TITUS
Atharva-Veda-Samhita (Saunaka)
Part No. 464
Previous part

Book: 11 
Hymn: 1 


Verse: 1 
Halfverse: a    ágne jā́yasvā́ditir nātʰitéyáṃ brahmaudanáṃ pacati putrákāmā /
Halfverse: c    saptar̥ṣáyo bʰūtakŕ̥tas té tvā mantʰantu prajáyā sahéha //

Verse: 2 
Halfverse: a    kr̥ṇutá dʰūmáṃ vr̥ṣaṇaḥ sakʰāyó 'drogʰāvitā vā́cam ácʰa /
Halfverse: c    ayám agníḥ pr̥tanāṣā́t suvī́ro yéna devā́ ásahanta dásyūn //

Verse: 3 
Halfverse: a    ágné 'janiṣṭʰā mahaté vīryā̀ya brahmaudanā́ya páktave jātavedaḥ /
Halfverse: c    saptar̥ṣáyo bʰūtakŕ̥tas té tvājījanann asyaí rayíṃ sárvavīraṃ ní yacʰa //

Verse: 4 
Halfverse: a    sámiddʰo agne samídʰā sám idʰyasva vidvā́n devā́n yajñíyām̐ éhá vakṣaḥ /
Halfverse: c    tébʰyo havíḥ śrapáyaṃ jātaveda uttamáṃ nā́kam ádʰi rohayemám //

Verse: 5 
Halfverse: a    tredʰā́ bʰāgó níhito yáḥ purā́ vo devā́nāṃ pitr̥̄ṇā́ṃ mártyānām /
Halfverse: c    áṃśān jānīdʰvaṃ ví bʰajāmi tā́n vo yó devā́nāṃ sá imā́ṃ pārayāti //

Verse: 6 
Halfverse: a    ágne sáhasvān abʰibʰū́r abʰī́d asi nī́co ny ùbja dviṣatáḥ sapátnān /
Halfverse: c    iyáṃ mā́trā mīyámānā mitā́ ca sajātā́ṃs te balihŕ̥taḥ kr̥ṇotu //

Verse: 7 
Halfverse: a    sākáṃ sajātaíḥ páyasā sahaídʰy úd ubjaināṃ mahaté vīryā̀ya /
Halfverse: c    ūrdʰvó nā́kasyā́dʰi roha viṣṭápaṃ svargó loká íti yáṃ vádanti    //

Verse: 8 
Halfverse: a    iyáṃ mahī́ práti gr̥hṇātu cárma pr̥tʰivī́ devī́ sumanasyámānā /
Halfverse: c    átʰa gacʰema sukr̥tásya lokám //

Verse: 9 
Halfverse: a    etaú grā́vāṇau sayújā yuṅgdʰi cármaṇi nírbindʰy aṃśū́n yájamānāya sādʰú /
Halfverse: c    nír avagʰnatī́ ní jahi yá imā́ṃ pr̥tanyáva ūrdʰváṃ prajā́m udbʰaranty úd ūha //

Verse: 10 
Halfverse: a    gr̥hāṇá grā́vāṇau sakŕ̥tau vīra hásta ā́ te devā́ yajñíyā yajñám aguḥ /
Halfverse: c    tráyo várā yatamā́ṃs tváṃ vr̥ṇīṣé tā́s te sámr̥ddʰīr ihá rādʰayāmi // {1}

Verse: 11 
Halfverse: a    iyáṃ te dʰītír idám u te janítraṃ gr̥hṇā́tu tvā́m áditiḥ śū́raputrā /
Halfverse: c    párā punīhi yá imā́ṃ pr̥tanyávo 'syaí rayíṃ sárvavīraṃ ní yacʰa //

Verse: 12 
Halfverse: a    upaśvasé druváye sīdatā yūyáṃ ví vicyadʰvaṃ yajñiyāsas túṣaiḥ /
Halfverse: c    śriyā́ samānā́n áti sárvānt syāmādʰaspadáṃ dviṣatás pādayāmi //

