TITUS
Atharva-Veda-Samhita (Saunaka)
Part No. 599
Previous part

Hymn: 11 
Verse: 1 
Halfverse: a    índraḥ pūrbʰíd ā́tirad dā́sam arkaír vidádvasur dáyamāno ví śátrūn /
Halfverse: c    bráhmajūtas tanvā̀ vāvr̥dʰānó bʰū́ridātra ā́pr̥ṇad ródasī ubʰé //1//

Verse: 2 
Halfverse: a    makʰásya te taviṣásya prá jūtím íyarmi vā́cam amŕ̥tāya bʰū́ṣan /
Halfverse: c    índra kṣitīnā́m asi mā́nuṣīṇāṃ viśā́ṃ daívīnām utá pūrvayā́vā //2//

Verse: 3 
Halfverse: a    índro vr̥trám avr̥ṇoc cʰárdʰanītiḥ prá māyínām aminād várpaṇītiḥ /
Halfverse: c    áhan vyàṃsam uśádʰag váneṣv āvír dʰénā akr̥ṇod rāmyā́ṇām //3//

Verse: 4 
Halfverse: a    índraḥ svarṣā́ janáyann áhāni jigā́yośígbʰiḥ pŕ̥tanā abʰiṣṭíḥ /
Halfverse: c    prā́rocayan mánave ketúm áhnām ávindaj jyótir br̥haté ráṇāya //4//

Verse: 5 
Halfverse: a    índras tújo barháṇā ā́ viveśa nr̥vád dádʰāno náryā purū́ṇi /
Halfverse: c    ácetayad dʰíya imā́ jaritré prémáṃ várṇam atirac cʰukrám āsām //5//

Verse: 6 
Halfverse: a    mahó mahā́ni panayanty asyéndrasya kárma súkr̥tā purū́ṇi /
Halfverse: c    vr̥jánena vr̥jinā́nt sáṃ pipeṣa māyā́bʰir dasyū́m̐r abʰíbʰūtyojāḥ //6//

Verse: 7 
Halfverse: a    yudʰéndro mahnā́ várivaś cakāra devébʰyaḥ sátpatiś carṣaṇiprā́ḥ /
Halfverse: c    vivásvataḥ sádane asya tā́ni víprā uktʰébʰiḥ kaváyo gr̥ṇanti //7//

Verse: 8 
Halfverse: a    satrāsā́haṃ váreṇyaṃ sahodā́ṃ sasavā́ṃsaṃ svàr apáś ca devī́ḥ /
Halfverse: c    sasā́na yáḥ pr̥tʰivī́ṃ dyā́m utémā́m índraṃ madanty ánu dʰī́raṇāsaḥ //8//

Verse: 9 
Halfverse: a    sasā́nā́tyām̐ utá sū́ryaṃ sasānéndraḥ sasāna purubʰójasaṃ gā́m /
Halfverse: c    hiraṇyáyam utá bʰógaṃ sasāna hatvī́ dásyūn prā́ryaṃ várṇam āvat //9//

Verse: 10 
Halfverse: a    índra óṣadʰīr asanod áhāni vánaspátīm̐r asanod antárikṣam /
Halfverse: c    bibʰéda baláṃ nunudé vívācó 'tʰābʰavad damitā́bʰíkratūnām //10//

Verse: 11 
Halfverse: a    śunáṃ huvema magʰávānam índram asmín bʰáre nŕ̥tamaṃ vā́jasātau /
Halfverse: c    śr̥ṇvántam ugrám ūtáye samátsu gʰnántaṃ vr̥trā́ṇi saṃjítaṃ dʰánānām //11//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.