TITUS
Atharva-Veda-Samhita (Saunaka)
Part No. 758

Hymn: 128 
Verse: 1 
Halfverse: a    yáḥ sabʰéyo vidatʰyàḥ sutvā́ yajvā́tʰa pū́ruṣaḥ /
Halfverse: c    sū́ryaṃ cā́mū riśā́dásas tád devā́ḥ prā́g akalpayan //1//

Verse: 2 
Halfverse: a    yó jāmyā́ ápratʰayas tád yát sákʰāyaṃ dúdʰūrṣati /
Halfverse: c    jyéṣṭʰo yád apracetās tád āhur ádʰarāg íti //2//

Verse: 3 
Halfverse: a    yád bʰadrásya púruṣasya putró bʰavati dādʰr̥ṣíḥ /
Halfverse: c    tád vipró ábravīd u tád gandʰarváḥ kā́myaṃ vácaḥ //3//

Verse: 4 
Halfverse: a    yáśca paṇí rágʰujiṣṭʰyó yáśca devā́m̐ ádāśuriḥ /
Halfverse: c    dʰī́rāṇāṃ śáśvatām aháṃ tád apāg íti śuśruma //4//

Verse: 5 
Halfverse: a    yé ca devā́ áyajantā́tʰo yé ca parādadíḥ /
Halfverse: c    sū́ryo dívam iva gatvā́ya magʰávā no ví rapśate //5//

Verse: 6 
Halfverse: a    yóʼnāktā́kṣo anabʰyaktó ámaṇivó áhiraṇyávaḥ /
Halfverse: c    ábrahmā bráhmaṇaḥ putrástotā́ kálpeṣu saṃmítā //6//

Verse: 7 
Halfverse: a    yá āktā́kṣaḥ subʰyaktáḥ súmaṇiḥ súhiraṇyávaḥ /
Halfverse: c    súbrahmā bráhmaṇaḥ putrástotā́ kálpeṣu saṃmítā //7//

Verse: 8 
Halfverse: a    áprapāṇā́ ca veśantā́ revā́m̐ áprátidiśyayaḥ /
Halfverse: c    áyabʰyā kanyā̀ kalyāṇī́ totā́ kálpeṣu saṃmítā //8//

Verse: 9 
Halfverse: a    súprapāṇā́ ca veśantā́ revā́nt súprátidiśyayaḥ /
Halfverse: c    súyabʰyā kanyā̀ kalyāṇī́ totā́ kálpeṣu saṃmítā //9//

Verse: 10 
Halfverse: a    párivr̥ktā́ ca máhiṣī svastyā̀ ca yudʰíṃ gamáḥ /
Halfverse: c    ánāśuráścā́yāmī́ totā́ kálpeṣu saṃmítā //10//

Verse: 11 
Halfverse: a    vāvātā́ ca máhiṣī svastyā̀ ca yudʰíṃ gamáḥ /
Halfverse: c    śvāśúraś cāyāmī́ totā́ kálpeṣu saṃmítā //11//

Verse: 12 
Halfverse: a    yád indrādo dāśarājñé mā́nuṣaṃ ví gāhatʰāḥ /
Halfverse: c    vírūpaḥ sárvasmā āsīt sahá yakṣā́ya kálpate //12//

Verse: 13 
Halfverse: a    tváṃ vr̥ṣākṣúṃ magʰavann ámraṃ maryā́káro ráviḥ /
Halfverse: c    tváṃ rauhiṇáṃ vyā̀syo ví vr̥trásyā́bʰinac cʰíraḥ //13//

Verse: 14 
Halfverse: a    yáḥ párvatān vyàdadʰād yó apó vyagāhatʰāḥ /
Halfverse: c    índro yó vr̥trahā́nmaháṃ tásmād indra námo ʼstu te //14//

Verse: 15 
Halfverse: a    pr̥ṣṭʰáṃ dʰā́vantaṃ haryór aúccaiḥ śravasám abruvan /
Halfverse: c    svastyáśva jaítrāyéndram ā́ vaha susrájam //15//

Verse: 16 
Halfverse: a    yé tvā śvetā́ ájaiśravasó hā́ryo yuñjánti dákṣiṇam /
Halfverse: c    pū́rvā námasya devā́nāṃ bíbʰrad indra mahīyate //16//



Copyright TITUS Project, Frankfurt a/M, 1.1.2002. No parts of this document may be republished in any form without prior permission by the copyright holder.