TITUS
Atharva-Veda-Samhita (Saunaka)
Part No. 472
Previous part

Hymn: 9_[11] 


Verse: 1 
Halfverse: a    yé bāhávo yā́ íṣavo dʰánvanāṃ vīryā̀ṇi ca /
Halfverse: c    asī́n paraśū́n ā́yudʰaṃ cittākūtáṃ ca yád dʰr̥dí /
Halfverse: e    sárvaṃ tád arbude tvám amítrebʰyo dr̥śé kurūdārā́ṃś ca prá darśaya //

Verse: 2 
Halfverse: a    út tiṣṭʰata sáṃ nahyadʰvaṃ mítrā dévajanā yūyám /
Halfverse: c    sáṃdr̥ṣṭā guptā́ vaḥ santu yā́ no mitrā́ṇy arbude //

Verse: 3 
Halfverse: a    út tiṣṭʰatam ā́ rabʰetām ādānasaṃdānā́bʰyām /
Halfverse: c    amítrāṇāṃ sénā abʰí dʰattam arbude //

Verse: 4 
Halfverse: a    árbudir nā́ma yó devá ī́śānaś ca nyàrbudiḥ /
Halfverse: c    yā́bʰyām antárikṣam ā́vr̥tam iyáṃ ca pr̥tʰivī́ mahī́ /
Halfverse: e    tā́bʰyām índramedibʰyām aháṃ jitám ánv emi sénayā //

Verse: 5 
Halfverse: a    út tiṣṭʰa tváṃ devajanā́rbude sénayā sahá /
Halfverse: c    bʰañjánn amítrāṇāṃ sénām bʰogébʰiḥ pári vāraya //

Verse: 6 
Halfverse: a    saptá jātā́n nyàrbuda udārā́ṇāṃ samīkṣáyan /
Halfverse: c    tébʰiṣ ṭvám ā́jye huté sárvair út tiṣṭʰa sénayā //

Verse: 7 
Halfverse: a    pratigʰnānā́śrumukʰī́ kr̥dʰukarṇī́ ca krośatu /
Halfverse: c    vikeśī́ púruṣe haté radité arbude táva //

Verse: 8 
Halfverse: a    saṃkárṣantī karū́karaṃ mánasā putrám icʰántī /
Halfverse: c    pátiṃ bʰrā́taram ā́t svā́n radité arbude táva //

Verse: 9 
Halfverse: a    alíklavā jāṣkamadā́ gŕ̥dʰrāḥ śyenā́ḥ patatríṇaḥ /
Halfverse: c    dʰvā́ṅkṣāḥ śakúnayas tr̥pyantv amítreṣu samīkṣáyan radité arbude táva //

Verse: 10 
Halfverse: a    átʰo sárvaṃ śvā́padaṃ mákṣikā tr̥pyatu krímiḥ /
Halfverse: c    paúruṣeyé 'dʰi kúṇape radité arbude táva // {25}

Verse: 11 
Halfverse: a    ā́ gr̥hṇītaṃ sáṃ br̥hataṃ prānāpānā́n nyarbude /
Halfverse: c    nivāśā́ gʰóṣāḥ sáṃ yantv amítreṣu samīkṣáyan radité arbude táva //

Verse: 12 
Halfverse: a    úd vepaya sáṃ vijantāṃ bʰiyāmítrānt sáṃ sr̥ja /
Halfverse: c    urugrāhaír bāhvaṅkaír vídʰyāmitrān nyarbude //

Verse: 13 
Halfverse: a    múhyantv eṣāṃ bāhávaś cittākūtáṃ ca yád dʰr̥dí /
Halfverse: c    maíṣām úc cʰeṣi kíṃ caná radité arbude táva //

Verse: 14 
Halfverse: a    pratigʰnānā́ḥ sáṃ dʰāvantū́raḥ paṭūrā́v āgʰnānā́ḥ /
Halfverse: c    agʰāríṇīr vikeśyò rudatyàḥ púruṣe haté radité arbude táva //

