TITUS
Atharva-Veda-Samhita (Saunaka)
Part No. 624
Previous part

Hymn: 36 
Verse: 1 
Halfverse: a    yá éka íd dʰávyaś carṣaṇīnā́m índraṃ táṃ gīrbʰír abʰy àrca ābʰíḥ /
Halfverse: c    yáḥ pátyate vr̥ṣabʰó vŕ̥ṣṇyāvānt satyáḥ sátvā purumāyáḥ sáhasvān //1//

Verse: 2 
Halfverse: a    tám u naḥ pū́rve pitáro návagvāḥ saptá víprāso abʰí vājáyantaḥ /
Halfverse: c    nakṣaddābʰáṃ táturiṃ parvateṣṭʰā́m ádrogʰavācaṃ matíbʰiḥ śáviṣṭʰam //2//

Verse: 3 
Halfverse: a    tám īmahe índram asya rāyáḥ puruvī́rasya nr̥vátaḥ purukṣóḥ /
Halfverse: c    yó áṣkr̥dʰoyur ajáraḥ svàrvān tám ā́ bʰara harivo mādayádʰyai //3//

Verse: 4 
Halfverse: a    tán no ví voco yádi te purā́ cij jaritā́ra ānaśúḥ sumnám indra /
Halfverse: c    kás te bʰāgáḥ kíṃ váyo dudʰra kʰiduḥ púruhūta purūvaso 'suragʰnáḥ //4//

Verse: 5 
Halfverse: a    táṃ pr̥cʰántī vájrahastaṃ ratʰeṣṭʰā́m índraṃ vépī vákvarī yásya nū́ gī́ḥ /
Halfverse: c    tuvigrābʰáṃ tuvikūrmíṃ rabʰodā́ṃ gātúm íṣe nákṣate túmram ácʰa //5//

Verse: 6 
Halfverse: a    ayā́ ha tyáṃ māyáyā vāvr̥dʰānáṃ manojúvā svatavaḥ párvatena /
Halfverse: c    ácyutā cid vīlitā́ svojo rujó ví dr̥lhā́ dʰr̥ṣatā́ virapśin //6//

Verse: 7 
Halfverse: a    tám vo dʰiyā́ návyasyā śáviṣṭʰam pratnáṃ pratnavát paritaṃsayádʰyai /
Halfverse: c    sá no vakṣad animānáḥ suváhnéndro víśvāny áti durgáhāṇi //7//

Verse: 8 
Halfverse: a    ā́ jánāya drúhvaṇe pā́rtʰivāni divyā́ni dīpayo 'ntárikṣā /
Halfverse: c    tápā vr̥ṣan viśvátaḥ śocíṣā tā́n brahmadvíṣe śócaya kṣā́m apáś ca //8//

Verse: 9 
Halfverse: a    bʰúvo jánasya divyásya rā́jā pā́rtʰivasya jágatas tveṣasaṃdr̥k /
Halfverse: c    dʰiṣvá vájraṃ dákṣiṇa indra háste víśvā ajurya dayase ví māyā́ḥ //9//

Verse: 10 
Halfverse: a    ā́ saṃyátam indra ṇaḥ svastíṃ śatrutū́ryāya br̥hatī́m ámr̥dʰrām /
Halfverse: c    yáyā dā́sāny ā́ryāṇi vr̥trā́ káro vajrint sutúkā nā́huṣāṇi //10//

Verse: 11 
Halfverse: a    sá no niyúdbʰiḥ puruhūta vedʰo viśvávārābʰir ā́ gahi prayajyo /
Halfverse: c    ná yā́ ádevo várate ná devá ā́bʰir yāhi tū́yam ā́ madryadrík //11//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.