Verse: 13 
Halfverse: a    párehi nāri púnar éhi kṣiprám apā́ṃ tvā goṣṭʰó 'dʰy arukṣad bʰárāya /
Halfverse: c    tā́sāṃ gr̥hṇītād yatamā́ yajñíyā ásan vibʰā́jya dʰīrī́tarā jahītāt //

Verse: 14 
Halfverse: a    émā́ agur yoṣítaḥ śúmbʰamānā út tiṣṭʰa nāri tavásaṃ rabʰasva /
Halfverse: c    supátnī pátyā prajáyā prajā́vaty ā́ tvāgan yajñáḥ práti kumbʰáṃ gr̥bʰāya //

Verse: 15 
Halfverse: a    ūrjó bʰāgó níhito yáḥ purā́ va ŕ̥ṣipraśiṣṭāpá ā́ bʰaraitā́ḥ /
Halfverse: c    ayáṃ yajó gātuvín nātʰavít prajāvíd ugráḥ paśuvíd vīravíd vo astu //

Verse: 16 
Halfverse: a    ágne carúr yajñíyas tvā́dʰy arukṣac cʰúcis tápiṣṭʰas tápasā tapainam /
Halfverse: c    ārṣeyā́ daivā́ abʰisaṃgátya bʰāgám émáṃ tápiṣṭʰā r̥túbʰis tapantu //

Verse: 17 
Halfverse: a    śuddʰā́ḥ putā́ yoṣíto yajñíyā imā́ ā́paś carúm áva sarpantu śubʰrā́ḥ /
Halfverse: c    áduḥ prajā́ṃ bahulā́n paśū́n naḥ paktaúdanásya sukŕ̥tām etu lokám //

Verse: 18 
Halfverse: a    bráhmaṇā śuddʰā́ utá pūtā́ gʰr̥téna sómasyāṃśávas taṇḍulā́ yajñíyā imé /
Halfverse: c    apáḥ prá viśata práti gr̥hṇātu vaś carúr imáṃ paktvā́ sukŕ̥tām eta lokám //

Verse: 19 
Halfverse: a    urúḥ pratʰasva mahatā́ mahimnā́ sahásrapr̥ṣṭʰaḥ sukr̥tásya loké /
Halfverse: c    pitāmahā́ḥ pitáraḥ prajópajā́háṃ paktā́ pañcadaśás te asmi //

Verse: 20 
Halfverse: a    sahásrapr̥ṣṭʰaḥ śatádʰāro ákṣito brahmaudanó devayā́naḥ svargáḥ /
Halfverse: c    amū́ṃs ta ā́ dadʰāmi prajáyā reṣayainān balihārā́ya mr̥ḍatān máhyam evá // {2}

Verse: 21 
Halfverse: a    udéhi védiṃ prajáyā vardʰayaināṃ nudásva rákṣaḥ prataráṃ dʰehy enām /
Halfverse: c    śriyā́ samānā́n áti sárvānt syāmādʰaspadáṃ dviṣatás pādayāmi //

Verse: 22 
Halfverse: a    abʰyā́vartasva paśúbʰiḥ sahaínāṃ pratyáṅ enāṃ devátābʰiḥ sahaídʰi /
Halfverse: c    mā́ tvā prā́pac cʰapátʰo mā́bʰicāráḥ své kṣétre anamīvā́ ví rāja //

Verse: 23 
Halfverse: a    r̥téna taṣṭā́ mánasā hitaíṣā́ brahmaudanásya víhitā védir ágre /
Halfverse: c    aṃsadrī́ṃ śuddʰā́m úpa dʰehi nāri tátraudanáṃ sādaya daivā́nām //

Verse: 24 
Halfverse: a    áditer hástāṃ srúcam etā́ṃ dvitī́yāṃ saptar̥ṣáyo bʰūtakŕ̥to yā́m ákr̥ṇvan /
Halfverse: c    sā́ gā́trāṇi vidúṣy odanásya dárvir védyām ádʰy enaṃ cinotu //

Verse: 25 
Halfverse: a    śr̥táṃ tvā havyám úpa sīdantu daivā́ niḥsŕ̥pyāgnéḥ púnar enān prá sīda /
Halfverse: c    sómena pūtó jatʰáre sīda brahmáṇām ārṣeyā́s te mā́ riṣan prāśitā́raḥ //

