TITUS
Atharva-Veda-Samhita (Saunaka)
Part No. 547
Previous part

Hymn: 31 
Verse: 1 
Halfverse: a    aúdumbareṇa maṇínā púṣṭikāmāya vedʰásā /
Halfverse: c    paśūṇā́ṃ sárveṣāṃ spʰātíṃ goṣṭʰé me savitā́ karat //1//

Verse: 2 
Halfverse: a    yó no agnír gā́rhapatyaḥ paśūnā́m adʰipā́ ásat /
Halfverse: c    aúdumbaro vŕ̥so maṇíḥ sáṃ mā sr̥jatu puṣṭyā́ //2//

Verse: 3 
Halfverse: a    karīṣíṇīṃ pʰálavatīṃ svadʰā́m írāṃ ca no gr̥hé /
Halfverse: c    aúdumbarasya téjasā dʰātā́ puṣṭíṃ dadʰātu me //3//

Verse: 4 
Halfverse: a    yád dvipā́c ca cátuṣpāc ca yā́ny ánnāni yé rásāḥ /
Halfverse: c    gr̥hṇè3 'háṃ tv èṣāṃ bʰūmā́naṃ bíbʰrad aúdumbaraṃ maṇím //4//

Verse: 5 
Halfverse: a    puṣṭíṃ paśūnā́m pári jagrabʰāháṃ cátuṣpadāṃ dvipádāṃ yác ca dʰānyàm /
Halfverse: c    páyaḥ paśūnā́ṃ rásam óṣadʰīnāṃ bŕ̥haspátiḥ savitā́ me ní yacʰāt //5//

Verse: 6 
Halfverse: a    aháṃ paśūnā́m adʰipā́ ásāni máyi puṣṭáṃ puṣṭapátir dadʰātu /
Halfverse: c    máhyam aúdumbaro maṇír dráviṇāni ní yacʰatu //6//

Verse: 7 
Halfverse: a    úpa maúdumbaro maṇíḥ prajáyā ca dʰánena ca /
Halfverse: c    índreṇa jinvitó maṇír ā́ māgant sahá várcasā //7//

Verse: 8 
Halfverse: a    devó maṇíḥ sapatnahā́ dʰanasā́ dʰánasātaye /
Halfverse: c    paśór ánnasya bʰūmā́naṃ gávāṃ spʰātíṃ ní yacʰatu //8//

Verse: 9 
Halfverse: a    yátʰā́gre tváṃ vanaspate puṣṭʰyā́ sahá jajñiṣé /
Halfverse: c    evā́ dʰánasya me spʰātím ā́ dadʰātu sárasvatī //9//

Verse: 10 
Halfverse: a    ā́ me dʰánaṃ sárasvatī páyaspʰātiṃ ca dʰānyàm /
Halfverse: c    sinīvāly úpā́ vahād ayáṃ caúdumbaro maṇíḥ //10//

Verse: 11 
Halfverse: a    tváṃ maṇīṇā́m adʰipā́ vŕ̥ṣāsi tváyi puṣṭáṃ puṣṭapátir jajāna /
Halfverse: c    tváyīmé vā́jā dráviṇāni sárvaúdumbaraḥ sá tvám asmát sahasvārā́d ārā́d árātim ámatiṃ kṣúdʰaṃ ca //11//

Verse: 12 
Halfverse: a    grāmaṇī́r asi grāmaṇī́r uttʰā́ya abʰíṣikto 'bʰí mā siñca várcasā /
Halfverse: c    téjo 'si téjo máyi dʰārayā́dʰi rayír asi rayíṃ me dʰehi //12//

Verse: 13 
Halfverse: a    puṣṭír asi puṣṭyā́ mā sám aṅgdʰi gr̥hamedʰī́ gr̥hápatiṃ mā kr̥ṇu /
Halfverse: c    aúdumbaraḥ sá tvám asmā́su dʰehi rayíṃ ca naḥ sárvavīraṃ ní yacʰa rāyás póṣāya práti muñce aháṃ tvā́m //13//

Verse: 14 
Halfverse: a    ayám aúdumbaro maṇír vīró vīrā́ya badʰyate /
Halfverse: c    sá naḥ saníṃ mádʰumatīṃ kr̥ṇotu rayíṃ ca naḥ sárvavīram ní yacʰāt //14//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.