TITUS
Atharva-Veda-Samhita (Saunaka)
Part No. 475
Previous part

Hymn: 2 
Verse: 1 
Halfverse: a    naḍám ā́ roha ná te átra loká idáṃ sī́saṃ bʰāgadʰéyaṃ ta éhi /
Halfverse: c    yó góṣu yákṣmaḥ púruṣeṣu yákṣmas téna tváṃ sākám adʰarā́ṅ párehi //1//

Verse: 2 
Halfverse: a    agʰaśaṃsaduḥśaṃsā́bʰyāṃ karéṇānukaréṇa ca /
Halfverse: c    yákṣmaṃ ca sárvaṃ ténetó mr̥tyúṃ ca nír ajāmasi //2//

Verse: 3 
Halfverse: a    nír itó mr̥tyúṃ nírr̥tiṃ nír árātim ajāmasi /
Halfverse: c    yó no dvéṣṭi tám addʰy agne akravyād yám u dviṣmás tám u te prá suvāmasi //3//

Verse: 4 
Halfverse: a    yády agníḥ kravyā́d yádi vā́ vyāgʰrá imáṃ goṣṭʰáṃ pravivéśā́nyokāḥ /
Halfverse: c    táṃ mā́ṣājyaṃ kr̥tvā́ prá hiṇomi dūráṃ sá gacʰatv apsuṣádó 'py agnī́n //4//

Verse: 5 
Halfverse: a    yát tvā kruddʰā́ḥ pracakrúr manyúnā púruṣe mr̥té /
Halfverse: c    sukálpam agne tát tváyā púnas tvód dīpayāmasi //5//

Verse: 6 
Halfverse: a    púnas tvādityā́ rudrā́ vásavaḥ púnar brahmā́ vásunītir agne /
Halfverse: c    púnas tvā bráhmaṇas pátir ā́dʰād dīrgʰāyutvā́ya śatáśāradāya //6//

Verse: 7 
Halfverse: a    yó agníḥ kravyā́t pravivéśa no gr̥hám imáṃ páśyann ítaraṃ jātávedasam /
Halfverse: c    táṃ harāmi pitr̥yajñā́ya dūráṃ sá gʰarmám indʰāṃ paramé sadʰástʰe //7//

Verse: 8 
Halfverse: a    kravyā́dam agníṃ prá hiṇomi dūrám yamárājño gacʰatu ripravāháḥ /
Halfverse: c    ihā́yám ítaro jātávedā devó devébʰyo havyáṃ vahatu prajānán //8//

Verse: 9 
Halfverse: a    kravyā́dam agním iṣitó harāmi jánān dr̥ṃhántaṃ vájreṇa mr̥tyúm /
Halfverse: c    ní táṃ śāsmi gā́rhapatyena vidvā́n pitr̥̄ṇā́ṃ loké 'pi bʰāgó astu //9//

Verse: 10 
Halfverse: a    kravyā́dam agníṃ śaśamānám uktʰyà1ṃ prá hiṇomi patʰíbʰiḥ pitr̥yā́ṇaiḥ /
Halfverse: c    mā́ devayā́naiḥ púnar ā́ gā átraivaídʰi pitŕ̥ṣu jāgr̥hi tvám //10// {7}

Verse: 11 
Halfverse: a    sám indʰate sáṃkasukaṃ svastáye śuddʰā́ bʰávantaḥ śúcayaḥ pāvakā́ḥ /
Halfverse: c    jáhāti riprám áty éna eti sámiddʰo agníḥ supúnā punāti //11//

Verse: 12 
Halfverse: a    devó agníḥ sáṃkasuko divás pr̥ṣṭʰā́ny ā́ruhat /
Halfverse: c    mucyámāno nír éṇasó 'mog asmā́m̐ áśastyāḥ //12//

Verse: 13 
Halfverse: a    asmín vayáṃ sáṃkasuke agnaú riprā́ṇi mr̥jmahe /
Halfverse: c    ábʰūma yajñíyāḥ śuddʰā́ḥ prá ṇa ā́yūṃṣi tāriṣat //13//

