TITUS
Atharva-Veda-Samhita (Saunaka)
Part No. 459
Previous part

Hymn: 6 
Verse: 1 
Halfverse: a    arātīyór bʰrā́tr̥vyasya durhā́rdo dviṣatáḥ śíraḥ /
Halfverse: c    ápi vr̥ścāmy ójasā //1//

Verse: 2 
Halfverse: a    várma máhyam ayáṃ maṇíḥ pʰā́lāj jātáḥ kariṣyati /
Halfverse: c    pūrṇó mantʰéna mā́gamad rásena sahá várcasā //2//

Verse: 3 
Halfverse: a    yát tvā śikváḥ parā́vadʰīt tákṣā hástena vā́syā /
Halfverse: c    ā́pas tvā tásmaj jīvalā́ḥ punántu śúcayaḥ śúcim //3//

Verse: 4 
Halfverse: a    híraṇyasrag ayáṃ maṇíḥ śraddʰā́ṃ yajñáṃ máho dádʰat /
Halfverse: c    gr̥hé vasatu nó 'titʰiḥ //4//

Verse: 5 
Halfverse: a    tásmai gʰr̥táṃ súraṃ mádʰv ánnamannam kṣadāmahe /
Halfverse: c    sá naḥ pitéva putrébʰyaḥ śréyaḥśreyaś cikitsatu bʰū́yobʰūyaḥ śváḥśvo devébʰyo maṇír étya //5//

Verse: 6 
Halfverse: a    yám ábadʰnād bŕ̥haspátir maṇíṃ pʰā́laṃ gʰr̥taścútam ugráṃ kadʰirám ójase /
Halfverse: c    tám agníḥ práty amuñcata só asmai duha ā́jyaṃ bʰū́yobʰūyaḥ śváḥśvas téna tváṃ dviṣató jahi //6//

Verse: 7 
Halfverse: a    yám ábadʰnād bŕ̥haspátir maṇíṃ pʰā́laṃ gʰr̥taścútam ugráṃ kadʰirám ójase /
Halfverse: c    tám índraḥ práty amuñcataújase vīryā̀ya kám /
Halfverse: e    só asmai bálam íd duhe bʰū́yobʰūyaḥ śváḥśvas téna tváṃ dviṣató jahi //7//

Verse: 8 
Halfverse: a    yám ábadʰnād bŕ̥haspátir maṇíṃ pʰā́laṃ gʰr̥taścútam ugrám kadʰirám ójase /
Halfverse: c    táṃ sómaḥ práty amuñcata mahé śrótrāya cákṣase /
Halfverse: e    só asmai várca íd duhe bʰū́yobʰūyaḥ śváḥśvas téna tvám dviṣató jahi //8//

Verse: 9 
Halfverse: a    yám ábadʰnād bŕ̥haspátir maṇíṃ pʰā́laṃ gʰr̥taścútam ugráṃ kʰadirám ójase /
Halfverse: c    táṃ sū́ryaḥ práty amuñcata ténemā́ ajayad díśaḥ /
Halfverse: e    só asmai bʰū́tim íd duhe bʰū́yobʰūyaḥ śváḥśvas téna tváṃ dviṣató jahi //9//

Verse: 10 
Halfverse: a    yám ábadʰnād bŕ̥haspátir maṇíṃ pʰā́laṃ gʰr̥taścútam ugrám kʰadirám ójase /
Halfverse: c    tám bíbʰrac candrámā maṇím ásurāṇāṃ púro 'jayad dānavā́nāṃ hiraṇyáyīḥ /
Halfverse: e    só asmai śríyam íd duhe bʰū́yobʰūyaḥ śváḥśvas téna tváṃ dviṣató jahi //10// {18}

Verse: 11 
Halfverse: a    yám ábadʰnād bŕ̥haspátir vā́tāya maṇím āśáve /
Halfverse: c    só asmai vājínam íd duhe bʰū́yobʰūyaḥ śváḥśvas téna tváṃ dviṣató jahi //11//

Verse: 12 
Halfverse: a    yám ábadʰnād bŕ̥haspátir vā́tāya maṇím āśáve /
Halfverse: c    ténemā́ṃ maṇínā kr̥ṣím aśvínāv abʰí rakṣataḥ /
Halfverse: e    sá bʰiṣágbʰyāṃ máho duhe bʰū́yobʰūyaḥ śváḥśvas téna tváṃ dviṣató jahi //12//

Verse: 13 
Halfverse: a    yám ábadʰnād bŕ̥haspátir vā́tāya maṇím āśáve /
Halfverse: c    tám bíbʰrat savitā́ maṇíṃ ténedám ajayat svàḥ /
Halfverse: e    só asmai sūnŕ̥tāṃ duhe bʰū́yobʰūyaḥ śváḥśvas téna tváṃ dviṣató jahi //13//

Verse: 14 
Halfverse: a    yám ábadʰnād bŕ̥haspátir vā́tāya maṇím āśáve /
Halfverse: c    tám ā́po bíbʰratīr maṇíṃ sádā dʰāvanty ákṣitāḥ /
Halfverse: e    sá ābʰyo 'mŕ̥tam íd duhe bʰū́yobʰūyaḥ śváḥśvas téna tváṃ dviṣató jahi //14//

Verse: 15 
Halfverse: a    yám ábadʰnād bŕ̥haspátir vā́tāya maṇím āśáve /
Halfverse: c    tám rā́jā váruṇo maṇíṃ práty amuñcata śaṃbʰúvam /
Halfverse: e    só asmai satyám íd duhe bʰū́yobʰūyaḥ śváḥśvas téna tváṃ dviṣató jahi //15//

