TITUS
Atharva-Veda-Samhita (Saunaka)
Part No. 568
Previous part

Hymn: 52 
Verse: 1 
Halfverse: a    kā́mas tád ágre sám avartata mánaso rétaḥ pratʰamáṃ yád ā́sīt /
Halfverse: c    sá kāma kā́mena br̥hatā́ sáyonī rāyás póṣaṃ yájamānāya dʰehi //1//

Verse: 2 
Halfverse: a    tváṃ kāma sáhasāsi prátiṣṭʰito vibʰúr vibʰā́vā sakʰa ā́ sakʰīyaté /
Halfverse: c    tvám ugráḥ pŕ̥tanāsu sasahíḥ sáha ójo yájamānāya dʰehi //2//

Verse: 3 
Halfverse: a    dūrā́c cakamānā́ya pratipāṇā́yā́kṣaye /
Halfverse: c    ā́smā aśr̥ṇvann ā́śāḥ kā́menājanayant svàḥ //3//

Verse: 4 
Halfverse: a    kā́mena mā kā́ma ā́gan hŕ̥dayād dʰŕ̥dayaṃ pári /
Halfverse: c    yád amī́ṣām adó mánas tád aítū́pa mām ihá //4//

Verse: 5 
Halfverse: a    yát kāma kāmáyamānā idáṃ kr̥ṇmási te havíḥ /
Halfverse: c    tán naḥ sárvaṃ sám r̥dʰyatām átʰaitásya havíṣo vīhi svā́hā //5//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.