TITUS
Atharva-Veda-Samhita (Saunaka)
Part No. 548
Previous part

Hymn: 32 
Verse: 1 
Halfverse: a    śatákāṇḍo duścyavanáḥ sahásraparṇa uttiráḥ /
Halfverse: c    darbʰó yá ugrá óṣadʰis táṃ te badʰnāmy ā́yuṣe //1//

Verse: 2 
Halfverse: a    nā́sya kéśān prá vapanti nórasi tāḍam ā́ gʰnate /
Halfverse: c    yásmā acʰinnaparṇéna darbʰéna śárma yácʰati //2//

Verse: 3 
Halfverse: a    diví te tū́lam oṣadʰe pr̥tʰivyām asi níṣṭʰitaḥ /
Halfverse: c    tváyā sahásrakāṇḍenā́yuḥ prá vardʰayāmahe //3//

Verse: 4 
Halfverse: a    tisró divó áty atr̥ṇat tisrá imāḥ pr̥tʰivī́r utá /
Halfverse: c    tváyāháṃ durhā́rdo jihvā́ṃ ní tr̥ṇadmi vácāṃsi //4//

Verse: 5 
Halfverse: a    tvám asi sáhamāno 'hám asmi sáhasvān /
Halfverse: c    ubʰaú sáhasvantau bʰūtvā́ sapátnān sahiṣīvahi //5//

Verse: 6 
Halfverse: a    sáhasva no abʰímātiṃ sáhasva pr̥tanāyatáḥ /
Halfverse: c    sáhasva sárvān durhā́rdaḥ suhā́rdo me bahū́n kr̥dʰi //6//

Verse: 7 
Halfverse: a    darbʰéṇa devájātena diví ṣṭambʰéna śáśvad ít /
Halfverse: c    ténāháṃ śáśvato jánām̐ ásanaṃ sánavāni ca //7//

Verse: 8 
Halfverse: a    priyáṃ mā darbʰa kr̥ṇu brahmarājanyā̀bʰyām śūdrā́ya cā́ryāya ca /
Halfverse: c    yásmai ca kāmáyāmahe sárvasmai ca vipáśyate //8//

Verse: 9 
Halfverse: a    yó jā́yamānaḥ pr̥tʰivī́m ádr̥ṃhad yó ástabʰnād antárikṣaṃ dívaṃ ca /
Halfverse: c    yáṃ bibʰrataṃ nanú pāpmā́ viveda sá no 'yáṃ darbʰó váruṇo divā́ kaḥ //9//

Verse: 10 
Halfverse: a    sapatnahā́ śatákāṇḍaḥ sáhasvān óṣadʰīnāṃ pratʰamáḥ sáṃ babʰūva /
Halfverse: c    sá no 'yáṃ darbʰáḥ pári pātu viśvátas téna sākṣīya pŕ̥tanāḥ pr̥tanyatáḥ //10//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.