TITUS
Atharva-Veda-Samhita (Saunaka)
Part No. 543
Previous part

Hymn: 27 
Verse: 1 
Halfverse: a    góbʰiṣ ṭvā pātv r̥ṣabʰó vŕ̥ṣā tvā pātu vājíbʰiḥ /
Halfverse: c    vāyúṣ tvā bráhmaṇā pātv índras tvā pātv indriyaíḥ //1//

Verse: 2 
Halfverse: a    sómas tvā pātv óṣadʰībʰir nákṣatraiḥ pātu sū́ryaḥ /
Halfverse: c    mādbʰyás tvā candró vr̥trahā́ vā́taḥ prāṇéna rakṣatu //2//

Verse: 3 
Halfverse: a    tisró dívas tisráḥ pr̥tʰivī́s trī́ṇy antárikṣāṇi catúraḥ samudrā́n /
Halfverse: c    trivŕ̥taṃ stómaṃ trivŕ̥ta ā́pa āhus tā́s tvā rakṣantu trivŕ̥tā trivŕ̥dbʰiḥ //3//

Verse: 4 
Halfverse: a    trī́n nā́kāṃs trī́n samudrā́ṃs trī́n bradʰnā́ṃs trī́n vaiṣṭapā́n /
Halfverse: c    trī́n mātaríśvanas trī́nt sū́ryān goptŕ̥̄n kalpayāmi //4//

Verse: 5 
Halfverse: a    gʰr̥téna tvā sám ukṣāmy ágne ā́jyena vardʰáyan /
Halfverse: c    agnéś candrásya sū́ryasya mā́ prāṇáṃ māyíno dabʰan //5//

Verse: 6 
Halfverse: a    mā́ vaḥ prāṇáṃ mā́ vo 'pānáṃ mā́ háro māyíno dabʰan /
Halfverse: c    bʰrājanto viśvávedaso devā́ daívyena dʰāvata //6//

Verse: 7 
Halfverse: a    prānénāgníṃ sáṃ sr̥jati vā́taḥ prāṇéna sáṃhitaḥ /
Halfverse: c    prāṇéna viśvátomukʰaṃ súryaṃ devā́ ajanayan //7//

Verse: 8 
Halfverse: a    ā́yuṣāyuḥkŕ̥tāṃ jīvā́yuṣmān jīva mā́ mr̥tʰāḥ /
Halfverse: c    prāṇénātmanvátām jīva mā mr̥tyór úd agā váśam //8//

Verse: 9 
Halfverse: a    devā́nāṃ níhitaṃ nidʰíṃ yám índro 'nvávindat patʰíbʰir devayā́naiḥ /
Halfverse: c    ā́po híraṇyaṃ jugupus trivŕ̥dbʰis tā́s tvā rakṣantu trivŕ̥tā trivŕ̥dbʰiḥ //9//

Verse: 10 
Halfverse: a    tráyastriṃśad devátās trī́ṇi ca vīryā̀ṇi priyāyámānā jugupur apsv àntáḥ /
Halfverse: c    asmíṃś candré ádʰi yád dʰíraṇyaṃ ténāyáṃ kr̥ṇavad vīryā̀ṇi //10//

Verse: 11 
Halfverse: a    yé devā divy ékādaśa stʰá te devāso havír idáṃ juṣadʰvam //11//

Verse: 12 
Halfverse: a    yé devā antárikṣa ékādaśa stʰá te devāso havír idáṃ juṣadʰvam //12//

Verse: 13 
Halfverse: a    yé devā pr̥tʰivyā́m ékādaśa stʰá te devāso havír idáṃ juṣadʰvam //13//

Verse: 14 
Halfverse: a    asapatnáṃ purástāt paścā́n no ábʰayaṃ kr̥tam /
Halfverse: c    savitā́ mā dakṣiṇatá uttarā́n mā śacīpátiḥ //14//

Verse: 15 
Halfverse: a    divó mādityā́ rakṣantu bʰū́myā rakṣantv agnáyaḥ /
Halfverse: c    indrāgnī́ rakṣatāṃ mā purástād aśvínāv abʰítaḥ śárma yacʰatām /
Halfverse: e    tiraścī́n agʰnyā́ rakṣatu jātávedā bʰūtakŕ̥to me sarvátaḥ santu várma //15//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.