TITUS
Atharva-Veda-Samhita (Saunaka)
Part No. 754

Hymn: 124 
Verse: 1 
Halfverse: a    káyā naś citrá ā́ bʰuvad ūtī́ sadā́vr̥dʰaḥ sákʰā /
Halfverse: c    káyā śáciṣṭʰayā vr̥tā́ //1//

Verse: 2 
Halfverse: a    kás tvā satyó mádānāṃ máṃhiṣṭʰo matsad ándʰasaḥ /
Halfverse: c    dr̥lhā́ cid ārúje vásu //2//

Verse: 3 
Halfverse: a    abʰī́ ṣú naḥ sákʰīnām avitā́ jaritr̥̄ṇā́m /
Halfverse: c    śatáṃ bʰavāsy ūtíbʰiḥ //3//

Verse: 4 
Halfverse: a    imā́ nú kaṃ bʰúvanā sīṣadʰāméndraś ca víśve ca devā́ḥ /
Halfverse: c    yajñáṃ ca nas tanvàṃ ca prajā́ṃ cādityaír índraḥ sahá cīkḷpāti //4//

Verse: 5 
Halfverse: a    ādityaír índraḥ ságaṇo marúdbʰir asmā́kaṃ bʰūtv avitā́ tanū́nām /
Halfverse: c    hatvā́ya devā́ ásurān yád ā́yan devā́ devatvám abʰirákṣamāṇāḥ //5//

Verse: 6 
Halfverse: a    pratyáñcam arkám anayaṃ cʰácībʰir ā́d ít svadʰā́m iṣirā́m páry apaśyan /
Halfverse: c    ayā́ vā́jaṃ deváhitaṃ sanema mádema śatáhimāḥ suvī́rāḥ //6//



Copyright TITUS Project, Frankfurt a/M, 1.1.2002. No parts of this document may be republished in any form without prior permission by the copyright holder.