr várco asmā́su dʰatta /
Halfverse: c    prajā́pater vo dʰā́mnāsmaí lokā́ya sādaye //12//

Verse: 13 
Halfverse: a    pitr̥̄ṇā́ṃ bʰāgá stʰa apā́ṃ śukrám āpo devīr várco asmā́su dʰatta /
Halfverse: c    prajā́pater vo dʰā́mnāsmaí lokā́ya sādaye //13//

Verse: 14 
Halfverse: a    devásya savitúr bʰāgá stʰa apā́ṃ śukrám āpo devīr várco asmā́su dʰatta /
Halfverse: c    prajā́pater vo dʰā́mnāsmaí lokā́ya sādaye //14//

Verse: 15 
Halfverse: a    yó va āpo 'pā́ṃ bʰāgó 'psv àntár yajuṣyò devayájanaḥ /
Halfverse: c    idáṃ tám áti sr̥jāmi táṃ mā́bʰyávanikṣi /
Halfverse: e    téna tám abʰyátisr̥jāmo yò3 'smā́n dvéṣṭi yáṃ vayáṃ dviṣmáḥ /
Halfverse: g    táṃ vadʰeyaṃ táṃ str̥ṣīyānéna bráhmaṇānéna kármaṇānáyā menyā́ //15//

Verse: 16 
Halfverse: a    yó va āpo 'pā́m ūrmír apsv àntár yajuṣyò devayájanaḥ /
Halfverse: c    idáṃ tám áti sr̥jāmi táṃ mā́bʰyávanikṣi /
Halfverse: e    téna tám abʰyátisr̥jāmo yò3 'smā́n dvéṣṭi yáṃ vayáṃ dviṣmáḥ /
Halfverse: g    táṃ vadʰeyaṃ táṃ str̥ṣīyānéna bráhmaṇānéna kármaṇānáyā menyā́ //16//

Verse: 17 
Halfverse: a    yó va āpo 'pā́m vatsó 'psv àntár yajuṣyò devayájanaḥ /
Halfverse: c    idáṃ tám áti sr̥jāmi táṃ mā́bʰyávanikṣi /
Halfverse: e    téna tám abʰyátisr̥jāmo yò3 'smā́n dvéṣṭi yáṃ vayáṃ dviṣmáḥ /
Halfverse: g    táṃ vadʰeyaṃ táṃ str̥ṣīyānéna bráhmaṇānéna kármaṇānáyā menyā́ //17//

Verse: 18 
Halfverse: a    yó va āpo 'pā́ṃ vr̥ṣabʰó 'psv àntár yajuṣyò devayájanaḥ //
Halfverse: c    idáṃ tám áti sr̥jāmi táṃ mā́bʰyávanikṣi /
Halfverse: e    téna tám abʰyátisr̥jāmo yò3 'smā́n dvéṣṭi yáṃ vayáṃ dviṣmáḥ //
Halfverse: g    táṃ vadʰeyaṃ táṃ str̥ṣīyānéna bráhmaṇānéna kármaṇānáyā menyā́ //18//

Verse: 19 
Halfverse: a    yó va āpo 'pā́ṃ hiraṇyagarbʰó 'psv àntár yajuṣyò devayájanaḥ /
Halfverse: c    idáṃ tám áti sr̥jāmi táṃ mā́bʰyávanikṣi /
Halfverse: e    téna tám abʰyátisr̥jāmo yò3 'smā́n dvéṣṭi yáṃ vayáṃ dviṣmáḥ /
Halfverse: g    táṃ vadʰeyaṃ táṃ str̥ṣīyānéna bráhmaṇānéna kármaṇānáyā menyā́ //19//

Verse: 20 
Halfverse: a    yó va āpo 'pā́ṃ áśmā pŕ̥śnir divyó 'psv àntár yajuṣyò devayájanaḥ /
Halfverse: c    idáṃ tám áti sr̥jāmi táṃ mā́bʰyávanikṣi /
Halfverse: e    téna tám abʰyátisr̥jāmo yò3 'smā́n dvéṣṭi yáṃ vayáṃ dviṣmáḥ /
Halfverse: g    táṃ vadʰeyaṃ táṃ str̥ṣīyānéna bráhmaṇānéna kármaṇānáyā menyā́ //20// {14}

Verse: 21 
Halfverse: a    yó va āpo 'pā́ṃ agnáyo 'psv àntár yajuṣyò devayájanaḥ /
Halfverse: c    idáṃ tám áti sr̥jāmi táṃ mā́bʰyávanikṣi /
Halfverse: e    téna tám abʰyátisr̥jāmo yò3 'smā́n dvéṣṭi yáṃ vayáṃ dviṣmáḥ /
Halfverse: g    táṃ vadʰeyaṃ táṃ str̥ṣīyānéna bráhmaṇānéna kármaṇānáyā menyā́ //21//

