TITUS
Atharva-Veda-Samhita (Saunaka)
Part No. 544
Previous part

Hymn: 28 
Verse: 1 
Halfverse: a    imám badʰnāmi te maṇíṃ dīrgʰāyutvā́ya téjase /
Halfverse: c    darbʰáṃ sapatnadámbʰanaṃ dviṣatás tápanaṃ hr̥dáḥ //1//

Verse: 2 
Halfverse: a    dviṣatás tāpáyan hr̥dáḥ śátrūṇāṃ tāpáyan mánaḥ /
Halfverse: c    durhā́rdaḥ sárvāṃs tváṃ darbʰa gʰarmá ivābʰī́nt saṃtāpáyan //2//

Verse: 3 
Halfverse: a    gʰarmá ivābʰitápan darbʰa dviṣató nitápan maṇe /
Halfverse: c    hr̥dáḥ sapátnānāṃ bʰinddʰī́ndra iva virujáṃ balám //3//

Verse: 4 
Halfverse: a    bʰinddʰí darbʰa sapátnānāṃ hŕ̥dayaḥ dviṣatā́ṃ maṇe /
Halfverse: c    udyán tvácam iva bʰū́myāḥ śíra eṣā́ṃ ví pātaya //4//

Verse: 5 
Halfverse: a    bʰinddʰí darbʰa sapátnān me bʰinddʰí me pr̥tanāyatáḥ /
Halfverse: c    bʰinddʰí me sárvān durhā́rdo bʰinddʰí me dviṣató maṇe //5//

Verse: 6 
Halfverse: a    cʰinddʰí darbʰa sapátnān me cʰinddʰí me pr̥tanāyatáḥ /
Halfverse: c    cʰinddʰí me sárvān durhā́rdo cʰinddʰí me dviṣató maṇe //6//

Verse: 7 
Halfverse: a    vr̥ścá darbʰa sapátnān me vr̥ścá me pr̥tanāyatáḥ /
Halfverse: c    vr̥ścá me sárvān durhā́rdo vr̥ścá me dviṣató maṇe //7//

Verse: 8 
Halfverse: a    kr̥ntá darbʰa sapátnān me kr̥ntá me pr̥tanāyatáḥ /
Halfverse: c    kr̥ntá me sárvān durhā́rdo kr̥ntá me dviṣató maṇe //8//

Verse: 9 
Halfverse: a    piṃśá darbʰa sapátnān me piṃśá me pr̥tanāyatáḥ /
Halfverse: c    piṃśá me sárvān durhā́rdo piṃśá me dviṣató maṇe //9//

Verse: 10 
Halfverse: a    vídʰya darbʰa sapátnān me vídʰya me pr̥tanāyatáḥ /
Halfverse: c    vídʰya me sárvān durhā́rdo vídʰya me dviṣató maṇe //10//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.