TITUS
Atharva-Veda-Samhita (Saunaka)
Part No. 473
Previous part

Hymn: 10_[12] 


Verse: 1 
Halfverse: a    út tiṣṭʰata sáṃ nahyadʰvam údārāḥ ketúbʰiḥ sahá /
Halfverse: c    sárpā ítarajanā rákṣāṃsy amítrān ánu dʰāvata //

Verse: 2 
Halfverse: a    īśā́ṃ vo veda rā́jyaṃ tríṣandʰe aruṇaíḥ ketúbʰiḥ sahá /
Halfverse: c    yé antárikṣe yé diví pr̥tʰivyā́ṃ yé ca manavā́ḥ /
Halfverse: e    tríṣandʰes té cétasi durṇā́māna úpāsatām //

Verse: 3 
Halfverse: a    áyomukʰāḥ sūcī́mukʰā átʰo vikaṅkatī́mukʰāḥ /
Halfverse: c    kravyā́do vā́taraṃhasaḥ ā́ sajantv amítrān vájreṇa tríṣandʰinā //

Verse: 4 
Halfverse: a    antár dʰehi jātaveda ā́ditya kúṇapam bahú /
Halfverse: c    trísandʰer iyáṃ sénā súhitāstu me váśe //

Verse: 5 
Halfverse: a    út tiṣṭʰa tváṃ devajanā́rbude sénayā sahá /
Halfverse: c    ayáṃ balír va ā́hutas tríṣandʰer ā́hutiḥ priyā́ //

Verse: 6 
Halfverse: a    śitipadī́ sáṃ dyatu śaravyèyáṃ cátuṣpadī /
Halfverse: c    kŕ̥tye 'mítrebʰyo bʰava tríṣandʰeḥ sahá sénayā //

Verse: 7 
Halfverse: a    dʰūmākṣī́ sáṃ patatu kr̥dʰukarnī́ ca krośatu /
Halfverse: c    tríṣandʰeḥ sénayā jité aruṇā́ḥ santu ketávaḥ //

Verse: 8 
Halfverse: a    ávāyantāṃ pakṣíṇo yé váyāṃsy antárikṣe diví yé cáranti /
Halfverse: c    śvā́pado mákṣikāḥ sáṃ rabʰantām āmā́do gŕ̥dʰrāḥ kúṇape radantām //

Verse: 9 
Halfverse: a    yā́m índreṇa saṃdʰā́ṃ samádʰattʰā bráhmaṇā ca br̥haspate /
Halfverse: c    táyāhám indrasaṃdʰáyā sárvān devā́n ihá huva itó jayata mā́mútaḥ //

Verse: 10 
Halfverse: a    bŕ̥haspátir āṅgirasá ŕ̥ṣayo bráhmasaṃśitāḥ /
Halfverse: c    asurakṣáyaṇaṃ vadʰáṃ tríṣandʰim divy ā́srayan // {28}

Verse: 11 
Halfverse: a    yénāsaú guptá ādityá ubʰā́v índraś ca tíṣṭʰataḥ /
Halfverse: c    tríṣandʰiṃ devā́ abʰajantaújase ca bálāya ca //

Verse: 12 
Halfverse: a    sárvāṃl lokā́nt sám ajayan devā́ ā́hutyānáyā /
Halfverse: c    bŕ̥haspátir āṅgirasó vájraṃ yám ásiñcatāsurakṣáyaṇaṃ vadʰám //

Verse: 13 
Halfverse: a    bŕ̥haspátir āṅgirasó vájraṃ yám ásiñcatāsurakṣáyaṇaṃ vadʰám /
Halfverse: c    ténāhám amū́ṃ sénāṃ ní limpāmi br̥haspate 'mítrān hanmy ójasā //

Verse: 14 
Halfverse: a    sárve devā́ atyā́yanti yé aśnánti váṣaṭkr̥tam /
Halfverse: c    imā́ṃ juṣadʰvam ā́hutim itó jayata mā́mútaḥ //

Verse: 15 
Halfverse: a    sárve devā atyā́yantu tríṣandʰer ā́hutiḥ priyā́ /
Halfverse: c    saṃdʰā́ṃ mahatī́ṃ rakṣata yáyā́gre ásurā jitā́ḥ //

Verse: 16 
Halfverse: a    vāyúr amítrāṇām iṣvagrā́ṇy ā́ñcatu /
Halfverse: c    índra eṣāṃ bahū́n práti bʰanaktu mā́ śakan pratidʰā́m íṣum /
Halfverse: e    ādityá eṣām astráṃ ví nāśayatu candrámā yutām ágatasya pántʰām //

Verse: 17 
Halfverse: a    yádi preyúr devapurā́ bráhma vármāṇi cakriré /
Halfverse: c    tanūpā́naṃ paripā́ṇaṃ kr̥ṇvānā́ yád upociré sárvaṃ tád arasáṃ kr̥dʰi //

Verse: 18 
Halfverse: a    kravyā́dānuvartáyan mr̥tyúnā ca puróhitam /
Halfverse: c    tríṣandʰe préhi sénayā jayāmitrān prá padyasva //

Verse: 19 
Halfverse: a    tríṣandʰe támasā tvám amítrān pári vāraya /
Halfverse: c    pr̥ṣadājyápraṇuttānāṃ mā́mī́ṣāṃ moci káś caná //

Verse: 20 
Halfverse: a    śitipadī́ sáṃ patatv amítrānām amū́ḥ śícaḥ /
Halfverse: c    múhyantv adyā́mū́ḥ sénāḥ amítrānāṃ nyarbude // {29}

Verse: 21 
Halfverse: a    mūḍʰā́ amítrā nyarbude jahy èṣāṃ váraṃvaram /
Halfverse: c    anáyā jahi sénayā //

Verse: 22 
Halfverse: a    yáś ca kavacī́ yáś cākavacó 'mítro yáś cā́jmani /
Halfverse: c    jyāpāśaíḥ kavacapāśaír ájmanābʰíhataḥ śayām //

Verse: 23 
Halfverse: a    yé varmíṇo yé 'varmā́ṇo amítrā yé ca varmíṇaḥ /
Halfverse: c    sárvāṃs tā́m̐ arbude hatā́ṃ cʰvā́no 'dantu bʰū́myām //

Verse: 24 
Halfverse: a    yé ratʰíno yé aratʰā́ asādā́ yé ca sādínaḥ /
Halfverse: c    sárvān adantu tā́n hatā́n gŕ̥dʰrāḥ śyenā́ḥ patatríṇaḥ //

Verse: 25 
Halfverse: a    sahásrakuṇapā śetām āmitrī́ sénā samaré vadʰā́nām /
Halfverse: c    víviddʰā kakajā́kr̥tā //

Verse: 26 
Halfverse: a    marmāvídʰaṃ róruvataṃ suparṇaír adántu duścítaṃ mr̥ditám śáyānam /
Halfverse: c    yá imā́ṃ pratī́cīm ā́hutim amítro no yúyutsati //

Verse: 27 
Halfverse: a    yā́ṃ devā́ anutísṭʰanti yásyā nā́sti virā́dʰanam /
Halfverse: c    táyéndro hantu vr̥trahā́ vájreṇa tríṣaṃdʰinā //



Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.