Verse: 22 
Halfverse: a    yád arvācī́naṃ traihāyaṇā́d ánr̥taṃ kíṃ codimá /
Halfverse: c    ā́po mā tásmāt sárvasmād duritā́t pāntv áṃhasaḥ //22//

Verse: 23 
Halfverse: a    samudráṃ vaḥ prá hiṇomi svā́ṃ yónim ápītana /
Halfverse: c    áriṣṭāḥ sárvahāyaso mā́ ca naḥ kíṃ canā́mamat //23//

Verse: 24 
Halfverse: a    ariprā́ ā́po ápa riprám asmát /
Halfverse: c    prā́smád éno duritáṃ suprátīkāḥ prá duṣvápnyam prá málaṃ vahantu //24//

Verse: 25 
Halfverse: a    víṣṇoḥ krámo 'si sapatnahā́ pr̥tʰivī́saṃśito 'gnítejāḥ /
Halfverse: c    pr̥tʰivī́m ánu ví krame 'háṃ pr̥tʰivyā́s táṃ nír bʰajāmo yò3 'smā́n dvéṣṭi yáṃ vayáṃ dviṣmáḥ /
Halfverse: e    sá mā́ jīvīt táṃ prānó jahātu //25//

Verse: 26 
Halfverse: a    víṣṇoḥ krámo 'si sapatnahā́ntárikṣasaṃśito vāyútejāḥ /
Halfverse: c    antárikṣam ánu ví krame 'háṃ antárikṣāt táṃ nír bʰajāmo yò3 'smā́n dvéṣṭi yáṃ vayáṃ dviṣmáḥ /
Halfverse: e    sá mā́ jīvīt táṃ prānó jahātu //26//

Verse: 27 
Halfverse: a    víṣṇoḥ krámo 'si sapatnahā́ dyaúsaṃśitaḥ sū́ryatejāḥ /
Halfverse: c    dívam ánu ví krame 'háṃ divás táṃ nír bʰajāmo yò3 'smā́n dvéṣṭi yáṃ vayáṃ dviṣmáḥ /
Halfverse: e    sá mā́ jívīt táṃ prānó jahātu //27//

Verse: 28 
Halfverse: a    víṣṇoḥ krámo 'si sapatnahā́ díksaṃśito mánastejāḥ /
Halfverse: c    díśo ánu ví krame 'háṃ digbʰyás táṃ nír bʰajāmo yò3 'smā́n dvéṣṭi yáṃ vayáṃ dviṣmáḥ /
Halfverse: e    sá mā́ jīvīt táṃ prānó jahātu //28//

Verse: 29 
Halfverse: a    víṣṇoḥ krámo 'si sapatnahā́śāsaṃśito vā́tatejāḥ /
Halfverse: c    ā́śā ánu ví krame 'háṃ ā́śābʰyas táṃ nír bʰajāmo yò3 'smā́n dvéṣṭi yáṃ vayáṃ dviṣmáḥ /
Halfverse: e    sá mā́ jīvīt táṃ prānó jahātu //29//

Verse: 30 
Halfverse: a    víṣṇoḥ krámo 'si sapatnahā́ ŕ̥ksaṃśito sā́matejāḥ /
Halfverse: c    ŕ̥có 'nu ví krame 'háṃ r̥gbʰyás táṃ nír bʰajāmo yò3 'smā́n dvéṣṭi yáṃ vayáṃ dviṣmáḥ /
Halfverse: e    sá mā́ jīvīt táṃ prānó jahātu //30// {15}

Verse: 31 
Halfverse: a    víṣṇoḥ krámo 'si sapatnahā́ yajñásaṃśito bráhmatejāḥ /
Halfverse: c    yajñám ánu ví krame 'háṃ yajñā́t táṃ nír bʰajāmo yò3 'smā́n dvéṣṭi yáṃ vayáṃ dviṣmáḥ /
Halfverse: e    sá mā́ jīvīt táṃ prānó jahātu //31//

Verse: 32 
Halfverse: a    víṣṇoḥ krámo 'si sapatnahaúṣadʰīsaṃśito sómatejāḥ /
Halfverse: c    óṣadʰīr ánu ví krame 'háṃ óṣadʰībʰyas táṃ nír bʰajāmo yò3 'smā́n dvéṣṭi yáṃ vayáṃ dviṣmáḥ /
Halfverse: e    sá mā́ jīvīt táṃ prānó jahātu //32//

Verse: 33 
Halfverse: a    víṣṇoḥ krámo 'si sapatnahā́psúsaṃśito váruṇatejāḥ /
Halfverse: c    apó 'nu ví krame 'háṃ adbʰyás táṃ nír bʰajāmo yò3 'smā́n dvéṣṭi yáṃ vayáṃ dviṣmáḥ /
Halfverse: e    sá mā́ jīvīt táṃ prānó jahātu //33//