Verse: 16 
Halfverse: a    yám ábadʰnād bŕ̥haspátir vā́tāya maṇím āśáve /
Halfverse: c    táṃ devā́ bíbʰrato maṇíṃ sárvāṃl lokā́n yudʰā́jayan /
Halfverse: e    sá ebʰyo jítim íd duhe bʰū́yobʰūyaḥ śváḥśvas téna tváṃ dviṣató jahi //16//

Verse: 17 
Halfverse: a    yám ábadʰnād bŕ̥haspátir vā́tāya maṇím āśáve /
Halfverse: c    tám imáṃ devátā maṇíṃ práty amuñcanta śambʰúvam /
Halfverse: e    sá ābʰyo víśvam íd duhe bʰū́yobʰūyaḥ śváḥśvas téna tváṃ dviṣató jahi //17//

Verse: 18 
Halfverse: a    r̥távas tám abadʰnatārtavā́s tám abadʰnata /
Halfverse: c    saṃvatsarás táṃ baddʰvā́ sárvaṃ bʰūtáṃ ví rakṣati //18//

Verse: 19 
Halfverse: a    antardeśā́ abadʰnata pradíśas tám abadʰnata /
Halfverse: c    prajā́patisr̥ṣṭo maṇír dviṣató mé 'dʰarām̐ akaḥ //19//

Verse: 20 
Halfverse: a    átʰarvāṇo abadʰnatātʰarvaṇā́ abadʰnata /
Halfverse: c    taír medíno áṅgiraso dásyūnāṃ bibʰiduḥ púras téna tvám dviṣató jahi //20// {19}

Verse: 21 
Halfverse: a    táṃ dʰātā́ práty amuñcata sá bʰūtáṃ vy àkalpayat /
Halfverse: c    téna tváṃ dviṣató jahi //21//

Verse: 22 
Halfverse: a    yám ábadʰnād bŕ̥haspátir devébʰyo ásurakṣitim /
Halfverse: c    sá māyáṃ maṇír ā́gamad rásena sahá várcasā //22//

Verse: 23 
Halfverse: a    yám ábadʰnād bŕ̥haspátir devébʰyo ásurakṣitim /
Halfverse: c    sá māyáṃ maṇír ā́gamat sahá góbʰir ajāvíbʰir ánnena prajáyā sahá //23//

Verse: 24 
Halfverse: a    yám ábadʰnād bŕ̥haspátir devébʰyo ásurakṣitim /
Halfverse: c    sá māyáṃ maṇír ā́gamat sahá vrīhiyavā́bʰyāṃ máhasā bʰū́tyā sahá //24//

Verse: 25 
Halfverse: a    yám ábadʰnād bŕ̥haspátir devébʰyo ásurakṣitim /
Halfverse: c    sá māyáṃ maṇír ā́gaman mádʰor gʰr̥tásya dʰā́rayā kīlā́lena maṇíḥ sahá //25//

Verse: 26 
Halfverse: a    yám ábadʰnād bŕ̥haspátir devébʰyo ásurakṣitim /
Halfverse: c    sá māyáṃ maṇír ā́gamad ūrjáyā páyasā sahá dráviṇena śriyā́ sahá //26//

Verse: 27 
Halfverse: a    yám ábadʰnād bŕ̥haspátir devébʰyo ásurakṣitim /
Halfverse: c    sá māyáṃ maṇír ā́gamat téjasā tvíṣyā sahá yáśasā kīrtyā̀ sahá //27//

Verse: 28 
Halfverse: a    yám ábadʰnād bŕ̥haspátir devébʰyo ásurakṣitim /
Halfverse: c    sá māyáṃ maṇír ā́gamat sárvābʰir bʰū́tibʰiḥ sahá //28//

Verse: 29 
Halfverse: a    tám imáṃ devátā maṇíṃ máhyaṃ dadatu púṣṭaye /
Halfverse: c    abʰibʰúṃ kṣatravárdʰanaṃ sapatnadámbʰanaṃ maṇím //29//

Verse: 30 
Halfverse: a    bráhmaṇā téjasā sahá práti muñcāmi me śivám /
Halfverse: c    asapatnáḥ sapatnahā́ sapátnān mé 'dʰarām̐ akaḥ //30// {20}

Verse: 31 
Halfverse: a    úttaraṃ dviṣató mā́m ayáṃ maṇíḥ kr̥ṇotu devajā́ḥ /
Halfverse: c    yásya lokā́ imé tráyaḥ páyo dugdʰám upā́sate /
Halfverse: e    sá māyám ádʰi rohatu maṇíḥ śraíṣṭʰyāya mūrdʰatáḥ //31//

Verse: 32 
Halfverse: a    yáṃ devā́ḥ pitáro manuṣyā̀ upajī́vanti sarvadā́ /
Halfverse: c    sá māyám ádʰi rohatu maṇíḥ śraíṣṭʰyāya mūrdʰatáḥ //32//

Verse: 33 
Halfverse: a    yátʰā bī́jam urvárāyāṃ kr̥ṣṭé pʰā́lena róhati /
Halfverse: c    evā́ máyi prajā́ paśávó 'nnamannaṃ ví rohatu //33//

Verse: 34 
Halfverse: a    yásmai tvā yajñavardʰana máṇe pratyámucaṃ śivám /
Halfverse: c    táṃ tváṃ śatadakṣiṇa máṇe śraiṣṭʰyāya jinvatāt //34//

Verse: 35 
Halfverse: a    etám idʰmáṃ samā́hitaṃ juṣaṇó ágne práti harya hómaiḥ /
Halfverse: c    tásmin vidʰema sumatíṃ svastí prajā́m cákṣuḥ paśū́nt sámiddʰe jātávedasi bráhmaṇā //35// {21}

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.