Verse: 26 
Halfverse: a    sóma rājant saṃjñā́nam ā́ vapaibʰyaḥ súbrāhmaṇā yatamé tvopasī́dān /
Halfverse: c    ŕ̥ṣīn ārṣeyā́ṃs tápasó 'dʰi jātā́n brahmaudané suhávā johavīmi //

Verse: 27 
Halfverse: a    śuddʰā́ḥ pūtā́ yosíto yajñíyā imā́ brahmáṇāṃ hásteṣu prapr̥tʰáḥ sādayāmi /
Halfverse: c    yátkāma idám abʰiṣiñcā́mi vo 'hám índro marútvānt sá dadāt idám me //

Verse: 28 
Halfverse: a    idáṃ me jyótir amŕ̥taṃ híraṇyaṃ pakváṃ kṣétrāt kāmadúgʰā ma eṣā́ /
Halfverse: c    idáṃ dʰánaṃ ní dadʰe brāhmaṇéṣu kr̥ṇvé pántʰāṃ pitŕ̥ṣu yáḥ svargáḥ //

Verse: 29 
Halfverse: a    agnaú túṣān ā́ vapa jātávedasi paráḥ kambū́kām̐ ápa mr̥ḍḍʰi dūrám /
Halfverse: c    etáṃ śuśruma gr̥harājásya bʰāgám átʰo vidma nírr̥ter bʰāgadʰéyam //

Verse: 30 
Halfverse: a    śrā́myataḥ pácato viddʰi sunvatáḥ pántʰāṃ svargám ádʰi rohayainam /
Halfverse: c    yéna róhāt páram āpádya yád váya uttamáṃ nā́kaṃ paramáṃ vyòma // {3}

Verse: 31 
Halfverse: a    babʰrér adʰvaryo múkʰam etád ví mr̥ḍḍʰy ā́jyāya lokáṃ kr̥ṇuhi pravidvā́n /
Halfverse: c    gʰr̥téna gā́trā́nu sárvā ví mr̥ḍḍʰi kr̥ṇvé pántʰāṃ pitŕ̥ṣu yáḥ svargáḥ //

Verse: 32 
Halfverse: a    bábʰre rákṣaḥ samádam ā́ vapaibʰyó 'brāhmaṇā yatamé tvopasī́dān /
Halfverse: c    purīṣíṇaḥ prátʰamānāḥ purástād ārṣeyā́s te mā́ riṣan prāśitā́raḥ //

Verse: 33 
Halfverse: a    ārṣeyéṣu ní dadʰa odana tvā nā́nārṣeyāṇām ápy asty átra /
Halfverse: c    agnír me goptā́ marútaś ca sárve víśve devā́ abʰí rakṣantu pakvám //

Verse: 34 
Halfverse: a    yajñáṃ dúhānaṃ sádam ít prápīnaṃ púmāṃsaṃ dʰenúṃ sádanaṃ rayīṇā́m /
Halfverse: c    prajāmr̥tatvám utá dīrgʰám ā́yu rāyáś ca póṣair úpa tvā sadema //

Verse: 35 
Halfverse: a    vr̥ṣabʰó 'si svargá ŕ̥ṣīn ārṣeyā́n gacʰa /
Halfverse: c    sukŕ̥tāṃ loké sīda tátra nau saṃskr̥tám //

Verse: 36 
Halfverse: a    samā́cinuṣvānusampráyāhy ágne patʰáḥ kalpaya devayā́nān /
Halfverse: c    etaíḥ sukr̥taír ánu gacʰema yajñáṃ nā́ke tíṣṭʰantam ádʰi saptáraśmau //

Verse: 37 
Halfverse: a    yéna devā́ jyótiṣā dyā́m udā́yan brahmaudanáṃ paktvā́ sukr̥tásya lokám /
Halfverse: c    téna geṣma sukr̥tásya lokáṃ svàr āróhanto abʰí nā́kam uttamám // {4}


Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.