Verse: 14 
Halfverse: a    sáṃkasuko víkasuko nirr̥tʰó yáś ca nisvaráḥ /
Halfverse: c    té te yákṣmaṃ sávedaso dūrā́d dūrám anīnaśan //14//

Verse: 15 
Halfverse: a    yó no áśveṣu vīréṣu yó no góṣv ajāvíṣu /
Halfverse: c    kravyā́daṃ nír nudāmasi yó agnír janayópanaḥ //15//

Verse: 16 
Halfverse: a    ányebʰyas tvā púruṣebʰyo góbʰyo áśvebʰyas tvā /
Halfverse: c    níḥ kravyā́daṃ nudāmasi yó agnír jīvitayópanaḥ //16//

Verse: 17 
Halfverse: a    yásmin devā́ ámr̥jata yásmin manuṣyā̀ utá /
Halfverse: c    tásmin gʰr̥tastā́vo mr̥ṣṭvā́ tvám agne dívaṃ ruha //17//

Verse: 18 
Halfverse: a    sámiddʰo agna āhuta sá no mā́bʰyápakramīḥ /
Halfverse: c    átraivá dīdihi dyávi jyók ca sū́ryaṃ dr̥śé //18//

Verse: 19 
Halfverse: a    sī́se mr̥ḍḍʰvaṃ nadé mr̥ḍḍʰvam agnaú sáṃkasuke ca yát /
Halfverse: c    átʰo ávyāṃ rāmā́yāṃ śīrṣaktím upabárhaṇe //19//

Verse: 20 
Halfverse: a    sī́se málaṃ sādayitvā́ śīrṣaktím upabárhaṇe /
Halfverse: c    ávyām ásiknyāṃ mr̥ṣṭvā́ śuddʰā́ bʰavata yajñíyāḥ //20// {8}

Verse: 21 
Halfverse: a    páraṃ mr̥tyo ánu párehi pántʰāṃ yás ta eṣá ítaro devayā́nāt /
Halfverse: c    cákṣuṣmate śr̥ṇvaté te bravīmīhémé vīrā́ bahávo bʰavantu //21//

Verse: 22 
Halfverse: a    imé jīvā́ ví mr̥taír ā́vavr̥trann ábʰūd bʰadrā́ deváhutir no adyá /
Halfverse: c    prā́ñco agāma nr̥táye hásāya suvī́rāso vidátʰam ā́ vadema //22//

Verse: 23 
Halfverse: a    imáṃ jīvébʰyaḥ paridʰíṃ dadʰāmi maíṣāṃ nú gād áparo ártʰam etám /
Halfverse: c    śatáṃ jī́vantaḥ śarádaḥ purūcī́s tiró mr̥tyúṃ dadʰatām párvatena //23//

Verse: 24 
Halfverse: a    ā́ rohatā́yur jarásaṃ vr̥ṇānā́ anupūrváṃ yátamānā yáti stʰá /
Halfverse: c    tā́n vas tváṣṭā sujánimā sajóṣāḥ sárvam ā́yur nayatu jī́vanāya //24//

Verse: 25 
Halfverse: a    yátʰā́hāny anupūrváṃ bʰavanti yátʰa rtáva r̥túbʰir yánti sākám /
Halfverse: c    yátʰā na pū́rvam áparo jáhāty evā́ dʰātar ā́yūṃṣi kalpayaiṣā́m //25//

Verse: 26 
Halfverse: a    áśmanvatī rīyate sáṃ rabʰadʰvaṃ vīráyadʰvaṃ prá taratā sakʰāyaḥ /
Halfverse: c    átrā jahīta yé ásan durévā anamīvā́n út taremābʰi vā́jān //26//

Verse: 27 
Halfverse: a    út tiṣṭʰatā prá taratā sakʰāyó 'śmanvatī nadī́ syandata iyám /
Halfverse: c    átrā jahīta yé ásann áśivāḥ śivā́nt syonā́n út taremābʰí vā́jān //27//