Verse: 34 
Halfverse: a    víṣṇoḥ krámo 'si sapatnahā́ kr̥ṣísaṃśitó 'nnatejāḥ /
Halfverse: c    kr̥ṣím ánu ví krame 'háṃ kr̥ṣyā́s táṃ nír bʰajāmo yò3 'smā́n dvéṣṭi yáṃ vayáṃ dviṣmáḥ /
Halfverse: e    sá mā́ jīvīt táṃ prānó jahātu //34//

Verse: 35 
Halfverse: a    vísṇoḥ krámo 'si sapatnahā́ prāṇásaṃśitaḥ púruṣatejāḥ /
Halfverse: c    prāṇám ánu ví krame 'háṃ prāṇā́t táṃ nír bʰajāmo yò3 'smā́n dvéṣṭi yáṃ vayáṃ dviṣmáḥ /
Halfverse: e    sá mā́ jīvīt táṃ prānó jahātu //35//

Verse: 36 
Halfverse: a    jitám asmā́kam údbʰinnam asmā́kam abʰy àṣṭʰāṃ víśvāḥ pŕ̥tanā árātīḥ /
Halfverse: c    idám ahám āmuṣyāyaṇásyāmúṣyāḥ putrásya várcas téjaḥ prāṇám ā́yur ní veṣṭayāmīdám enam adʰarā́ñcaṃ pādayāmi //36//

Verse: 37 
Halfverse: a    sū́ryasyāvŕ̥tam anvā́varte dákṣiṇām ánv āvŕ̥tam /
Halfverse: c    sā́ me dráviṇaṃ yacʰatu sā́ me brāhmaṇavarcasám //37//

Verse: 38 
Halfverse: a    díśo jyótiṣmatīr abʰyā́varte /
Halfverse: c    tā́ me dráviṇaṃ yacʰantu tā́ me brāhmaṇavarcasám //38//

Verse: 39 
Halfverse: a    saptar̥ṣī́n abʰyā́varte /
Halfverse: c    té me dráviṇaṃ yacʰantu té me brāhmaṇavarcasám //39//

Verse: 40 
Halfverse: a    bráhmābʰyā́varte /
Halfverse: c    tán me dráviṇaṃ yacʰantu tán me brāhmaṇavarcasám //40// {16}

Verse: 41 
Halfverse: a    brāhmaṇā́m̐ abʰyā́varte /
Halfverse: c    té me dráviṇaṃ yacʰantu té me brāhmaṇavarcasám //41//

Verse: 42 
Halfverse: a    yám vayáṃ mr̥gáyāmahe táṃ vadʰaí str̥ṇavāmahai /
Halfverse: c    vyā́tte parameṣṭʰíno bráhmaṇā́pīpadāma tám //42//

Verse: 43 
Halfverse: a    vaiśvānarásya dáṃṣṭrābʰyāṃ hetís táṃ sám adʰāt abʰí /
Halfverse: c    iyáṃ táṃ psātv ā́hutiḥ samíd devī́ sáhīyasī //43//

Verse: 44 
Halfverse: a    rā́jño váruṇasya bandʰó 'si /
Halfverse: c    só 'múm āmuṣyāyaṇám amúṣyāḥ putrám ánne prāṇé badʰāna //44//

Verse: 45 
Halfverse: a    yát te ánnaṃ bʰuvas pata ākṣiyáti pr̥tʰivī́m ánu /
Halfverse: c    tásya nas tváṃ bʰuvas pate saṃpráyacʰa prajāpate //45//

Verse: 46 
Halfverse: a    apó divyā́ acāyiṣaṃ rásena sám apr̥kṣmahi /
Halfverse: c    páyasvān agna ā́gamaṃ táṃ mā sáṃ sr̥ja várcasā //46//

Verse: 47 
Halfverse: a    sáṃ māgne várcasā sr̥ja sáṃ prajáyā sám ā́yuṣā /
Halfverse: c    vidyúr me asyá devā́ índro vidyāt sahá ŕ̥ṣibʰiḥ //47//

Verse: 48 
Halfverse: a    yád agne adyá mitʰunā́ śápato yád vācás tr̥ṣṭáṃ janáyanta rebʰā́ḥ /
Halfverse: c    manyór mánasaḥ śaravyā̀3 jā́yate yā́ táyā vidʰya hŕ̥daye yātudʰā́nān //48//

Verse: 49 
Halfverse: a    párā śr̥ṇīhi tápasā yātudʰā́nān párāgne rákṣo hárasā śr̥ṇīhi /
Halfverse: c    párārciṣā mū́radevāṃ cʰr̥ṇīhi párāsutŕ̥paḥ śóśucataḥ śr̥ṇīhi //49//

Verse: 50 
Halfverse: a    apā́m asmai vájraṃ prá harāmi cáturbʰr̥ṣṭiṃ śīrṣabʰidyāya vidvā́n /
Halfverse: c    só asyā́ṅgāni prá śr̥ṇātu sárvā tán me devā́ ánu jānantu víśve //50// {17}

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.