Verse: 15 
Halfverse: a    śvànvatīr apsaráso rū́pakā utā́rbude /
Halfverse: c    antaḥpātré rérihatīṃ riśā́ṃ durṇihitaiṣíṇīm /
Halfverse: e    sárvās tā́ arbude tvám amítrebʰyo dr̥śé kurūdārā́ṃś ca prá darśaya //

Verse: 16 
Halfverse: a    kʰadū́re 'dʰicaṅkramā́ṃ kʰárvikāṃ kʰarvavāsínīm /
Halfverse: c    yá udārā́ antárhitā gandʰarvāpsarásaś ca yé sarpā́ itarajanā́ rákṣāṃsi //

Verse: 17 
Halfverse: a    cáturdamṣṭrāṃ cʰyāvádataḥ kumbʰámuṣkām̐ ásr̥ṅmukʰān /
Halfverse: c    svabʰyasā́ yé codbʰyasā́ḥ //

Verse: 18 
Halfverse: a    úd vepaya tvám arbude 'mítrāṇām amū́ḥ sícaḥ /
Halfverse: c    jáyāṃś ca jiṣṇúś cāmítrām̐ jáyatām índramedinau //

Verse: 19 
Halfverse: a    práblīno mr̥ditáḥ śayāṃ ható 'mítro nyarbude /
Halfverse: c    agnijihvā́ dʰūmaśikʰā́ jáyantīr yantu sénayā //

Verse: 20 
Halfverse: a    táyārbude práṇuttānām índro hantu váraṃvaram /
Halfverse: c    amítrāṇāṃ śácīpátir mā́mī́ṣāṃ moci káś caná // {26}

Verse: 21 
Halfverse: a    út kasantu hŕ̥dayāny ūrdʰváḥ prāṇá úd īṣatu /
Halfverse: c    śauṣkāsyám ánu vartatām amítrān mótá mitríṇaḥ //

Verse: 22 
Halfverse: a    yé ca dʰī́rā yé cā́dʰīrāḥ párāñco badʰirā́ś ca yé /
Halfverse: c    tamasā́ yé ca tūparā́ átʰo bastābʰivāsínaḥ /
Halfverse: e    sárvāṃs tā́m arbude tvám amítrebʰyo dr̥śé kurūdārā́ṃś ca prá darśaya //

Verse: 23 
Halfverse: a    árbudiś ca tríṣandʰiś cāmítrān no ví vidʰyatām /
Halfverse: c    yátʰaiṣām indra vr̥trahan hánāma śacīpate 'mítrāṇāṃ sahasraśáḥ //

Verse: 24 
Halfverse: a    vánaspátīn vānaspatyā́n óṣadʰīr utá vīrúdʰaḥ /
Halfverse: c    gandʰarvāpsarásaḥ sarpā́n devā́n puṇyajanā́n pitŕ̥̄n /
Halfverse: e    sárvāṃs tā́m̐ arbude tvám amítrebʰyo dr̥śé kurūdārā́ṃś ca prá darśaya //

Verse: 25 
Halfverse: a    īśā́ṃ vo marúto devá ādityó bráhmaṇas pátiḥ /
Halfverse: c    īśā́ṃ va índraś cāgníś ca dʰātā́ mitráḥ prajā́patiḥ /
Halfverse: e    īśā́ṃ va ŕ̥ṣayaś cakrur amítreṣu samīkṣáyan radité arbude táva //

Verse: 26 
Halfverse: a    téṣāṃ sárveṣām ī́śānā út tiṣṭʰata sáṃ nahyadʰvaṃ mítrā dévajanā yūyám /
Halfverse: c    imáṃ saṃgrāmáṃ saṃjítya yatʰālokáṃ ví tiṣṭʰadʰvam // {27}


Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.