Verse: 28 
Halfverse: a    vaiśvadevī́ṃ várcasā ā́ rabʰadʰvaṃ śuddʰā́ bʰávantaḥ śúcayaḥ pāvakā́ḥ /
Halfverse: c    atikrā́manto duritā́ padā́ni śatáṃ hímāḥ sárvavīrā madema //28//

Verse: 29 
Halfverse: a    udīcī́naiḥ patʰíbʰir vāyumádbʰir atikrā́mantó 'varān párebʰiḥ /
Halfverse: c    tríḥ saptá kŕ̥tva ŕ̥ṣayaḥ páretā mr̥tyúṃ práty auhan padayópanena //29//

Verse: 30 
Halfverse: a    mr̥tyóḥ padáṃ yopáyanta éta drā́gʰīya ā́yuḥ prataráṃ dádʰānāḥ /
Halfverse: c    ā́sīnā mr̥tyúṃ nudatā sadʰástʰé 'tʰa jīvā́so vidátʰam ā́ vadema //30// {9}

Verse: 31 
Halfverse: a    imā́ nā́rīr avidʰavā́ḥ supátnīr ā́ñjanena sarpíṣā sáṃ spr̥śantām /
Halfverse: c    anaśrávo anamīvā́ḥ surátnā ā́ rohantu jánayo yónim ágre //31//

Verse: 32 
Halfverse: a    vyā́karomi havíṣāhám etaú taú bráhmaṇā vy àháṃ kalpayāmi /
Halfverse: c    svadʰā́ṃ pitŕ̥bʰyo ajárāṃ kr̥ṇomi dīrgʰéṇā́yuṣā sám imā́nt sr̥jāmi //32//

Verse: 33 
Halfverse: a    yó no agníḥ pitaro hr̥tsv àntár āvivéśāmŕ̥to mártyeṣu /
Halfverse: c    máyy aháṃ taṃ pári gr̥hṇāmi deváṃ mā́ só asmā́n dvikṣata mā́ vayáṃ tám //33//

Verse: 34 
Halfverse: a    apāvŕ̥tya gā́rhapatyāt kravyā́dā préta dakṣiṇā́ /
Halfverse: c    priyáṃ pitŕ̥bʰya ātmáne brahmábʰyaḥ kr̥ṇutā priyám //34//

Verse: 35 
Halfverse: a    dvibʰāgadʰanám ādā́ya prá kṣiṇāty ávartyā /
Halfverse: c    agníḥ putrásya jyeṣṭʰásya yáḥ kravyā́d ánirāhitaḥ //35//

Verse: 36 
Halfverse: a    yát kr̥ṣáte yád vanute yác ca vasnéna vindáte /
Halfverse: c    sárvaṃ mártyasya tán nā́sti kravyā́c céd ánirāhitaḥ //36//

Verse: 37 
Halfverse: a    ayajñiyó hatávarcā bʰavati naínena havír áttave /
Halfverse: c    cʰinátti kr̥ṣyā́ gór dʰánād yáṃ kravyā́d anuvártate //37//

Verse: 38 
Halfverse: a    múhur gŕ̥dʰyaiḥ prá vadaty ā́rtim mártyo nī́tya /
Halfverse: c    kravyā́d yā́n agnír antikā́d anuvidvā́n vitā́vati //38//

Verse: 39 
Halfverse: a    grā́hyā gr̥hā́ḥ sáṃ sr̥jyante striyā́ yán mriyáte pátiḥ /
Halfverse: c    brahmaívá vidvā́n eṣyò3 yáḥ kravyā́daṃ nirādádʰat //39//

Verse: 40 
Halfverse: a    yád ripráṃ śámalaṃ cakr̥má yác ca duṣkr̥tám /
Halfverse: c    ā́po mā tásmāc cʰumbʰantv agnéḥ sáṃkasukāc ca yát //40// {10}

Verse: 41 
Halfverse: a    tā́ adʰarā́d údīcīr ā́vavr̥tran prajānaitī́ḥ patʰíbʰir devayā́naiḥ /
Halfverse: c    párvatasya vr̥ṣabʰásyā́dʰi pr̥ṣṭʰé návāś caranti sarítaḥ purāṇī́ḥ //41//

Verse: 42 
Halfverse: a    ágne akravyān níḥ kravyā́daṃ nudā́ devayájanaṃ vaha //42//

Verse: 43 
Halfverse: a    imáṃ kravyā́d ā́ viveśāyáṃ kravyā́dam ánv agāt /
Halfverse: c    vyāgraú kr̥tvā́ nānānáṃ táṃ harāmi śivāparám //43//

Verse: 44 
Halfverse: a    antardʰír devā́nāṃ paridʰír manuṣyā̀ṇām agnír gārhpatya ubʰáyān antarā́ śritáḥ //44//

Verse: 45 
Halfverse: a    jīvā́nām ā́yuḥ prá tira tvám agne pitr̥̄ṇā́ṃ lokám ápi gacʰantu yé mr̥tā́ḥ /
Halfverse: c    sugārhapatyó vitápann árātim uṣā́muṣāṃ śréyasīṃ dʰehy asmaí //45//

Verse: 46 
Halfverse: a    sárvān agne sáhamānaḥ sapátnān aíṣām ū́rjaṃ rayím asmā́su dʰehi //46//

Verse: 47 
Halfverse: a    imám índraṃ váhniṃ páprim anvā́rabʰadʰvaṃ sá vo nír vakṣad duritā́d avadyā́t /
Halfverse: c    ténā́pa hata śárum āpátantaṃ téna rudrásya pári pātāstā́m //47//

Verse: 48 
Halfverse: a    anaḍvā́haṃ plavám anvā́rabʰadʰvaṃ sá vo nír vakṣad duritā́d avadyā́t /
Halfverse: c    ā́ rohata savitúr nā́vam etā́ṃ ṣaḍbʰír urvī́bʰir ámatiṃ tarema //48//

Verse: 49 
Halfverse: a    ahorātré ánv eṣi bíbʰrat kṣemyás tíṣṭʰan pratáraṇaḥ suvī́raḥ /
Halfverse: c    ánāturānt sumánasas talpa bíbʰraj jyóg evá naḥ púruṣagandʰir edʰi //49//

Verse: 50 
Halfverse: a    té devébʰya ā́ vr̥ścante pāpáṃ jīvanti sarvadā́ /
Halfverse: c    kravyā́d yā́n agnír antikā́d áśva ivānuvápate naḍám //50// {11}

Verse: 51 
Halfverse: a    yé 'śraddʰā́ dʰanakāmyā́ kravyā́dā samā́sate /
Halfverse: c    té vā́ anyéṣāṃ kumbʰī́ṃ paryā́dadʰati sarvadā́ //51//

Verse: 52 
Halfverse: a    préva pipatiṣati mánasā múhur ā́ vartate púnaḥ /
Halfverse: c    kravyā́d yā́n agnír antikā́d anuvidvā́n vitā́vati //52//

Verse: 53 
Halfverse: a    áviḥ kr̥ṣṇā́ bʰāgadʰéyaṃ paśūnā́ṃ sī́saṃ kravyā́d ápi candráṃ ta āhuḥ /
Halfverse: c    mā́ṣāḥ piṣṭā́ bʰāgadʰéyaṃ te havyám araṇyānyā́ gáhvaraṃ sacasva //53//

Verse: 54 
Halfverse: a    iṣī́kāṃ járatīm iṣṭvā́ tilpíñjaṃ dáṇḍanaṃ naḍám /
Halfverse: c    tám índra idʰmám kr̥tvā́ yamásyāgníṃ nirā́dadʰau //54//

Verse: 55 
Halfverse: a    pratyáñcam arkáṃ pratyarpayitvā́ pravidvā́n pántʰāṃ ví hy ā̀vivéśa /
Halfverse: c    párāmī́ṣām ásūn didéśa dīrgʰéṇā́yuṣā sám imā́nt sr̥jāmi //55// {12}

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.